൯. വേരമ്ഭസുത്തം

൧൬൫. സാവത്ഥിയം വിഹരതി…പേ… ‘‘ദാരുണോ, ഭിക്ഖവേ, ലാഭസക്കാരസിലോകോ…പേ… അധിഗമായ. ഉപരി, ഭിക്ഖവേ, ആകാസേ വേരമ്ഭാ [വേരമ്ബാ (സീ. പീ.)] നാമ വാതാ വായന്തി. തത്ഥ യോ പക്ഖീ ഗച്ഛതി തമേനം വേരമ്ഭാ വാതാ ഖിപന്തി. തസ്സ വേരമ്ഭവാതക്ഖിത്തസ്സ അഞ്ഞേനേവ പാദാ ഗച്ഛന്തി, അഞ്ഞേന പക്ഖാ ഗച്ഛന്തി, അഞ്ഞേന സീസം ഗച്ഛതി, അഞ്ഞേന കായോ ഗച്ഛതി. ഏവമേവ ഖോ, ഭിക്ഖവേ, ഇധേകച്ചോ ഭിക്ഖു ലാഭസക്കാരസിലോകേന അഭിഭൂതോ പരിയാദിണ്ണചിത്തോ പുബ്ബണ്ഹസമയം നിവാസേത്വാ പത്തചീവരമാദായ ഗാമം വാ നിഗമം വാ പിണ്ഡായ പവിസതി അരക്ഖിതേനേവ കായേന അരക്ഖിതായ വാചായ അരക്ഖിതേന ചിത്തേന, അനുപട്ഠിതായ സതിയാ, അസംവുതേഹി ഇന്ദ്രിയേഹി. സോ തത്ഥ പസ്സതി മാതുഗാമം ദുന്നിവത്ഥം വാ ദുപ്പാരുതം വാ. തസ്സ മാതുഗാമം ദിസ്വാ ദുന്നിവത്ഥം വാ ദുപ്പാരുതം വാ രാഗോ ചിത്തം അനുദ്ധംസേതി. സോ രാഗാനുദ്ധംസിതേന ചിത്തേന സിക്ഖം പച്ചക്ഖായ ഹീനായാവത്തതി. തസ്സ അഞ്ഞേ ചീവരം ഹരന്തി, അഞ്ഞേ പത്തം ഹരന്തി, അഞ്ഞേ നിസീദനം ഹരന്തി, അഞ്ഞേ സൂചിഘരം ഹരന്തി, വേരമ്ഭവാതക്ഖിത്തസ്സേവ സകുണസ്സ. ഏവം ദാരുണോ ഖോ, ഭിക്ഖവേ, ലാഭസക്കാരസിലോകോ…പേ… ഏവഞ്ഹി വോ, ഭിക്ഖവേ, സിക്ഖിതബ്ബ’’ന്തി. നവമം.