൧൨. ഉപാദാനപഞ്ഹാസുത്തം

൩൨൫. ‘‘‘ഉപാദാനം, ഉപാദാന’ന്തി, ആവുസോ സാരിപുത്ത, വുച്ചതി. കതമം നു ഖോ, ആവുസോ, ഉപാദാന’’ന്തി? ‘‘ചത്താരിമാനി, ആവുസോ, ഉപാദാനാനി. കാമുപാദാനം, ദിട്ഠുപാദാനം സീലബ്ബതുപാദാനം, അത്തവാദുപാദാനം – ഇമാനി ഖോ, ആവുസോ, ചത്താരി ഉപാദാനാനീ’’തി. ‘‘അത്ഥി പനാവുസോ, മഗ്ഗോ അത്ഥി പടിപദാ, ഏതേസം ഉപാദാനാനം പഹാനായാ’’തി? ‘‘അത്ഥി ഖോ, ആവുസോ, മഗ്ഗോ അത്ഥി പടിപദാ, ഏതേസം ഉപാദാനാനം പഹാനായാ’’തി. ‘‘കതമോ പനാവുസോ, മഗ്ഗോ കതമാ പടിപദാ, ഏതേസം ഉപാദാനാനം പഹാനായാ’’തി? ‘‘അയമേവ ഖോ, ആവുസോ, അരിയോ അട്ഠങ്ഗികോ മഗ്ഗോ, ഏതേസം ഉപാദാനാനം പഹാനായ, സേയ്യഥിദം – സമ്മാദിട്ഠി സമ്മാസങ്കപ്പോ സമ്മാവാചാ സമ്മാകമ്മന്തോ സമ്മാആജീവോ സമ്മാവായാമോ സമ്മാസതി സമ്മാസമാധി. അയം ഖോ, ആവുസോ, മഗ്ഗോ അയം പടിപദാ, ഏതേസം ഉപാദാനാനം പഹാനായാ’’തി. ‘‘ഭദ്ദകോ, ആവുസോ, മഗ്ഗോ ഭദ്ദികാ പടിപദാ, ഏതേസം ഉപാദാനാനം പഹാനായ. അലഞ്ച പനാവുസോ സാരിപുത്ത, അപ്പമാദായാ’’തി. ദ്വാദസമം.