൪. ഉക്കചേലസുത്തം

൩൮൦. ഏകം സമയം ഭഗവാ വജ്ജീസു വിഹരതി ഉക്കചേലായം ഗങ്ഗായ നദിയാ തീരേ മഹതാ ഭിക്ഖുസങ്ഘേന സദ്ധിം അചിരപരിനിബ്ബുതേസു സാരിപുത്തമോഗ്ഗല്ലാനേസു. തേന ഖോ പന സമയേന ഭഗവാ ഭിക്ഖുസങ്ഘപരിവുതോ അജ്ഝോകാസേ നിസിന്നോ ഹോതി.

അഥ ഖോ ഭഗവാ തുണ്ഹീഭൂതം ഭിക്ഖുസങ്ഘം അനുവിലോകേത്വാ ഭിക്ഖൂ ആമന്തേസി – ‘‘അപി മ്യായം, ഭിക്ഖവേ, പരിസാ സുഞ്ഞാ വിയ ഖായതി പരിനിബ്ബുതേസു സാരിപുത്തമോഗ്ഗല്ലാനേസു. അസുഞ്ഞാ മേ, ഭിക്ഖവേ, പരിസാ ഹോതി, അനപേക്ഖാ തസ്സം ദിസായം ഹോതി, യസ്സം ദിസായം സാരിപുത്തമോഗ്ഗല്ലാനാ വിഹരന്തി. യേ ഹി തേ, ഭിക്ഖവേ, അഹേസും അതീതമദ്ധാനം അരഹന്തോ സമ്മാസമ്ബുദ്ധാ, തേസമ്പി ഭഗവന്താനം ഏതപ്പരമംയേവ സാവകയുഗം [ഏതപരമംയേവ (സീ. സ്യാ. കം. പീ.)] അഹോസി – സേയ്യഥാപി മയ്ഹം സാരിപുത്തമോഗ്ഗല്ലാനാ. യേപി തേ, ഭിക്ഖവേ, ഭവിസ്സന്തി അനാഗതമദ്ധാനം അരഹന്തോ സമ്മാസമ്ബുദ്ധാ, തേസമ്പി ഭഗവന്താനം ഏതപ്പരമംയേവ സാവകയുഗം ഭവിസ്സതി – സേയ്യഥാപി മയ്ഹം സാരിപുത്തമോഗ്ഗല്ലാനാ. അച്ഛരിയം, ഭിക്ഖവേ, സാവകാനം! അബ്ഭുതം, ഭിക്ഖവേ, സാവകാനം! സത്ഥു ച നാമ സാസനകരാ ഭവിസ്സന്തി ഓവാദപ്പടികരാ, ചതുന്നഞ്ച പരിസാനം പിയാ ഭവിസ്സന്തി മനാപാ ഗരുഭാവനീയാ ച! അച്ഛരിയം, ഭിക്ഖവേ, തഥാഗതസ്സ, അബ്ഭുതം, ഭിക്ഖവേ, തഥാഗതസ്സ! ഏവരൂപേപി നാമ സാവകയുഗേ പരിനിബ്ബുതേ നത്ഥി തഥാഗതസ്സ സോകോ വാ പരിദേവോ വാ! തം കുതേത്ഥ, ഭിക്ഖവേ, ലബ്ഭാ! യം തം ജാതം ഭൂതം സങ്ഖതം പലോകധമ്മം, തം വത മാ പലുജ്ജീതി – നേതം ഠാനം വിജ്ജതി. സേയ്യഥാപി, ഭിക്ഖവേ, മഹതോ രുക്ഖസ്സ തിട്ഠതോ സാരവതോ യേ മഹന്തതരാ ഖന്ധാ തേ പലുജ്ജേയ്യും; ഏവമേവ ഖോ, ഭിക്ഖവേ, മഹതോ ഭിക്ഖുസങ്ഘസ്സ തിട്ഠതോ സാരവതോ സാരിപുത്തമോഗ്ഗല്ലാനാ പരിനിബ്ബുതാ. തം കുതേത്ഥ, ഭിക്ഖവേ, ലബ്ഭാ! യം തം ജാതം ഭൂതം സങ്ഖതം പലോകധമ്മം, തം വത മാ പലുജ്ജീതി – നേതം ഠാനം വിജ്ജതി. തസ്മാതിഹ, ഭിക്ഖവേ, അത്തദീപാ വിഹരഥ അത്തസരണാ അനഞ്ഞസരണാ, ധമ്മദീപാ ധമ്മസരണാ അനഞ്ഞസരണാ.

‘‘കഥഞ്ച, ഭിക്ഖവേ, ഭിക്ഖു അത്തദീപോ വിഹരതി അത്തസരണോ അനഞ്ഞസരണോ, ധമ്മദീപോ ധമ്മസരണോ അനഞ്ഞസരണോ? ഇധ, ഭിക്ഖവേ, ഭിക്ഖു കായേ കായാനുപസ്സീ വിഹരതി ആതാപീ സമ്പജാനോ സതിമാ, വിനേയ്യ ലോകേ അഭിജ്ഝാദോമനസ്സം; വേദനാസു…പേ… ചിത്തേ…പേ… ധമ്മേസു ധമ്മാനുപസ്സീ വിഹരതി ആതാപീ സമ്പജാനോ സതിമാ, വിനേയ്യ ലോകേ അഭിജ്ഝാദോമനസ്സം. ഏവം ഖോ, ഭിക്ഖവേ, ഭിക്ഖു അത്തദീപോ വിഹരതി അത്തസരണോ അനഞ്ഞസരണോ, ധമ്മദീപോ ധമ്മസരണോ അനഞ്ഞസരണോ. യേ ഹി കേചി, ഭിക്ഖവേ, ഏതരഹി വാ മമച്ചയേ വാ അത്തദീപാ വിഹരിസ്സന്തി അത്തസരണാ അനഞ്ഞസരണാ, ധമ്മദീപാ ധമ്മസരണാ അനഞ്ഞസരണാ; തമതഗ്ഗേ മേതേ, ഭിക്ഖവേ, ഭിക്ഖൂ ഭവിസ്സന്തി യേ കേചി സിക്ഖാകാമാ’’തി. ചതുത്ഥം.