൧൩. അസംകച്ചികസിക്ഖാപദവണ്ണനാ

പരിക്ഖിത്തസ്സ ഗാമസ്സ പരിക്ഖേപം, അപരിക്ഖിത്തസ്സ ഉപചാരം അതിക്കമന്തിയാ വാ ഓക്കമന്തിയാ വാതി ഏത്ഥ പരിക്ഖിത്തസ്സ ഗാമസ്സ പരിക്ഖേപം അതിക്കമന്തിയാ വാ അപരിക്ഖിത്തസ്സ ഗാമസ്സ ഉപചാരം ഓക്കമന്തിയാ വാതി യഥാക്കമം സമ്ബന്ധോ വേദിതബ്ബോ. ആപദാസൂതി മഹഗ്ഘം സംകച്ചികം പാരുപിത്വാ ഗച്ഛന്തിയാ ഉപദ്ദവോ ഉപ്പജ്ജതി, ഏവരൂപാസു ആപദാസു.

അസംകച്ചികസിക്ഖാപദവണ്ണനാ നിട്ഠിതാ.

ഛത്തുപാഹനവഗ്ഗോ നവമോ.

ഇതി കങ്ഖാവിതരണിയാ പാതിമോക്ഖവണ്ണനായ

വിനയത്ഥമഞ്ജൂസായം ലീനത്ഥപ്പകാസനിയം

ഭിക്ഖുനിപാതിമോക്ഖേ പാചിത്തിയവണ്ണനാ നിട്ഠിതാ.

അസാധാരണസമുട്ഠാനവണ്ണനാ

അചിത്തകാനീതി (സാരത്ഥ. ടീ. പാചിത്തിയ ൩.൧൨൧൪) ‘‘നച്ച’’ന്തിആദിനാ അജാനിത്വാ ദസ്സനാദിം കരോന്തിയാ ആപത്തിസമ്ഭവതോ വത്ഥുഅജാനനചിത്തേന അചിത്തകാനി. ലോകവജ്ജാനീതി ‘‘നച്ച’’ന്തിആദിനാ ജാനിത്വാ ദസ്സനാദിം കരോന്തിയാ അകുസലേനേവ ആപജ്ജനതോ ലോകവജ്ജാനി. തേനാഹ ‘‘അയം പനേത്ഥ അധിപ്പായോ’’തിആദി സചിത്തകാനീതി ‘‘ചോരീ’’തിആദിനാ വത്ഥും ജാനിത്വാ കരണേയേവ ആപത്തിസമ്ഭവതോ സചിത്തകാനി. ഉപസമ്പദാദീനം ഏകന്താകുസലചിത്തേനേവ അകത്തബ്ബത്താ പണ്ണത്തിവജ്ജാനി. ‘‘ഇധ സചിത്തകാചിത്തകതാ പണ്ണത്തിജാനനാജാനനതായ അഗ്ഗഹേട്ഠാ വത്ഥുജാനനാജാനനതായ ഗഹേതബ്ബ’’ന്തി വദന്തി.

അസാധാരണസമുട്ഠാനവണ്ണനാ നിട്ഠിതാ.