൧൦. അനനുഞ്ഞാതസിക്ഖാപദവണ്ണനാ

ദസമേ മാതാപിതൂഹീതി വിജാതമാതരാ ച ജനകപിതരാ ച. സാമികേനാതി യേന പരിഗ്ഗഹിതാ, തേന. അനനുഞ്ഞാതന്തി ഉപസമ്പദത്ഥായ അനനുഞ്ഞാതം. ദ്വിക്ഖത്തുഞ്ഹി ഭിക്ഖുനീഹി ആപുച്ഛിതബ്ബം, പബ്ബജ്ജാകാലേ ച ഉപസമ്പദാകാലേ ച, ഭിക്ഖൂനം പന സകിം ആപുച്ഛിതേപി വട്ടതി. തസ്മാ യാ ഉപസമ്പദാകാലേ അനാപുച്ഛാ ഉപസമ്പാദേതി, തസ്സാ വുത്തനയേനേവ പാചിത്തിയം.

സാവത്ഥിയം ഥുല്ലനന്ദം ആരബ്ഭ അനനുഞ്ഞാതവുട്ഠാപനവത്ഥുസ്മിം പഞ്ഞത്തം. അപലോകേത്വാ വുട്ഠാപേന്തിയാ, തേസം അത്ഥിഭാവം അജാനന്തിയാ, ഉമ്മത്തികാദീനഞ്ച അനാപത്തി. അനപലോകനം, അത്ഥിഭാവജാനനം, വുട്ഠാപനന്തി ഇമാനേത്ഥ തീണി അങ്ഗാനി. അനനുഞ്ഞാതസമുട്ഠാനം, കിരിയാകിരിയം, നോസഞ്ഞാവിമോക്ഖം, അചിത്തകം, പണ്ണത്തിവജ്ജം, കായകമ്മം, വചീകമ്മം, തിചിത്തം, തിവേദനന്തി.

അനനുഞ്ഞാതസിക്ഖാപദവണ്ണനാ നിട്ഠിതാ.