൩. ഏകപുത്തകസുത്തം

൧൭൨. സാവത്ഥിയം വിഹരതി…പേ… ‘‘ദാരുണോ, ഭിക്ഖവേ, ലാഭസക്കാരസിലോകോ…പേ… സദ്ധാ, ഭിക്ഖവേ, ഉപാസികാ ഏകപുത്തകം പിയം മനാപം ഏവം സമ്മാ ആയാചമാനാ ആയാചേയ്യ – ‘താദിസോ, താത, ഭവാഹി യാദിസോ ചിത്തോ ച ഗഹപതി ഹത്ഥകോ ച ആളവകോ’തി. ഏസാ, ഭിക്ഖവേ, തുലാ ഏതം പമാണം മമ സാവകാനം ഉപാസകാനം, യദിദം ചിത്തോ ച ഗഹപതി ഹത്ഥകോ ച ആളവകോ. സചേ ഖോ ത്വം, താത, അഗാരസ്മാ അനഗാരിയം പബ്ബജസി; താദിസോ, താത, ഭവാഹി യാദിസാ സാരിപുത്തമോഗ്ഗല്ലാനാതി. ഏസാ, ഭിക്ഖവേ, തുലാ ഏതം പമാണം മമ സാവകാനം ഭിക്ഖൂനം, യദിദം സാരിപുത്തമോഗ്ഗലാനാ. മാ ച ഖോ ത്വം, താത, സേഖം അപ്പത്തമാനസം ലാഭസക്കാരസിലോകോ അനുപാപുണാതൂതി. തഞ്ചേ, ഭിക്ഖവേ, ഭിക്ഖും സേഖം അപ്പത്തമാനസം ലാഭസക്കാരസിലോകോ അനുപാപുണാതി, സോ തസ്സ ഹോതി അന്തരായായ. ഏവം ദാരുണോ ഖോ, ഭിക്ഖവേ, ലാഭസക്കാരസിലോകോ…പേ… ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി. തതിയം.