൭. കോട്ഠികഅനിച്ചസുത്തം

൧൬൨. അഥ ഖോ ആയസ്മാ മഹാകോട്ഠികോ യേന ഭഗവാ തേനുപസങ്കമി…പേ… ഏകമന്തം നിസിന്നോ ഖോ ആയസ്മാ കോട്ഠികോ ഭഗവന്തം ഏതദവോച – ‘‘സാധു മേ, ഭന്തേ, ഭഗവാ സംഖിത്തേന ധമ്മം ദേസേതു, യമഹം ഭഗവതോ ധമ്മം സുത്വാ ഏകോ വൂപകട്ഠോ അപ്പമത്തോ ആതാപീ പഹിതത്തോ വിഹരേയ്യ’’ന്തി.

‘‘യം ഖോ, കോട്ഠിക, അനിച്ചം തത്ര തേ ഛന്ദോ പഹാതബ്ബോ. കിഞ്ച, കോട്ഠിക, അനിച്ചം? ചക്ഖു ഖോ, കോട്ഠിക, അനിച്ചം; തത്ര തേ ഛന്ദോ പഹാതബ്ബോ. രൂപാ അനിച്ചാ; തത്ര തേ ഛന്ദോ പഹാതബ്ബോ. ചക്ഖുവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. ചക്ഖുസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം ചക്ഖുസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ…പേ… ജിവ്ഹാ അനിച്ചാ; തത്ര തേ ഛന്ദോ പഹാതബ്ബോ. രസാ അനിച്ചാ; തത്ര തേ ഛന്ദോ പഹാതബ്ബോ. ജിവ്ഹാവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. ജിവ്ഹാസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം ജിവ്ഹാസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ…പേ… മനോ അനിച്ചോ; തത്ര തേ ഛന്ദോ പഹാതബ്ബോ. ധമ്മാ അനിച്ചാ; തത്ര തേ ഛന്ദോ പഹാതബ്ബോ. മനോവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. മനോസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം മനോസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ. യം ഖോ, കോട്ഠിക, അനിച്ചം തത്ര തേ ഛന്ദോ പഹാതബ്ബോ’’തി. സത്തമം.