൧൦. ഉദകസുത്തം

൧൦൩. ‘‘ഉദകോ [ഉദ്ദകോ (സീ. പീ.)] സുദം, ഭിക്ഖവേ, രാമപുത്തോ ഏവം വാചം ഭാസതി – ‘ഇദം ജാതു വേദഗൂ, ഇദം ജാതു സബ്ബജീ [സബ്ബജി (പീ.)], ഇദം ജാതു അപലിഖതം ഗണ്ഡമൂലം പലിഖണി’ന്തി. തം ഖോ പനേതം, ഭിക്ഖവേ, ഉദകോ രാമപുത്തോ അവേദഗൂയേവ സമാനോ ‘വേദഗൂസ്മീ’തി ഭാസതി, അസബ്ബജീയേവ സമാനോ ‘സബ്ബജീസ്മീ’തി ഭാസതി, അപലിഖതംയേവ ഗണ്ഡമൂലം പലിഖതം മേ ‘ഗണ്ഡമൂല’ന്തി ഭാസതി. ഇധ ഖോ തം, ഭിക്ഖവേ, ഭിക്ഖു സമ്മാ വദമാനോ വദേയ്യ – ‘ഇദം ജാതു വേദഗൂ, ഇദം ജാതു സബ്ബജീ, ഇദം ജാതു അപലിഖതം ഗണ്ഡമൂലം പലിഖണി’’’ന്തി.

‘‘കഥഞ്ച, ഭിക്ഖവേ, വേദഗൂ ഹോതി? യതോ ഖോ, ഭിക്ഖവേ, ഭിക്ഖു ഛന്നം ഫസ്സായതനാനം സമുദയഞ്ച അത്ഥങ്ഗമഞ്ച അസ്സാദഞ്ച ആദീനവഞ്ച നിസ്സരണഞ്ച യഥാഭൂതം പജാനാതി; ഏവം ഖോ, ഭിക്ഖവേ, ഭിക്ഖു വേദഗൂ ഹോതി.

‘‘കഥഞ്ച, ഭിക്ഖവേ, ഭിക്ഖു സബ്ബജീ ഹോതി? യതോ ഖോ, ഭിക്ഖവേ, ഭിക്ഖു ഛന്നം ഫസ്സായതനാനം സമുദയഞ്ച അത്ഥങ്ഗമഞ്ച അസ്സാദഞ്ച ആദീനവഞ്ച നിസ്സരണഞ്ച യഥാഭൂതം വിദിത്വാ അനുപാദാവിമുത്തോ ഹോതി; ഏവം ഖോ, ഭിക്ഖവേ, ഭിക്ഖു സബ്ബജീ ഹോതി.

‘‘കഥഞ്ച, ഭിക്ഖവേ, ഭിക്ഖുനോ അപലിഖതം ഗണ്ഡമൂലം പലിഖതം ഹോതി? ഗണ്ഡോതി ഖോ, ഭിക്ഖവേ, ഇമസ്സേതം ചാതുമഹാഭൂതികസ്സ കായസ്സ അധിവചനം മാതാപേത്തികസമ്ഭവസ്സ ഓദനകുമ്മാസൂപചയസ്സ അനിച്ചുച്ഛാദനപരിമദ്ദനഭേദനവിദ്ധംസനധമ്മസ്സ. ഗണ്ഡമൂലന്തി ഖോ, ഭിക്ഖവേ, തണ്ഹായേതം അധിവചനം. യതോ ഖോ, ഭിക്ഖവേ, ഭിക്ഖുനോ തണ്ഹാ പഹീനാ ഹോതി ഉച്ഛിന്നമൂലാ താലാവത്ഥുകതാ അനഭാവങ്കതാ ആയതിം അനുപ്പാദധമ്മാ; ഏവം ഖോ, ഭിക്ഖവേ, ഭിക്ഖുനോ അപലിഖതം ഗണ്ഡമൂലം പലിഖതം ഹോതി.

‘‘ഉദകോ സുദം, ഭിക്ഖവേ, രാമപുത്തോ ഏവം വാചം ഭാസതി – ‘ഇദം ജാതു വേദഗൂ, ഇദം ജാതു സബ്ബജീ, ഇദം ജാതു അപലിഖതം ഗണ്ഡമൂലം പലിഖണി’ന്തി. തം ഖോ പനേതം, ഭിക്ഖവേ, ഉദകോ രാമപുത്തോ അവേദഗൂയേവ സമാനോ ‘വേദഗൂസ്മീ’തി ഭാസതി, അസബ്ബജീയേവ സമാനോ ‘സബ്ബജീസ്മീ’തി ഭാസതി; അപലിഖതംയേവ ഗണ്ഡമൂലം ‘പലിഖതം മേ ഗണ്ഡമൂല’ന്തി ഭാസതി. ഇധ ഖോ തം, ഭിക്ഖവേ, ഭിക്ഖു സമ്മാ വദമാനോ വദേയ്യ – ‘ഇദം ജാതു വേദഗൂ, ഇദം ജാതു സബ്ബജീ, ഇദം ജാതു അപലിഖതം ഗണ്ഡമൂലം പലിഖണി’’’ന്തി. ദസമം.

സളവഗ്ഗോ ദസമോ.

തസ്സുദ്ദാനം –

ദ്വേ സംഗയ്ഹാ പരിഹാനം, പമാദവിഹാരീ ച സംവരോ;

സമാധി പടിസല്ലാനം, ദ്വേ നതുമ്ഹാകേന ഉദ്ദകോതി.

സളായതനവഗ്ഗേ ദുതിയപണ്ണാസകോ സമത്തോ.

തസ്സ വഗ്ഗുദ്ദാനം –

അവിജ്ജാ മിഗജാലഞ്ച, ഗിലാനം ഛന്നം ചതുത്ഥകം;

സളവഗ്ഗേന പഞ്ഞാസം, ദുതിയോ പണ്ണാസകോ അയന്തി.

പഠമസതകം.