൪-൫. ദുതിയഅഗ്ഗിസുത്താദിവണ്ണനാ

൪൭-൪൮. ചതുത്ഥേ യഞ്ഞവാടം സമ്പാദേത്വാ മഹായഞ്ഞം ഉദ്ദിസ്സ സവിഞ്ഞാണകാനി അവിഞ്ഞാണകാനി ച യഞ്ഞൂപകരണാനി സജ്ജിതാനീതി ആഹ പാളിയം ‘‘മഹായഞ്ഞോ ഉപക്ഖടോ’’തി. തം ഉപകരണം തേസം തഥാസജ്ജനന്തി ആഹ ‘‘ഉപക്ഖടോതി പച്ചുപട്ഠിതോ’’തി. വച്ഛതരസതാനീതി യുവഭാവപ്പത്താനി നാതിബലവവച്ഛസതാനി. തേ പന വച്ഛാ ഏവ ഹോന്തി, ന ദമ്മാ, ബലീബദ്ദാ വാ. ഉരബ്ഭാതി തരുണമേണ്ഡകാ വുച്ചന്തി. ഉപനീതാനീതി ഠപനത്ഥായ ഉപനീതാനി. വിഹിംസട്ഠേനാതി ഹിംസനട്ഠേന. ഉപവായതൂതി ഉപഗന്ത്വാ സരീരദരഥം നിബ്ബാപേന്തോ സണ്ഹസീതലാ വാതോ വായതു. സേസം സുവിഞ്ഞേയ്യമേവ. പഞ്ചമേ നത്ഥി വത്തബ്ബം.

ദുതിയഅഗ്ഗിസുത്താദിവണ്ണനാ നിട്ഠിതാ.