൭-൮. മേഥുനസുത്താദിവണ്ണനാ

൫൦-൫൧. സത്തമേ ഇധാതി ഇമസ്മിം ലോകേ. ഏകച്ചോതി ഏകോ. സമണോ വാ ബ്രാഹ്മണോ വാതി പബ്ബജ്ജാമത്തേന സമണോ വാ, ജാതിമത്തേന ബ്രാഹ്മണോ വാ. ദ്വയംദ്വയസമാപത്തിന്തി ദ്വീഹി ദ്വീഹി സമാപജ്ജിതബ്ബം, മേഥുനന്തി അത്ഥോ. ന ഹേവ ഖോ സമാപജ്ജതീതി സമ്ബന്ധോ. ഉച്ഛാദനം ഉബ്ബട്ടനം. സമ്ബാഹനം പരിമദ്ദനം. സാദിയതീതി അധിവാസേതി. തദസ്സാദേതീതി ഉച്ഛാദനാദിം അഭിരമതി. നികാമേതീതി ഇച്ഛതി. വിത്തിന്തി തുട്ഠിം. ഇദമ്പി ഖോതി ഏത്ഥ ഇദന്തി യഥാവുത്തം സാദിയനാദിം ഖണ്ഡാദിഭാവവസേന ഏകം കത്വാ വുത്തം. പി-സദ്ദോ വക്ഖമാനം ഉപാദായ സമുച്ചയത്ഥോ, ഖോ-സദ്ദോ അവധാരണത്ഥോ. ഇദം വുത്തം ഹോതി – യദേതം ബ്രഹ്മചാരിപടിഞ്ഞസ്സ അസതിപി ദ്വയംദ്വയസമാപത്തിയം മാതുഗാമസ്സ ഉച്ഛാദനനഹാപനസമ്ബാഹനസാദിയനാദി. ഇദമ്പി ഏകംസേന തസ്സ ബ്രഹ്മചരിയസ്സ ഖണ്ഡാദിഭാവാപാദനതോ ഖണ്ഡമ്പി ഛിദ്ദമ്പി സബലമ്പി കമ്മാസമ്പീതി. ഏവം പന ഖണ്ഡാദിഭാവാപത്തിയാ സോ അപരിസുദ്ധം ബ്രഹ്മചരിയം ചരതി, ന പരിസുദ്ധം, സംയുത്തോ മേഥുനസംയോഗേന, ന വിസംയുത്തോ. തതോ ചസ്സ ന ജാതിആദീഹി പരിമുത്തീതി ദസ്സേന്തോ ‘‘അയം വുച്ചതീ’’തിആദിമാഹ.

സഞ്ജഗ്ഘതീതി കിലേസവസേന മഹാഹസിതം ഹസതി. സംകീളതീതി കായസംസഗ്ഗവസേന കീളതി. സംകേലായതീതി സബ്ബസോ മാതുഗാമം കേലായന്തോ വിഹരതി. ചക്ഖുനാതി അത്തനോ ചക്ഖുനാ. ചക്ഖുന്തി മാതുഗാമസ്സ ചക്ഖും. ഉപനിജ്ഝായതീതി ഉപേച്ച നിജ്ഝായതി ഓലോകേതി. തിരോകുട്ടന്തി കുട്ടസ്സ പരതോ. തഥാ തിരോപാകാരം, ‘‘മത്തികാമയാ ഭിത്തി കുട്ടം, ഇട്ഠകാമയാ പാകാരോ’’തി വദന്തി. യാ കാചി വാ ഭിത്തി പോരിസകാ ദിയഡ്ഢരതനപ്പമാണാ കുട്ടം, തതോ അധികോ പാകാരോ. അസ്സാതി ബ്രഹ്മചാരിപടിഞ്ഞസ്സ. പുബ്ബേതി വതസമാദാനതോ പുബ്ബേ. കാമഗുണേഹീതി കാമകോട്ഠാസേഹി. സമപ്പിതന്തി സുട്ഠു അപ്പിതം സഹിതം. സമങ്ഗിഭൂതന്തി സമന്നാഗതം. പരിചാരയമാനന്തി കീളന്തം, ഉപട്ഠഹിയമാനം വാ. പണിധായാതി പത്ഥേത്വാ. സീലേനാതിആദീസു യമനിയമാദിസമാദാനവസേന സീലം, അവീതിക്കമവസേന വതം. ഉഭയമ്പി വാ സീലം, ദുക്കരചരിയവസേന പവത്തിതം വതം. തംതംഅകിച്ചസമ്മതതോ വാ നിവത്തിലക്ഖണം സീലം, തംതംസമാദാനവതോ വേസഭോജനകിച്ചകരണാദിവിസേസപ്പടിപത്തി വതം. സബ്ബഥാപി ദുക്കരചരിയാ തപോ. മേഥുനാ വിരതി ബ്രഹ്മചരിയന്തി ഏവമ്പേത്ഥ പാളിവണ്ണനാ വേദിതബ്ബാ. അട്ഠമം ഉത്താനമേവ.

മേഥുനസുത്താദിവണ്ണനാ നിട്ഠിതാ.