൬. ആരാമവഗ്ഗോ

൧-൨. ആരാമപവിസനാദിസിക്ഖാപദവണ്ണനാ

സീസാനുലോകികായാതി സീസം അനുലോകേന്തിയാ. യത്ഥ വാ ഭിക്ഖുനിയോ സന്നിപതിതാതി യത്ഥ ഭിക്ഖുനിയോ പഠമതരം സജ്ഝായനചേതിയവന്ദനാദിഅത്ഥം സന്നിപതിതാ. ആപദാസൂതി കേനചി ഉപദ്ദുതാ ഹോതി, ഏവരൂപാസു ആപദാസു പവിസിതും വട്ടതി.

ദുതിയം ഉത്താനത്ഥമേവ.

ആരാമപവിസനാദിസിക്ഖാപദവണ്ണനാ നിട്ഠിതാ.

൩-൪. ഗണപരിഭാസനാദിസിക്ഖാപദവണ്ണനാ

സേസന്തി ‘‘അത്ഥധമ്മഅനുസാസനിപുരേക്ഖാരായാ’’തിആദികം അവസേസം. തത്ഥ അനുസാസനിപുരേക്ഖാരായാതി ‘‘ഇദാനിപി ത്വം ബാലാ അബ്യത്താ’’തിആദിനാ (പാചി. അട്ഠ. ൧൦൩൬) നയേന അനുസാസനിപക്ഖേ ഠത്വാ വദന്തിയാ അനാപത്തി.

ചതുത്ഥം ഉത്താനത്ഥമേവ.

ഗണപരിഭാസനാദിസിക്ഖാപദവണ്ണനാ നിട്ഠിതാ.

൫. കുലമച്ഛരിനീസിക്ഖാപദവണ്ണനാ

കുലേ മച്ഛരോ കുലമച്ഛരോതി പുരിമസ്മിം പക്ഖേ സകത്ഥേ ഇനീപച്ചയോ, തം കുലം അസ്സദ്ധം അപ്പസന്നന്തി കുലസ്സ അഗുണം, അയസം വാ ഭാസന്തിയാതി അത്ഥോ. ഭിക്ഖുനീനം അവണ്ണം ഭാസന്തിയാതി ‘‘ഭിക്ഖുനിയോ ദുസ്സീലാ പാപധമ്മാ’’തി (പാചി. അട്ഠ. ൧൦൪൩) ഭിക്ഖുനീനം അഗുണം, അയസം വാ ഭാസന്തിയാ.

സന്തംയേവ ആദീനവന്തി കുലസ്സ വാ ഭിക്ഖുനീനം വാ സന്തംയേവ അഗുണം.

കുലമച്ഛരിനീസിക്ഖാപദവണ്ണനാ നിട്ഠിതാ.

൬-൮. അഭിക്ഖുകാവാസാദിസിക്ഖാപദവണ്ണനാ

സമന്തപാസാദികായം വുത്തോതി സമന്തപാസാദികായ ഓവാദവഗ്ഗസ്സ പഠമസിക്ഖാപദേ (പാചി. അട്ഠ. ൧൪൪) വുത്തോ.

സത്തമട്ഠമാനി ഉത്താനത്ഥാനേവ.

അഭിക്ഖുകാവാസാദിസിക്ഖാപദവണ്ണനാ നിട്ഠിതാ.

൯-൧൦. ഓവാദൂപസങ്കമനാദിസിക്ഖാപദവണ്ണനാ

ഉപോസഥസ്സ പുച്ഛനം ഉപോസഥപുച്ഛാ, സാവകപച്ചയം, രസ്സത്തഞ്ച കത്വാ ‘‘ഉപോസഥപുച്ഛക’’ന്തി വുത്താതി ആഹ ‘‘ഉപോസഥപുച്ഛന’’ന്തി. ഓവാദത്ഥായാതി ഓവാദയാചനത്ഥായ.

ദസമം ഉത്താനത്ഥമേവ.

ഓവാദൂപസങ്കമനാദിസിക്ഖാപദവണ്ണനാ നിട്ഠിതാ.

ആരാമവഗ്ഗോ ഛട്ഠോ.