ദുതിയോ പരിച്ഛേദോ

൨. പകിണ്ണകകഥാ

൪൬. കുസലാനേകവീസേവ, ദ്വാദസാകുസലാനി ച;

ഛത്തിംസതി വിപാകാനി, ക്രിയാചിത്താനി വീസതി.

൪൭. കാമേസു ചതുപഞ്ഞാസ, രൂപേസു ദസ പഞ്ച ച;

ദ്വാദസാരുപ്പചിത്താനി, അട്ഠാനുത്തരമാനസാ.

൪൮. കാമേ തേവീസ പാകാനി, പുഞ്ഞാപുഞ്ഞാനി വീസതി;

ഏകാദസ ക്രിയാ ചേതി, ചതുപഞ്ഞാസ സബ്ബഥാ.

൪൯. പുഞ്ഞപാകക്രിയാഭേദാ, തയോ രൂപേസു പഞ്ചകാ;

ആരുപ്പേതി ചതുക്കാനി, സത്തവീസ മഹഗ്ഗതാ.

൫൦. ചതുമഗ്ഗഫലാനം തു, വസേനട്ഠപി ഝാനതോ;

ദസോഭയമ്പി മിസ്സേത്വാ, താലീസാനുത്തരാ സിയും.

൫൧. പുഞ്ഞപാകക്രിയാപാപാ, സന്തി കാമേ മഹഗ്ഗതേ;

പാപം നത്ഥി ക്രിയാപാപാ, ന വിജ്ജന്തി അനുത്തരേ.

൫൨. പാപാഹേതുകമുത്താനി, അനവജ്ജാനി സബ്ബഥാ;

ഏകൂനസട്ഠി ചിത്താനി, പുഞ്ഞപാകക്രിയാവസാ.

൫൩. കമ്മചിത്താനി തേത്തിംസ, പുഞ്ഞാപുഞ്ഞാനി സബ്ബഥാ;

ഛത്തിംസ തേസം പാകാനി, ക്രിയാ വീസ ന ചോഭയം.

൫൪. ചക്ഖുവിഞ്ഞാണധാതാദി, പഞ്ചവിഞ്ഞാണനാമകാ;

പഞ്ചദ്വാരാവജ്ജനഞ്ച, ദുവിധം സമ്പടിച്ഛനം.

൫൫. മനോധാതുത്തയം നാമ, ഛസത്തതി തതോ പരേ;

മനോവിഞ്ഞാണധാതൂതി, സത്തധാ ധാതുഭേദതോ.

൫൬. മനോവിഞ്ഞാണധാതുഞ്ച, മനോധാതുത്തയം തഥാ;

കത്വാ മനോവിഞ്ഞാണന്തി, ഛ വിഞ്ഞാണാ പകിത്തിതാ.

൫൭. ആവജ്ജനം ദസ്സനഞ്ച, സവനം ഘായനം തഥാ;

സായനം ഫുസനഞ്ചേവ, സമ്പടിച്ഛനതീരണം.

൫൮. വോട്ഠബ്ബനഞ്ച ജവനം, തദാരമ്മണനാമകം;

ഭവങ്ഗം ചുതി സന്ധീതി, ചിത്തം ചുദ്ദസധാ ഠിതം.

൫൯. ആവജ്ജനാദയോ ദ്വേ ദ്വേ, യുഗാ സത്ത യഥാക്കമം;

തീണി തീരണചിത്താനി, ഏകം വോട്ഠബ്ബനം മതം.

൬൦. കുസലാകുസലാ സബ്ബേ, ഫലാ ചാവജ്ജനം വിനാ;

ക്രിയാ ച പഞ്ചപഞ്ഞാസ, ജവനന്തി പവുച്ചരേ.

൬൧. സന്തീരണമഹാപാകാ, തദാരമ്മണനാമകാ;

ഏകാദസ പവത്തന്തി, ജവനാരമ്മണേ യതോ.

൬൨. മഹഗ്ഗതമഹാപാകാ, ഉപേക്ഖാതീരണദ്വയം;

ചുതിസന്ധിഭവങ്ഗാനി, ചിത്താനേകൂനവീസതി.

൬൩. ജവനാവജ്ജനാദീനി, വോട്ഠബ്ബസുഖതീരണാ;

മഹഗ്ഗതമഹാപാകാ, ഉപേക്ഖാതീരണാതി ച.

൬൪. അട്ഠസട്ഠി തഥാ ദ്വേ ച, നവട്ഠ ദ്വേ യഥാക്കമം;

ഏകദ്വിതിചതുപ്പഞ്ചകിച്ചട്ഠാനാനി നിദ്ദിസേ.

൬൫. രൂപപാകാ മഹാപാകാ, മനോധാതു ച തീരണം;

രൂപം ജനേന്തി ഏകൂനവീസതി നേതരദ്വയം.

൬൬. അഭിഞ്ഞാവജ്ജിതാ സബ്ബേ, അപ്പനാജവനാ പന;

രൂപം ജനേന്തി ഛബ്ബീസ, പണാമേന്തിരിയാപഥം.

൬൭. അഭിഞ്ഞാദ്വയവോട്ഠബ്ബപരിത്തജവനാ പന;

ദ്വത്തിംസ രൂപവിഞ്ഞത്തിഇരിയാപഥസാധകാ.

൬൮. പഞ്ചവിഞ്ഞാണമാരുപ്പ-വിപാകാ സബ്ബസന്ധിയോ;

ചുതി ഖീണാസവസ്സേതി, സോളസേതേ ന കിഞ്ചിപി.

൬൯. രൂപം ജനേന്തി ചിത്താനി, സത്തസത്തതി സബ്ബഥാ;

അട്ഠപഞ്ഞാസ ചിത്താനി, പണാമേന്തിരിയാപഥം.

൭൦. ദ്വത്തിംസ ചതുവിഞ്ഞത്തിം, സമുട്ഠാപേന്തി മാനസാ;

ന ജനേന്തി തസ്സമ്പേകം, യഥാവുത്താനി സോളസ.

൭൧. സോമനസ്സസഹഗതാ, പരിത്തജവനാ പന;

ഹസനമ്പി ജനേന്തീതി, ചതുകിച്ചാനി തേരസ.

൭൨. സബ്ബമ്പി പഞ്ചവോകാരേ, കിച്ചമേതം പകാസിതം;

ആരുപ്പേ പന സബ്ബമ്പി, രൂപായത്തം ന വിജ്ജതി.

൭൩. അസഞ്ഞീനം തു സബ്ബാനി, ചിത്താനേവ ന ലബ്ഭരേ;

രൂപക്ഖന്ധോവ തേസം തു, അത്തഭാവോതി വുച്ചതി.

൭൪. പാണാതിപാതഥേയ്യാദിവസേനോപചിതം പന;

ഉദ്ധച്ചരഹിതാപുഞ്ഞം, ചതുരാപായഭൂമിയം.

൭൫. ദത്വാ സന്ധിം പവത്തേ തു, പഞ്ചവോകാരഭൂമിയം;

ഉദ്ധച്ചസഹിതഞ്ചാപി, സത്ത പാകാനി പച്ചതി.

൭൬. ദാനസീലാദിഭേദേന, പവത്തം കുസലം പന;

കാമേ മാനസമുക്കട്ഠം, ചതുക്കം തു തിഹേതുകം.

൭൭. ദത്വാ തിഹേതുകം സന്ധിം, കാമേ സുഗതിയം പന;

സോളസ പുഞ്ഞപാകാനി, പവത്തേ തു വിപച്ചതി.

൭൮. തിഹേതുകോമകം പുഞ്ഞം, ഉക്കട്ഠഞ്ച ദ്വിഹേതുകം;

ദത്വാ ദ്വിഹേതുകം സന്ധിം, കാമേ സുഗതിയം തഥാ.

൭൯. പവത്തേ പന ഞാണേന, സമ്പയുത്തം വിവജ്ജിയ;

ദ്വാദസ പുഞ്ഞപാകാനി, വിപച്ചതി യഥാരഹം.

൮൦. ദ്വിഹേതുകോമകം പുഞ്ഞം, പടിസന്ധിമഹേതുകം;

ദേതി മാനുസകേ ചേവ, വിനിപാതാസുരേ തഥാ.

൮൧. അട്ഠാഹേതുകപാകാനി, പവത്തേ തു വിപച്ചരേ;

ചത്താരിപി ചതുക്കാനി, പഞ്ചവോകാരഭൂമിയം.

൮൨. ഭാവനാമയപുഞ്ഞം തു, മഹഗ്ഗതമനുത്തരം;

യഥാഭൂമിനിയാമേന, ദേതി പാകം യഥാസകം.

൮൩. കടത്താരൂപപാകാനി, പഞ്ചവോകാരഭൂമിയം;

ആരുപ്പാനുത്തരേ പാകം, തഥാ രൂപമസഞ്ഞിസു.

൮൪. പുഞ്ഞാപുഞ്ഞാനി കമ്മാനി, തേത്തിംസാപി ച യബ്ബഥാ;

സഞ്ജനേന്തി യഥായോഗം, പടിസന്ധിപവത്തിയം.

ഇതി ചിത്തവിഭാഗേ പകിണ്ണകകഥാ നിട്ഠിതാ.

ദുതിയോ പരിച്ഛേദോ.