൬. ജീവകമ്ബവനപടിസല്ലാനസുത്തം

൧൬൧. ഏകം സമയം ഭഗവാ രാജഗഹേ വിഹരതി ജീവകമ്ബവനേ. തത്ര ഖോ ഭഗവാ ഭിക്ഖൂ ആമന്തേസി…പേ… ‘‘പടിസല്ലാനേ, ഭിക്ഖവേ, യോഗമാപജ്ജഥ. പടിസല്ലീനസ്സ, ഭിക്ഖവേ, ഭിക്ഖുനോ യഥാഭൂതം ഓക്ഖായതി. കിഞ്ച യഥാഭൂതം ഓക്ഖായതി? ചക്ഖും അനിച്ചന്തി യഥാഭൂതം ഓക്ഖായതി, രൂപാ അനിച്ചാതി യഥാഭൂതം ഓക്ഖായതി, ചക്ഖുവിഞ്ഞാണം അനിച്ചന്തി യഥാഭൂതം ഓക്ഖായതി, ചക്ഖുസമ്ഫസ്സോ അനിച്ചോതി യഥാഭൂതം ഓക്ഖായതി, യമ്പിദം ചക്ഖുസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചന്തി യഥാഭൂതം ഓക്ഖായതി…പേ… മനോ അനിച്ചോതി യഥാഭൂതം ഓക്ഖായതി, ധമ്മാ… മനോവിഞ്ഞാണം… മനോസമ്ഫസ്സോ… യമ്പിദം മനോസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചന്തി യഥാഭൂതം ഓക്ഖായതി. പടിസല്ലാനേ ഭിക്ഖവേ, യോഗമാപജ്ജഥ. പടിസല്ലീനസ്സ, ഭിക്ഖവേ, ഭിക്ഖുനോ യഥാഭൂതം ഓക്ഖായതീ’’തി. ഛട്ഠം.