൪. പഠമദേവപദസുത്തം

൧൦൩൦. സാവത്ഥിനിദാനം. ചത്താരിമാനി, ഭിക്ഖവേ, ദേവാനം ദേവപദാനി അവിസുദ്ധാനം സത്താനം വിസുദ്ധിയാ അപരിയോദാതാനം സത്താനം പരിയോദപനായ.

കതമാനി ചത്താരി? ഇധ, ഭിക്ഖവേ, അരിയസാവകോ ബുദ്ധേ അവേച്ചപ്പസാദേന സമന്നാഗതോ ഹോതി – ഇതിപി സോ ഭഗവാ…പേ… സത്ഥാ ദേവമനുസ്സാനം ബുദ്ധോ ഭഗവാതി. ഇദം പഠമം ദേവാനം ദേവപദം അവിസുദ്ധാനം സത്താനം വിസുദ്ധിയാ അപരിയോദാതാനം സത്താനം പരിയോദപനായ.

‘‘പുന ചപരം, ഭിക്ഖവേ, അരിയസാവകോ ധമ്മേ…പേ… സങ്ഘേ…പേ….

‘‘പുന ചപരം, ഭിക്ഖവേ, അരിയസാവകോ അരിയകന്തേഹി സീലേഹി സമന്നാഗതോ ഹോതി അഖണ്ഡേഹി…പേ… സമാധിസംവത്തനികേഹി. ഇദം ചതുത്ഥം ദേവാനം ദേവപദം അവിസുദ്ധാനം സത്താനം വിസുദ്ധിയാ അപരിയോദാതാനം സത്താനം പരിയോദപനായ. ഇമാനി ഖോ, ഭിക്ഖവേ, ചത്താരി ദേവാനം ദേവപദാനി അവിസുദ്ധാനം സത്താനം വിസുദ്ധിയാ അപരിയോദാതാനം സത്താനം പരിയോദപനായാ’’തി. ചതുത്ഥം.