൧൦. സപ്പാണകസിക്ഖാപദവണ്ണനാ

ദസമേ ജാനം സപ്പാണകന്തി ‘‘സപ്പാണകം ഏത’’ന്തി ദിസ്വാ വാ സുത്വാ വാ യേന കേനചി ആകാരേന ജാനന്തോ. സിഞ്ചേയ്യ വാ സിഞ്ചാപേയ്യ വാതി തേന ഉദകേന സയം വാ സിഞ്ചേയ്യ, അഞ്ഞം വാ ആണാപേത്വാ സിഞ്ചാപേയ്യ. തത്ഥ ധാരം അവിച്ഛിന്ദിത്വാ സിഞ്ചന്തസ്സ ഏകസ്മിം ഘടേ ഏകാവ ആപത്തി, വിച്ഛിന്ദന്തസ്സ പയോഗഗണനായ ആപത്തിയോ. മാതികം പമുഖം കരോതി, ദിവസമ്പി സന്ദതു, ഏകാവ ആപത്തി. തത്ഥ തത്ഥ ബന്ധിത്വാ അഞ്ഞതോ നേന്തസ്സ പയോഗഗണനായ ആപത്തിയോ. ബഹുകമ്പി തിണപണ്ണസാഖാദിം ഏകപ്പയോഗേന ഉദകേ പക്ഖിപന്തസ്സ ഏകാവ ആപത്തി, ഏകേകം പക്ഖിപന്തസ്സ പയോഗഗണനായ ആപത്തിയോ. ഇദഞ്ച യം ഏവം പക്ഖിപിയമാനേ പരിയാദാനം ഗച്ഛതി, ആവിലം വാ ഹോതി, യഥാ പാണകാ മരന്തി, താദിസം സന്ധായ വുത്തം, ന മഹാഉദകം. സിഞ്ചാപനേ ആണത്തിയാ ദുക്കടം, ഏകാണത്തിയാ ബഹുകമ്പി സിഞ്ചതു, ആണാപകസ്സ ഏകമേവ പാചിത്തിയം.

ആളവിയം ആളവകേ ഭിക്ഖൂ ആരബ്ഭ സിഞ്ചനവത്ഥുസ്മിം പഞ്ഞത്തം, സാധാരണപഞ്ഞത്തി, സാണത്തികം, അപ്പാണകേ സപ്പാണകസഞ്ഞിനോ, ഉഭോസു വേമതികസ്സ ദുക്കടം. അപ്പാണകസഞ്ഞിനോ, അസഞ്ചിച്ച അസ്സതിയാ വാ സിഞ്ചന്തസ്സ, അജാനന്തസ്സ, ഉമ്മത്തകാദീനഞ്ച അനാപത്തി. ഉദകസ്സ സപ്പാണകതാ, ‘‘സിഞ്ചനേന പാണകാ മരിസ്സന്തീ’’തി ജാനനം, തഞ്ച ഉദകം താദിസമേവ, വിനാ വധകചേതനായ യേന കേനചി കരണീയേന തിണാദീനം സിഞ്ചനന്തി ഇമാനേത്ഥ ചത്താരി അങ്ഗാനി. സമുട്ഠാനാദീനി അദിന്നാദാനസദിസാനി, ഇദം പന പണ്ണത്തിവജ്ജം, തിചിത്തം, തിവേദനന്തി.

സപ്പാണകസിക്ഖാപദവണ്ണനാ നിട്ഠിതാ.

ഭൂതഗാമവഗ്ഗോ ദുതിയോ.