൬. ഓവാദസുത്തം

൧൪൯. രാജഗഹേ വേളുവനേ. അഥ ഖോ ആയസ്മാ മഹാകസ്സപോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ ആയസ്മന്തം മഹാകസ്സപം ഭഗവാ ഏതദവോച – ‘‘ഓവദ, കസ്സപ, ഭിക്ഖൂ; കരോഹി, കസ്സപ, ഭിക്ഖൂനം ധമ്മിം കഥം. അഹം വാ, കസ്സപ, ഭിക്ഖൂ ഓവദേയ്യം ത്വം വാ; അഹം വാ ഭിക്ഖൂനം ധമ്മിം കഥം കരേയ്യം ത്വം വാ’’തി.

‘‘ദുബ്ബചാ ഖോ, ഭന്തേ, ഏതരഹി ഭിക്ഖൂ, ദോവചസ്സകരണേഹി ധമ്മേഹി സമന്നാഗതാ, അക്ഖമാ, അപ്പദക്ഖിണഗ്ഗാഹിനോ അനുസാസനിം. ഇധാഹം, ഭന്തേ, അദ്ദസം ഭണ്ഡഞ്ച [ഭണ്ഡുഞ്ച (സീ.)] നാമ ഭിക്ഖും ആനന്ദസ്സ സദ്ധിവിഹാരിം അഭിജികഞ്ച [ആഭിഞ്ജികഞ്ച (സീ. ക.), ആഭിജ്ജികഞ്ച (സ്യാ. കം.)] നാമ ഭിക്ഖും അനുരുദ്ധസ്സ സദ്ധിവിഹാരിം അഞ്ഞമഞ്ഞം സുതേന അച്ചാവദന്തേ – ‘ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’’’തി.

അഥ ഖോ ഭഗവാ അഞ്ഞതരം ഭിക്ഖും ആമന്തേസി – ‘‘ഏഹി ത്വം, ഭിക്ഖു, മമ വചനേന ഭണ്ഡഞ്ച ഭിക്ഖും ആനന്ദസ്സ സദ്ധിവിഹാരിം അഭിജികഞ്ച ഭിക്ഖും അനുരുദ്ധസ്സ സദ്ധിവിഹാരിം ആമന്തേഹി – ‘സത്ഥാ ആയസ്മന്തേ ആമന്തേതീ’’’തി. ‘‘ഏവം, ഭന്തേ’’തി ഖോ സോ ഭിക്ഖു ഭഗവതോ പടിസ്സുത്വാ യേന തേ ഭിക്ഖൂ തേനുപസങ്കമി; ഉപസങ്കമിത്വാ തേ ഭിക്ഖൂ ഏതദവോച – ‘‘സത്ഥാ ആയസ്മന്തേ ആമന്തേതീ’’തി.

‘‘ഏവമാവുസോ’’തി ഖോ തേ ഭിക്ഖൂ തസ്സ ഭിക്ഖുനോ പടിസ്സുത്വാ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. ഏകമന്തം നിസിന്നേ ഖോ തേ ഭിക്ഖൂ ഭഗവാ ഏതദവോച – ‘‘സച്ചം കിര തുമ്ഹേ, ഭിക്ഖവേ, അഞ്ഞമഞ്ഞം സുതേന അച്ചാവദഥ – ‘ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’’’തി? ‘‘ഏവം, ഭന്തേ’’. ‘‘കിം നു ഖോ മേ തുമ്ഹേ, ഭിക്ഖവേ, ഏവം ധമ്മം ദേസിതം ആജാനാഥ – ‘ഏഥ തുമ്ഹേ, ഭിക്ഖവേ, അഞ്ഞമഞ്ഞം സുതേന അച്ചാവദഥ – ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’’’തി? ‘‘നോ ഹേതം, ഭന്തേ’’. ‘‘നോ ചേ കിര മേ തുമ്ഹേ, ഭിക്ഖവേ, ഏവം ധമ്മം ദേസിതം ആജാനാഥ, അഥ കിം ചരഹി തുമ്ഹേ, മോഘപുരിസാ, കിം ജാനന്താ കിം പസ്സന്താ ഏവം സ്വാക്ഖാതേ ധമ്മവിനയേ പബ്ബജിതാ സമാനാ അഞ്ഞമഞ്ഞം സുതേന അച്ചാവദഥ – ‘ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’’’തി.

അഥ ഖോ തേ ഭിക്ഖൂ ഭഗവതോ പാദേസു സിരസാ നിപതിത്വാ ഭഗവന്തം ഏതദവോചും – ‘‘അച്ചയോ നോ, ഭന്തേ, അച്ചഗമാ, യഥാബാലേ യഥാമൂള്ഹേ യഥാഅകുസലേ [യഥാ ബാലേ യഥാ മൂള്ഹേ യഥാ അകുസലേ (പീ.), യഥാബാലം യഥാമൂള്ഹം യഥാഅകുസലം (?)], യേ മയം ഏവം സ്വാക്ഖാതേ ധമ്മവിനയേ പബ്ബജിതാ സമാനാ അഞ്ഞമഞ്ഞം സുതേന അച്ചാവദിമ്ഹ – ‘ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’തി. തേസം നോ, ഭന്തേ, ഭഗവാ അച്ചയം അച്ചയതോ പടിഗ്ഗണ്ഹാതു ആയതിം സംവരായാ’’തി.

‘‘തഗ്ഘ തുമ്ഹേ, ഭിക്ഖവേ, അച്ചയോ അച്ചഗമാ യഥാബാലേ യഥാമൂള്ഹേ യഥാഅകുസലേ, യേ തുമ്ഹേ ഏവം സ്വാക്ഖാതേ ധമ്മവിനയേ പബ്ബജിതാ സമാനാ അഞ്ഞമഞ്ഞം സുതേന അച്ചാവദിത്ഥ – ‘ഏഹി, ഭിക്ഖു, കോ ബഹുതരം ഭാസിസ്സതി, കോ സുന്ദരതരം ഭാസിസ്സതി, കോ ചിരതരം ഭാസിസ്സതീ’തി. യതോ ച ഖോ തുമ്ഹേ, ഭിക്ഖവേ, അച്ചയം അച്ചയതോ ദിസ്വാ യഥാധമ്മം പടികരോഥ, തം വോ മയം [മയം അച്ചയം (സീ.)] പടിഗ്ഗണ്ഹാമ. വുദ്ധി ഹേസാ, ഭിക്ഖവേ, അരിയസ്സ വിനയേ യോ അച്ചയം അച്ചയതോ ദിസ്വാ യഥാധമ്മം പടികരോതി ആയതിഞ്ച സംവരം ആപജ്ജതീ’’തി. ഛട്ഠം.