൩. സഭോജനസിക്ഖാപദവണ്ണനാ

‘‘സഭോജനേ’’തി ബാഹിരത്ഥസമാസോയം, ഉഭസദ്ദേ ഉകാരസ്സ ച ലോപോതി ആഹ ‘‘സഹ ഉഭോഹി ജനേഹീ’’തിആദി. തത്ഥ ഉഭോഹി ജനേഹീതി ജായാ ച പതി ചാതി ഉഭോഹി ജനേഹി. ഭുഞ്ജിതബ്ബന്തി വാ ഭോജനം, ഇത്ഥീ ച പുരിസോ ച, തേന സഹ വത്തതീതി സഭോജനന്തി ആഹ ‘‘അഥ വാ’’തിആദി. രാഗപരിയുട്ഠിതസ്സാതി മേഥുനാധിപ്പായസ്സ. സയനിഘരന്തി സയനീയഘരം, വാസഗേഹന്തി അത്ഥോ. മഹല്ലകസ്സാതി മഹല്ലകസ്സ സയനിഘരസ്സ. പിട്ഠസങ്ഘാടതോതി ദ്വാരബാഹതോ ഖുദ്ദകസ്സ വാതി യഥാ തഥാ വാ കതസ്സ ഖുദ്ദകസ്സ സയനിഘരസ്സ. വേമജ്ഝം അതിക്കമിത്വാ നിസീദേയ്യാതി പിട്ഠിവംസം അതിക്കമിത്വാ നിസീദേയ്യ. ഖുദ്ദകം (സാരത്ഥ. ടീ. പാചിത്തിയ ൩.൨൮൦) നാമ സയനിഘരം വിത്ഥാരതോ പഞ്ചഹത്ഥപ്പമാണം ഹോതി, തസ്സ ച മജ്ഝിമട്ഠാനം പിട്ഠസങ്ഘാടതോ അഡ്ഢതേയ്യഹത്ഥപ്പമാണമേവ ഹോതി, തസ്മാ താദിസേ സയനിഘരേ പിട്ഠസങ്ഘാടതോ ഹത്ഥപാസം വിജഹിത്വാ നിസിന്നോ പിട്ഠിവംസം അതിക്കമിത്വാ നിസിന്നോ നാമ ഹോതി. ഏവം നിസിന്നോ ച വേമജ്ഝം അതിക്കമിത്വാ നിസിന്നോ നാമ ഹോതി. തേന വുത്തം പാളിയം ‘‘പിട്ഠിവംസം അതിക്കമിത്വാ നിസീദതീ’’തി (പാചി. ൨൮൧). സചിത്തകഞ്ചേത്ഥ അനുപവിസിത്വാ നിസീദനചിത്തേന ദട്ഠബ്ബം.

സഭോജനസിക്ഖാപദവണ്ണനാ നിട്ഠിതാ.