൯. സോകാവാസസിക്ഖാപദവണ്ണനാ

നവമേ സോകാവാസന്തി സങ്കേതം കത്വാ ആഗച്ഛമാനാ പുരിസാനം അന്തോസോകം പവേസേതീതി സോകാവാസാ, തം സോകാവാസം. അഥ വാ ഘരം വിയ ഘരസാമികാ അയമ്പി പുരിസസമാഗമം അലഭമാനാ സോകം ആവിസതി, ഇതി യം ആവിസതി, സ്വാസ്സാ ആവാസോ ഹോതീതി സോകാവാസാ. തേനേവസ്സ പദഭാജനേ (പാചി. ൧൧൬൦) ‘‘സോകാവാസാ നാമ പരേസം ദുക്ഖം ഉപ്പാദേതി, സോകം ആവിസതീ’’തി ദ്വിധാ അത്ഥോ വുത്തോ. പാചിത്തിയന്തി ഏവരൂപം വുട്ഠാപേന്തിയാ വുത്തനയേനേവ കമ്മവാചാപരിയോസാനേ ഉപജ്ഝായായ പാചിത്തിയം.

സാവത്ഥിയം ഥുല്ലനന്ദം ആരബ്ഭ ഏവരൂപം സിക്ഖമാനം വുട്ഠാപനവത്ഥുസ്മിം പഞ്ഞത്തം. അജാനന്തിയാ, ഉമ്മത്തികാദീനഞ്ച അനാപത്തി. സോകാവാസതാ, ജാനനം, വുട്ഠാപനന്തി ഇമാനേത്ഥ തീണി അങ്ഗാനി. സമുട്ഠാനാദീനി ഗബ്ഭിനിവുട്ഠാപനസദിസാനേവാതി.

സോകാവാസസിക്ഖാപദവണ്ണനാ നിട്ഠിതാ.