൧. സരൂപസങ്ഗഹകഥാ

൨. ചിത്തം ചേതസികം രൂപം, നിബ്ബാനന്തി നിരുത്തരോ;

ചതുധാ ദേസയീ ധമ്മേ, ചതുസച്ചപ്പകാസനോ.

൩. ചിത്തമേകൂനനവുതിവിധം തത്ഥ വിഭാവയേ;

ഏകനവുതിവിധം വാ, ഏകവീസസതമ്പി വാ.

൪. ദ്വേപഞ്ഞാസ സരൂപേന, ധമ്മാ ചേതസികാ മതാ;

ചിത്തുപ്പാദവസാ ഭിന്നാ, സമ്പയോഗാനുസാരതോ.

൫. അട്ഠവീസവിധം രൂപം, ഭൂതോപാദായഭേദതോ;

ദുവിധം രൂപരൂപം തു, അട്ഠാരസവിധം ഭവേ.

൬. നിബ്ബാനം പന ദീപേന്തി, അസങ്ഖതമനുത്തരം;

അത്ഥനാമവസാ ദ്വേധാ, പഞ്ഞത്തീതി പവുച്ചതി.

൭. തേസം ദാനി പവക്ഖാമി, വിഭാഗം തു യഥാക്കമം;

ചതുധാ പരമത്ഥാനം, ദ്വിധാ പഞ്ഞത്തിയാ കഥം.

൮. കുസലാദിവിഭാഗേന, തത്ഥ ചിത്തം ചതുബ്ബിധം;

തഥാ ഭൂമിവിഭാഗേന, കാമഭൂമാദിതോ കഥം.

൯. സോമനസ്സസഹഗതം, ഉപേക്ഖാസഹിതം തഥാ;

ഞാണേന സമ്പയുത്തഞ്ച, വിപ്പയുത്തന്തി ഭേദിതം.

൧൦. അസങ്ഖാരം സസങ്ഖാരമിതി ഭിന്നം പുനട്ഠധാ;

കാമാവചരകുസലം, കാമേ സുഗതിസാധകം.

൧൧. തക്കചാരപീതിസുഖ-ചിത്തസ്സേകഗ്ഗതായുതം;

പഠമജ്ഝാനകുസലം, പഞ്ചങ്ഗികമുദാഹടം.

൧൨. വിതക്കഹീനം ദുതിയം, ഝാനം തു ചതുരങ്ഗികം;

വിചാരഹീനം തതിയം, ഝാനം പന തിവങ്ഗികം.

൧൩. പീതിഹീനം ചതുത്ഥഞ്ച, ഉപേക്ഖേകഗ്ഗതായുതം;

പഞ്ചമഞ്ച പകാസേന്തി, ഉഭയമ്പി ദുവങ്ഗികം.

൧൪. ഏവം ഝാനങ്ഗഭേദേന, ചിത്തം പഞ്ചവിധം ഭവേ;

രൂപാവചരകുസലം, രൂപഭൂമിപവത്തകം.

൧൫. ആകാസാനഞ്ചായതനം, കുസലം പഠമം ഭവേ;

വിഞ്ഞാണഞ്ചായതനന്തി, ദുതിയം തതിയം തഥാ.

൧൬. ആകിഞ്ചഞ്ഞായതനം തു, ചതുത്ഥം പന മാനസം;

നേവസഞ്ഞാനാസഞ്ഞായ-തനഞ്ചേതി ചതുബ്ബിധം.

൧൭. ആരുപ്പകുസലം നാമ, ഉപേക്ഖേകഗ്ഗതായുതം;

ദുവങ്ഗികമിദം സബ്ബം, ആരുപ്പഭവസാധകം.

൧൮. സോതാപത്തിമഗ്ഗചിത്തം, പഠമാനുത്തരം തഥാ;

സകദാഗാമി അനാഗാമി, അരഹത്തന്തി സബ്ബഥാ.

൧൯. ചതുധാ മഗ്ഗഭേദേന, ഝാനഭേദേന പഞ്ചധാ;

വീസതാപരിയാപന്നകുസലം ദ്വയമിസ്സിതം.

൨൦. ഇത്ഥം ഭൂമിവിഭാഗേന, കുസലം തു ചതുബ്ബിധം;

ഏകവീസാപി ബാവീസം, സത്തതിംസവിധമ്പി വാ.

൨൧. സോമനസ്സസഹഗതം, ഉപേക്ഖാസഹിതം തഥാ;

ദിട്ഠിഗതസമ്പയുത്തം, വിപ്പയുത്തന്തി ഭേദിതം.

൨൨. അസങ്ഖാരം സസങ്ഖാരമിതി ഭിന്നം പുനട്ഠധാ;

ലോഭമൂലം പകാസേന്തി, ലോഭമോഹദ്വിഹേതുകം.

൨൩. ദോമനസ്സസഹഗതം, പടിഘേന സമായുതം;

അസങ്ഖാരം സസങ്ഖാരമിതി ഭിന്നം ദ്വിധാ പന.

൨൪. ദോസമൂലം പകാസേന്തി, ദോസമോഹദ്വിഹേതുകം;

വിചികിച്ഛാസഹഗതം, ഉദ്ധച്ചസഹിതന്തി ച.

൨൫. ഉപേക്ഖാവേദനായുത്തം, മോമൂഹം ദുവിധം പന;

മോഹമൂലം പകാസേന്തി, മോഹേനേവേകഹേതുകം.

൨൬. ദ്വാദസാകുസലാ നാമ, ചതുരാപായസാധകാ;

ഏതേ സുഗതിയഞ്ചാപി, വിപത്തിഫലദായകാ.

൨൭. ചക്ഖുസോതഘാനജിവ്ഹാ-കായവിഞ്ഞാണനാമകാ;

പഞ്ചവിഞ്ഞാണയുഗളാ, യുഗളം സമ്പടിച്ഛനം.

൨൮. സന്തീരണദ്വയഞ്ചേവ, ഉപേക്ഖാസഹിതം തഥാ;

പുഞ്ഞാപുഞ്ഞവസേനേവ, വിപാകാ ദുവിധാ ഠിതാ.

൨൯. ഉപേക്ഖാസഹിതാ തത്ഥ, മാനസാ ദ്വാദസേരിതാ;

കായവിഞ്ഞാണയുഗളം, സുഖദുക്ഖയുതം കമാ.

൩൦. സോമനസ്സസഹഗതം, യം സന്തീരണമാനസം;

തം പുഞ്ഞപാകമേവാഹു, പാപപാകം ന വിജ്ജതി.

൩൧. പഞ്ചദ്വാരമനോദ്വാര-വസേന ദുവിധം പന;

ഉപേക്ഖാവേദനായുത്തം, ക്രിയാവജ്ജനനാമകം.

൩൨. സോമനസ്സസഹഗതം, ഹസിതുപ്പാദമാനസം;

ക്രിയാജവനമിച്ചേവം, തിവിധാഹേതുകക്രിയാ.

൩൩. അട്ഠേവ പുഞ്ഞപാകാനി, പാപപാകാനി സത്തധാ;

ക്രിയചിത്താനി തീണീതി, അട്ഠാരസ അഹേതുകാ.

൩൪. സപുഞ്ഞേഹി സമാനാ ച, മഹാപാകമഹാക്രിയാ;

മഹഗ്ഗതക്രിയാ പാകാ, ഫലചിത്താനി ച കമാ.

൩൫. ഇത്ഥമേകൂനനവുതി-വിധം ചിത്തം ഭവേ തഥാ;

ഏകനവുതിവിധം വാ, ഏകവീസസതമ്പി വാ.

൩൬. തക്കചാരപീതിസുഖചിത്തസ്സേകഗ്ഗതായുതം;

സോതാപത്തിമഗ്ഗചിത്തം, പഠമജ്ഝാനികം മതം.

൩൭. ദുതിയം തക്കതോ ഹീനം, തതിയം തു വിചാരതോ;

ചതുത്ഥം പീതിതോ ഹീനം, ഉപേക്ഖേകഗ്ഗതായുതം.

൩൮. പഞ്ചമന്തി ച പഞ്ചേതേ, പഠമാനുത്തരാ മതാ;

ദിട്ഠികങ്ഖാസീലബ്ബതപരാമാസപ്പഹായിനോ.

൩൯. തഥേവ സകദാഗാമിമഗ്ഗചിത്തഞ്ച പഞ്ചധാ;

രാഗദോസമോഹത്തയതനുത്തകരമീരിതം.

൪൦. കാമദോസസമുഗ്ഘാതകരം നിരവസേസതോ;

തതിയാനുത്തരഞ്ചാപി, കുസലം പഞ്ചധാ തഥാ.

൪൧. രൂപരാഗാരൂപരാഗമാനുദ്ധച്ചാപി ചാപരാ;

അവിജ്ജാ ചേതി പഞ്ചുദ്ധംഭാഗിയാനമസേസതോ.

൪൨. സംയോജനാനം സേസാനം, സമുഗ്ഘാതകരം പരം;

ചതുത്ഥാനുത്തരം മഗ്ഗചിത്തം പഞ്ചവിധന്തി ച.

൪൩. ചത്താരി പഞ്ചകാനേവ, മഗ്ഗേസു ച ഫലേസു ച;

സേസാനി ചേകാസീതീതി, ഏകവീസസതം ഭവേ.

൪൪. ലോകുത്തരാനം അട്ഠന്നം, ഇച്ചേവം പഞ്ചധാ പുന;

ഝാനങ്ഗമഗ്ഗബോജ്ഝങ്ഗ-വിഭാഗായ യഥാരഹം.

൪൫. പാദകജ്ഝാനമാമട്ഠഝാനം അജ്ഝാസയോ തഥാ;

വുട്ഠാനഗാമിനീ ചേവ, നിയാമേതി വിപസ്സനാതി.

ഇതി ചിത്തവിഭാഗേ സരൂപസങ്ഗഹകഥാ നിട്ഠിതാ.

പഠമോ പരിച്ഛേദോ.