൧൦. ദുതിയസിനേരുപബ്ബതരാജസുത്തം

൧൧൨൦. ‘‘സേയ്യഥാപി, ഭിക്ഖവേ, സിനേരുപബ്ബതരാജായം പരിക്ഖയം പരിയാദാനം ഗച്ഛേയ്യ, ഠപേത്വാ സത്ത മുഗ്ഗമത്തിയോ പാസാണസക്ഖരാ. തം കിം മഞ്ഞഥ, ഭിക്ഖവേ, കതമം നു ഖോ ബഹുതരം – യം വാ സിനേരുസ്സ പബ്ബതരാജസ്സ പരിക്ഖീണം പരിയാദിന്നം, യാ വാ സത്ത മുഗ്ഗമത്തിയോ പാസാണസക്ഖരാ അവസിട്ഠാ’’തി? ‘‘ഏതദേവ, ഭന്തേ, ബഹുതരം സിനേരുസ്സ പബ്ബതരാജസ്സ യദിദം പരിക്ഖീണം പരിയാദിന്നം; അപ്പമത്തികാ സത്ത മുഗ്ഗമത്തിയോ പാസാണസക്ഖരാ അവസിട്ഠാ. സങ്ഖമ്പി ന ഉപേന്തി, ഉപനിധമ്പി ന ഉപേന്തി, കലഭാഗമ്പി ന ഉപേന്തി സിനേരുസ്സ പബ്ബതരാജസ്സ പരിക്ഖീണം പരിയാദിന്നം ഉപനിധായ സത്ത മുഗ്ഗമത്തിയോ പാസാണസക്ഖരാ അവസിട്ഠാ’’തി. ‘‘ഏവമേവ ഖോ, ഭിക്ഖവേ, അരിയസാവകസ്സ ദിട്ഠിസമ്പന്നസ്സ പുഗ്ഗലസ്സ അഭിസമേതാവിനോ ഏതദേവ ബഹുതരം ദുക്ഖം യദിദം പരിക്ഖീണം പരിയാദിന്നം; അപ്പമത്തകം അവസിട്ഠം. സങ്ഖമ്പി ന ഉപേതി, ഉപനിധമ്പി ന ഉപേതി, കലഭാഗമ്പി ന ഉപേതി, പുരിമം ദുക്ഖക്ഖന്ധം പരിക്ഖീണം പരിയാദിന്നം ഉപനിധായ യദിദം സത്തക്ഖത്തുപരമതാ; യോ ‘ഇദം ദുക്ഖ’ന്തി യഥാഭൂതം പജാനാതി…പേ… ‘അയം ദുക്ഖനിരോധഗാമിനീ പടിപദാ’തി യഥാഭൂതം പജാനാതി’’.

‘‘തസ്മാതിഹ, ഭിക്ഖവേ, ‘ഇദം ദുക്ഖ’ന്തി യോഗോ കരണീയോ…പേ… ‘അയം ദുക്ഖനിരോധഗാമിനീ പടിപദാ’തി യോഗോ കരണീയോ’’തി. ദസമം.

പപാതവഗ്ഗോ പഞ്ചമോ.

തസ്സുദ്ദാനം –

ചിന്താ പപാതോ പരിളാഹോ, കൂടം വാലന്ധകാരോ ച;

ഛിഗ്ഗളേന ച ദ്വേ വുത്താ, സിനേരു അപരേ ദുവേതി.