൧൦. അനിച്ചസഞ്ഞാസുത്തം

൧൦൨. സാവത്ഥിനിദാനം. ‘‘അനിച്ചസഞ്ഞാ, ഭിക്ഖവേ, ഭാവിതാ ബഹുലീകതാ സബ്ബം കാമരാഗം പരിയാദിയതി, സബ്ബം രൂപരാഗം പരിയാദിയതി, സബ്ബം ഭവരാഗം പരിയാദിയതി, സബ്ബം അവിജ്ജം പരിയാദിയതി, സബ്ബം അസ്മിമാനം സമൂഹനതി’’.

‘‘സേയ്യഥാപി, ഭിക്ഖവേ, സരദസമയേ കസ്സകോ മഹാനങ്ഗലേന കസന്തോ സബ്ബാനി മൂലസന്താനകാനി സമ്പദാലേന്തോ കസതി; ഏവമേവ ഖോ, ഭിക്ഖവേ, അനിച്ചസഞ്ഞാ ഭാവിതാ ബഹുലീകതാ സബ്ബം കാമരാഗം പരിയാദിയതി, സബ്ബം രൂപരാഗം പരിയാദിയതി, സബ്ബം ഭവരാഗം പരിയാദിയതി, സബ്ബം അവിജ്ജം പരിയാദിയതി, സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, പബ്ബജലായകോ പബ്ബജം ലായിത്വാ അഗ്ഗേ ഗഹേത്വാ ഓധുനാതി നിദ്ധുനാതി നിച്ഛോടേതി; ഏവമേവ ഖോ, ഭിക്ഖവേ, അനിച്ചസഞ്ഞാ ഭാവിതാ ബഹുലീകതാ സബ്ബം കാമരാഗം പരിയാദിയതി…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, അമ്ബപിണ്ഡിയാ വണ്ടച്ഛിന്നായ യാനി തത്ഥ അമ്ബാനി വണ്ടപടിബന്ധാനി സബ്ബാനി താനി തദന്വയാനി ഭവന്തി; ഏവമേവ ഖോ, ഭിക്ഖവേ, അനിച്ചസഞ്ഞാ ഭാവിതാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, കൂടാഗാരസ്സ യാ കാചി ഗോപാനസിയോ സബ്ബാ താ കൂടങ്ഗമാ കൂടനിന്നാ കൂടസമോസരണാ, കൂടം താസം അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ ഭാവിതാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, യേ കേചി മൂലഗന്ധാ കാളാനുസാരിഗന്ധോ തേസം അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, യേ കേചി സാരഗന്ധാ, ലോഹിതചന്ദനം തേസം അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, യേ കേചി പുപ്ഫഗന്ധാ, വസ്സികം തേസം അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, യേ കേചി കുട്ടരാജാനോ [കുഡ്ഡരാജാനോ (സീ.)], സബ്ബേതേ രഞ്ഞോ ചക്കവത്തിസ്സ അനുയന്താ ഭവന്തി, രാജാ തേസം ചക്കവത്തി അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, യാ കാചി താരകരൂപാനം പഭാ, സബ്ബാ താ ചന്ദിമപ്പഭായ കലം നാഗ്ഘന്തി സോളസിം, ചന്ദപ്പഭാ താസം അഗ്ഗമക്ഖായതി; ഏവമേവ ഖോ, ഭിക്ഖവേ, അനിച്ചസഞ്ഞാ…പേ… സബ്ബം അസ്മിമാനം സമൂഹനതി.

‘‘സേയ്യഥാപി, ഭിക്ഖവേ, സരദസമയേ വിദ്ധേ വിഗതവലാഹകേ ദേവേ ആദിച്ചോ നതം അബ്ഭുസ്സക്കമാനോ, സബ്ബം ആകാസഗതം തമഗതം അഭിവിഹച്ച ഭാസതേ ച തപതേ ച വിരോചതേ ച; ഏവമേവ ഖോ, ഭിക്ഖവേ, അനിച്ചസഞ്ഞാ ഭാവിതാ ബഹുലീകതാ സബ്ബം കാമരാഗം പരിയാദിയതി, സബ്ബം രൂപരാഗം പരിയാദിയതി, സബ്ബം ഭവരാഗം പരിയാദിയതി, സബ്ബം അവിജ്ജം പരിയാദിയതി, സബ്ബം അസ്മിമാനം സമൂഹനതി.

‘‘കഥം ഭാവിതാ ച, ഭിക്ഖവേ, അനിച്ചസഞ്ഞാ കഥം ബഹുലീകതാ സബ്ബം കാമരാഗം പരിയാദിയതി…പേ… സബ്ബം അസ്മിമാനം സമൂഹനതി? ‘ഇതി രൂപം, ഇതി രൂപസ്സ സമുദയോ, ഇതി രൂപസ്സ അത്ഥങ്ഗമോ; ഇതി വേദനാ… ഇതി സഞ്ഞാ… ഇതി സങ്ഖാരാ… ഇതി വിഞ്ഞാണം, ഇതി വിഞ്ഞാണസ്സ സമുദയോ, ഇതി വിഞ്ഞാണസ്സ അത്ഥങ്ഗമോ’തി – ഏവം ഭാവിതാ ഖോ, ഭിക്ഖവേ, അനിച്ചസഞ്ഞാ ഏവം ബഹുലീകതാ സബ്ബം കാമരാഗം പരിയാദിയതി, സബ്ബം രൂപരാഗം പരിയാദിയതി, സബ്ബം ഭവരാഗം പരിയാദിയതി, സബ്ബം അവിജ്ജം പരിയാദിയതി, സബ്ബം അസ്മിമാനം സമൂഹനതീ’’തി. ദസമം.

പുപ്ഫവഗ്ഗോ ദസമോ.

തസ്സുദ്ദാനം –

നദീ പുപ്ഫഞ്ച ഫേണഞ്ച, ഗോമയഞ്ച നഖാസിഖം;

സുദ്ധികം ദ്വേ ച ഗദ്ദുലാ, വാസീജടം അനിച്ചതാതി.

മജ്ഝിമപണ്ണാസകോ സമത്തോ.

തസ്സ മജ്ഝിമപണ്ണാസകസ്സ വഗ്ഗുദ്ദാനം –

ഉപയോ അരഹന്തോ ച, ഖജ്ജനീ ഥേരസവ്ഹയം;

പുപ്ഫവഗ്ഗേന പണ്ണാസ, ദുതിയോ തേന വുച്ചതീതി.