൧൦. നന്ദമാതാസുത്തവണ്ണനാ

൫൩. ദസമേ ‘‘വുത്ഥവസ്സോ പവാരേത്വാ…പേ… നിക്ഖമീ’’തി അങ്ഗുത്തരഭാണകാനം മതേനേതം വുത്തം. മജ്ഝിമഭാണകാ പന വദന്തി ‘‘ഭഗവാ ഉപകട്ഠായ വസ്സൂപനായികായ ജേതവനതോ ഭിക്ഖുസങ്ഘപരിവുതോ ചാരികം നിക്ഖമി. തേനേവ ച അകാലേ നിക്ഖന്തത്താ കോസലരാജാദയോ വാരേതും ആരഭിംസു. പവാരേത്വാ ഹി ചരണം ബുദ്ധാചിണ്ണ’’ന്തി. പുണ്ണായ സമ്മാപടിപത്തിം പച്ചാസീസന്തോ ഭഗവാ ‘‘മമ നിവത്തനപച്ചയാ ത്വം കിം കരിസ്സസീ’’തി ആഹ. പുണ്ണാപി…പേ… പബ്ബജീതി ഏത്ഥ സേട്ഠി ‘‘പുണ്ണായ ഭഗവാ നിവത്തിതോ’’തി സുത്വാ തം ഭുജിസ്സം കത്വാ ധീതുട്ഠാനേ ഠപേസി. സാ പബ്ബജ്ജം യാചിത്വാ പബ്ബജി, പബ്ബജിത്വാ വിപസ്സനം ആരഭി. അഥസ്സാ സത്ഥാ ആരദ്ധവിപസ്സകഭാവം ഞത്വാ ഇമം ഓഭാസഗാഥം വിസ്സജ്ജേസി –

‘‘പുണ്ണേ പൂരസ്സു സദ്ധമ്മം, ചന്ദോ പന്നരസോ യഥാ;

പരിപുണ്ണായ പഞ്ഞായ, ദുക്ഖസ്സന്തം കരിസ്സസീ’’തി. (ഥേരീഗാ. ൩);

സാ ഗാഥാപരിയോസാനേ അരഹത്തം പത്വാ അഭിഞ്ഞാതാ സാവികാ അഹോസി. സേസമേത്ഥ സുവിഞ്ഞേയ്യമേവ.

നന്ദമാതാസുത്തവണ്ണനാ നിട്ഠിതാ.

മഹായഞ്ഞവഗ്ഗവണ്ണനാ നിട്ഠിതാ.

പഠമപണ്ണാസകം നിട്ഠിതം.