൧൩. ഭവപഞ്ഹാസുത്തം

൩൨൬. ‘‘‘ഭവോ, ഭവോ’തി, ആവുസോ സാരിപുത്ത, വുച്ചതി. കതമോ നു ഖോ, ആവുസോ, ഭവോ’’തി? ‘‘തയോ മേ, ആവുസോ, ഭവാ. കാമഭവോ, രൂപഭവോ, അരൂപഭവോ – ഇമേ ഖോ, ആവുസോ, തയോ ഭവാ’’തി. ‘‘അത്ഥി പനാവുസോ, മഗ്ഗോ അത്ഥി പടിപദാ, ഏതേസം ഭവാനം പരിഞ്ഞായാ’’തി? ‘‘അത്ഥി ഖോ, ആവുസോ, മഗ്ഗോ അത്ഥി പടിപദാ, ഏതേസം ഭവാനം പരിഞ്ഞായാ’’തി. ‘‘കതമോ, പനാവുസോ, മഗ്ഗോ കതമാ പടിപദാ, ഏതേസം ഭവാനം പരിഞ്ഞായാ’’തി? ‘‘അയമേവ ഖോ, ആവുസോ, അരിയോ അട്ഠങ്ഗികോ മഗ്ഗോ, ഏതേസം ഭവാനം പരിഞ്ഞായ, സേയ്യഥിദം – സമ്മാദിട്ഠി സമ്മാസങ്കപ്പോ സമ്മാവാചാ സമ്മാകമ്മന്തോ സമ്മാആജീവോ സമ്മാവായാമോ സമ്മാസതി സമ്മാസമാധി. അയം ഖോ, ആവുസോ, മഗ്ഗോ അയം പടിപദാ, ഏതേസം ഭവാനം പരിഞ്ഞായാ’’തി. ‘‘ഭദ്ദകോ, ആവുസോ, മഗ്ഗോ ഭദ്ദികാ പടിപദാ, ഏതേസം ഭവാനം പരിഞ്ഞായ. അലഞ്ച പനാവുസോ സാരിപുത്ത, അപ്പമാദായാ’’തി. തേരസമം.