൬. ദുതിയസഞ്ഞാസുത്തവണ്ണനാ

൪൯. ഛട്ഠേ ന്ഹാരുവിലേഖനന്തി ചമ്മം ലിഖന്താനം ചമ്മം ലിഖിത്വാ ഛഡ്ഡിതകസടം. ‘‘ഏസോഹമസ്മീ’’തിആദിനാ അഹംകരണം അഹങ്കാരോ. ‘‘ഏതം മമാ’’തി മമംകരണം മമങ്കാരോ. തേനാഹ ‘‘അഹങ്കാരദിട്ഠിതോ’’തിആദി. തിസ്സോ വിധാതി സേയ്യസദിസഹീനവസേന തയോ മാനാ. ‘‘ഏകവിധേന രൂപസങ്ഗഹോ’’തിആദീസു (ധ. സ. ൫൮൪) കോട്ഠാസോ ‘‘വിധാ’’തി വുത്തോ. ‘‘കഥംവിധം സീലവന്തം വദന്തി, കഥംവിധം പഞ്ഞവന്തം വദന്തീ’’തിആദീസു (സം. നി. ൧.൯൫) പകാരോ. ‘‘തിസ്സോ ഇമാ, ഭിക്ഖവേ, വിധാ. കതമാ തിസ്സോ? സേയ്യോഹമസ്മീതി വിധാ’’തി (വിഭ. ൯൨൦) ഏത്ഥ മാനോ ‘‘വിധാ’’തി വുത്തോ. ഇധാപി മാനോവ അധിപ്പേതോ. മാനോ ഹി വിദഹനതോ ഹീനാദിവസേന തിവിധാ. തേനാകാരേന ദഹനതോ ഉപദഹനതോ ‘‘വിധാ’’തി വുച്ചതി.

ദുതിയസഞ്ഞാസുത്തവണ്ണനാ നിട്ഠിതാ.