൩. നിരോധസച്ചനിദ്ദേസവണ്ണനാ

൨൦൪. തണ്ഹായ വിരജ്ജനം ഹലിദ്ദിരാഗസ്സ വിയ പലുജ്ജനന്തി കത്വാ ആഹ ‘‘ഖയഗമനവസേനാ’’തി. വിച്ഛിന്നം നിരുജ്ഝനന്തി വുത്തം ‘‘അപ്പവത്തിഗമനവസേനാ’’തി. ചജനം ഛഡ്ഡനം, ഹാപനം വാതി ആഹ ‘‘അനപേക്ഖതായ ചജനവസേന, ഹാനിവസേന ചാ’’തി.

തദപ്പവത്തി വിയാതി തസ്സാ തിത്തഅലാബുവല്ലിയാ അപ്പവത്തി വിയ. അപ്പവത്തിഹേതുഭൂതമ്പി നിബ്ബാനം തണ്ഹായ അപ്പവത്തി വിയ ഗയ്ഹതീതി ആഹ ‘‘തദപ്പവത്തി വിയാ’’തി യഥാ ‘‘രാഗക്ഖയോ’’തി (സം. നി. ൪.൩൧൫, ൩൩൦). അപ്പവത്തിഭൂതന്തി തണ്ഹായ അപ്പവത്തിയാ പത്തം, പത്തബ്ബന്തി അത്ഥോ. നിബ്ബാനം ആഗമ്മ നിരുദ്ധായപി തണ്ഹായ പിയരൂപസാതരൂപേസു നിരുദ്ധാതി വത്തബ്ബതാദസ്സനത്ഥം വുത്താതി യോജനാ. ഏത്ഥ ച യസ്മാ മഗ്ഗോ, നിബ്ബാനഞ്ച തണ്ഹായ സമുച്ഛേദസാധനം, തസ്മാ ‘‘പുരിമാ വാ ഉപമാ’’തിആദിനാ ഉപമാദ്വയം ഉഭയത്ഥ യഥാക്കമം യോജിതം, ഉഭയട്ഠാനിയം പന ഉഭയത്ഥാപി ലബ്ഭതേവ.

നിരോധസച്ചനിദ്ദേസവണ്ണനാ നിട്ഠിതാ.