൨. മല്ലികസുത്തം

൫൨൨. ഏവം മേ സുതം – ഏകം സമയം ഭഗവാ മല്ലേസു [മല്ലകേസു (സീ. സ്യാ. കം.), മല്ലികേസു (ക.)] വിഹരതി ഉരുവേലകപ്പം നാമ മല്ലാനം നിഗമോ. തത്ര ഖോ ഭഗവാ ഭിക്ഖൂ ആമന്തേസി – ‘‘യാവകീവഞ്ച, ഭിക്ഖവേ, അരിയസാവകസ്സ അരിയഞാണം ന ഉപ്പന്നം ഹോതി നേവ താവ ചതുന്നം ഇന്ദ്രിയാനം സണ്ഠിതി ഹോതി, നേവ താവ ചതുന്നം ഇന്ദ്രിയാനം അവട്ഠിതി ഹോതി. യതോ ച ഖോ, ഭിക്ഖവേ, അരിയസാവകസ്സ അരിയഞാണം ഉപ്പന്നം ഹോതി, അഥ ചതുന്നം ഇന്ദ്രിയാനം സണ്ഠിതി ഹോതി, അഥ ചതുന്നം ഇന്ദ്രിയാനം അവട്ഠിതി ഹോതി’’.

‘‘സേയ്യഥാപി, ഭിക്ഖവേ, യാവകീവഞ്ച കൂടാഗാരസ്സ കൂടം ന ഉസ്സിതം ഹോതി, നേവ താവ ഗോപാനസീനം സണ്ഠിതി ഹോതി, നേവ താവ ഗോപാനസീനം അവട്ഠിതി ഹോതി. യതോ ച ഖോ, ഭിക്ഖവേ, കൂടാഗാരസ്സ കൂടം ഉസ്സിതം ഹോതി, അഥ ഗോപാനസീനം സണ്ഠിതി ഹോതി, അഥ ഗോപാനസീനം അവട്ഠിതി ഹോതി. ഏവമേവ ഖോ, ഭിക്ഖവേ, യാവകീവഞ്ച അരിയസാവകസ്സ അരിയഞാണം ന ഉപ്പന്നം ഹോതി, നേവ താവ ചതുന്നം ഇന്ദ്രിയാനം സണ്ഠിതി ഹോതി, നേവ താവ ചതുന്നം ഇന്ദ്രിയാനം അവട്ഠിതി ഹോതി. യതോ ച ഖോ, ഭിക്ഖവേ, അരിയസാവകസ്സ അരിയഞാണം ഉപ്പന്നം ഹോതി, അഥ ചതുന്നം ഇന്ദ്രിയാനം…പേ… അവട്ഠിതി ഹോതി.

‘‘കതമേസം ചതുന്നം? സദ്ധിന്ദ്രിയസ്സ, വീരിയിന്ദ്രിയസ്സ, സതിന്ദ്രിയസ്സ, സമാധിന്ദ്രിയസ്സ. പഞ്ഞവതോ, ഭിക്ഖവേ, അരിയസാവകസ്സ തദന്വയാ സദ്ധാ സണ്ഠാതി, തദന്വയം വീരിയം സണ്ഠാതി, തദന്വയാ സതി സണ്ഠാതി, തദന്വയോ സമാധി സണ്ഠാതീ’’തി. ദുതിയം.