൭. ഗദ്ദുലബദ്ധസുത്തം

൯൯. സാവത്ഥിനിദാനം. ‘‘അനമതഗ്ഗോയം, ഭിക്ഖവേ, സംസാരോ. പുബ്ബാ കോടി ന പഞ്ഞായതി അവിജ്ജാനീവരണാനം സത്താനം തണ്ഹാസംയോജനാനം സന്ധാവതം സംസരതം. ഹോതി സോ, ഭിക്ഖവേ, സമയോ യം മഹാസമുദ്ദോ ഉസ്സുസ്സതി വിസുസ്സതി ന ഭവതി; ന ത്വേവാഹം, ഭിക്ഖവേ, അവിജ്ജാനീവരണാനം സത്താനം തണ്ഹാസംയോജനാനം സന്ധാവതം സംസരതം ദുക്ഖസ്സ അന്തകിരിയം വദാമി. ഹോതി സോ, ഭിക്ഖവേ, സമയോ യം സിനേരു പബ്ബതരാജാ ഡയ്ഹതി വിനസ്സതി ന ഭവതി; ന ത്വേവാഹം, ഭിക്ഖവേ, അവിജ്ജാനീവരണാനം സത്താനം തണ്ഹാസംയോജനാനം സന്ധാവതം സംസരതം ദുക്ഖസ്സ അന്തകിരിയം വദാമി. ഹോതി സോ, ഭിക്ഖവേ, സമയോ യം മഹാപഥവീ ഡയ്ഹതി വിനസ്സതി ന ഭവതി; ന ത്വേവാഹം, ഭിക്ഖവേ, അവിജ്ജാനീവരണാനം സത്താനം തണ്ഹാസംയോജനാനം സന്ധാവതം സംസരതം ദുക്ഖസ്സ അന്തകിരിയം വദാമി’’.

‘‘സേയ്യഥാപി, ഭിക്ഖവേ, സാ ഗദ്ദുലബദ്ധോ [ഗദ്ദൂലബന്ധോ (സ്യാ. കം.)] ദള്ഹേ ഖീലേ വാ ഥമ്ഭേ വാ ഉപനിബദ്ധോ തമേവ ഖീലം വാ ഥമ്ഭം വാ അനുപരിധാവതി അനുപരിവത്തതി; ഏവമേവ ഖോ, ഭിക്ഖവേ, അസ്സുതവാ പുഥുജ്ജനോ അരിയാനം അദസ്സാവീ…പേ… സപ്പുരിസധമ്മേ അവിനീതോ രൂപം അത്തതോ സമനുപസ്സതി…പേ… വേദനം അത്തതോ സമനുപസ്സതി… സഞ്ഞം അത്തതോ സമനുപസ്സതി… സങ്ഖാരേ അത്തതോ സമനുപസ്സതി… വിഞ്ഞാണം അത്തതോ സമനുപസ്സതി, വിഞ്ഞാണവന്തം വാ അത്താനം; അത്തനി വാ വിഞ്ഞാണം, വിഞ്ഞാണസ്മിം വാ അത്താനം. സോ രൂപഞ്ഞേവ അനുപരിധാവതി അനുപരിവത്തതി, വേദനഞ്ഞേവ…പേ… സഞ്ഞഞ്ഞേവ… സങ്ഖാരേയേവ… വിഞ്ഞാണഞ്ഞേവ അനുപരിധാവതി അനുപരിവത്തതി. സോ രൂപം അനുപരിധാവം അനുപരിവത്തം, വേദനം…പേ… സഞ്ഞം… സങ്ഖാരേ… വിഞ്ഞാണം അനുപരിധാവം അനുപരിവത്തം, ന പരിമുച്ചതി രൂപമ്ഹാ, ന പരിമുച്ചതി വേദനായ, ന പരിമുച്ചതി സഞ്ഞായ, ന പരിമുച്ചതി സങ്ഖാരേഹി, ന പരിമുച്ചതി വിഞ്ഞാണമ്ഹാ, ന പരിമുച്ചതി ജാതിയാ ജരാമരണേന സോകേഹി പരിദേവേഹി ദുക്ഖേഹി ദോമനസ്സേഹി ഉപായാസേഹി. ‘ന പരിമുച്ചതി ദുക്ഖസ്മാ’തി വദാമി’’.

‘‘സുതവാ ച ഖോ, ഭിക്ഖവേ, അരിയസാവകോ അരിയാനം ദസ്സാവീ…പേ… സപ്പുരിസധമ്മേ സുവിനീതോ, ന രൂപം അത്തതോ സമനുപസ്സതി…പേ… ന വേദനം… ന സഞ്ഞം… ന സങ്ഖാരേ… ന വിഞ്ഞാണം അത്തതോ സമനുപസ്സതി, ന വിഞ്ഞാണവന്തം വാ അത്താനം; ന അത്തനി വാ വിഞ്ഞാണം, ന വിഞ്ഞാണസ്മിം വാ അത്താനം. സോ രൂപം നാനുപരിധാവതി നാനുപരിവത്തതി, വേദനം… സഞ്ഞം… സങ്ഖാരേ… വിഞ്ഞാണം നാനുപരിധാവതി നാനുപരിവത്തതി. സോ രൂപം അനനുപരിധാവം അനനുപരിവത്തം, വേദനം… സഞ്ഞം… സങ്ഖാരേ… വിഞ്ഞാണം അനനുപരിധാവം അനനുപരിവത്തം; പരിമുച്ചതി രൂപമ്ഹാ, പരിമുച്ചതി വേദനായ, പരിമുച്ചതി സഞ്ഞായ, പരിമുച്ചതി സങ്ഖാരേഹി, പരിമുച്ചതി വിഞ്ഞാണമ്ഹാ, പരിമുച്ചതി ജാതിയാ ജരാമരണേന സോകേഹി പരിദേവേഹി ദുക്ഖേഹി ദോമനസ്സേഹി ഉപായാസേഹി. ‘പരിമുച്ചതി ദുക്ഖസ്മാ’തി വദാമീ’’തി. സത്തമം.