൧൨. ദുതിയസിങ്ഗാലസുത്തം

൨൩൪. സാവത്ഥിയം വിഹരതി…പേ… ‘‘അസ്സുത്ഥ നോ തുമ്ഹേ, ഭിക്ഖവേ, രത്തിയാ പച്ചൂസസമയം ജരസിങ്ഗാലസ്സ വസ്സമാനസ്സാ’’തി? ‘‘ഏവം, ഭന്തേ’’. ‘‘സിയാ ഖോ, ഭിക്ഖവേ, തസ്മിം ജരസിങ്ഗാലേ യാ കാചി കതഞ്ഞുതാ കതവേദിതാ, ന ത്വേവ ഇധേകച്ചേ സക്യപുത്തിയപടിഞ്ഞേ സിയാ യാ കാചി കതഞ്ഞുതാ കതവേദിതാ. തസ്മാതിഹ, ഭിക്ഖവേ, ഏവം സിക്ഖിതബ്ബം – ‘കതഞ്ഞുനോ ഭവിസ്സാമ കതവേദിനോ; ന ച നോ [ന ച നോതി ഇദം സീ. പീ. പോത്ഥകേസു നത്ഥി] അമ്ഹേസു അപ്പകമ്പി കതം നസ്സിസ്സതീ’തി [മാ നസ്സിസ്സതീതി (സീ. പീ.), വിനസ്സിസ്സതീതി (സ്യാ. കം.)]. ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി. ദ്വാദസമം.

ഓപമ്മസംയുത്തം സമത്തം.