൭. ദുതിയഓവാദസുത്തം

൧൫൦. രാജഗഹേ വിഹരതി വേളുവനേ [സാവത്ഥി, തത്ര-ഏതദവോച (സീ.)]. അഥ ഖോ ആയസ്മാ മഹാകസ്സപോ യേന ഭഗവാ തേനുപസങ്കമി…പേ… ഏകമന്തം നിസിന്നം ഖോ ആയസ്മന്തം മഹാകസ്സപം ഭഗവാ ഏതദവോച – ‘‘ഓവദ, കസ്സപ, ഭിക്ഖൂ; കരോഹി, കസ്സപ, ഭിക്ഖൂനം ധമ്മിം കഥം. അഹം വാ, കസ്സപ, ഭിക്ഖൂ ഓവദേയ്യം ത്വം വാ; അഹം വാ ഭിക്ഖൂനം ധമ്മിം കഥം കരേയ്യം ത്വം വാ’’തി.

‘‘ദുബ്ബചാ ഖോ, ഭന്തേ, ഏതരഹി ഭിക്ഖൂ, ദോവചസ്സകരണേഹി ധമ്മേഹി സമന്നാഗതാ അക്ഖമാ അപ്പദക്ഖിണഗ്ഗാഹിനോ അനുസാസനിം. യസ്സ കസ്സചി, ഭന്തേ, സദ്ധാ നത്ഥി കുസലേസു ധമ്മേസു, ഹിരീ [ഹിരി (സബ്ബത്ഥ)] നത്ഥി കുസലേസു ധമ്മേസു, ഓത്തപ്പം നത്ഥി കുസലേസു ധമ്മേസു, വീരിയം നത്ഥി കുസലേസു ധമ്മേസു, പഞ്ഞാ നത്ഥി കുസലേസു ധമ്മേസു, തസ്സ യാ രത്തി വാ ദിവസോ വാ ആഗച്ഛതി [ആഗച്ഛന്തി (സീ.)], ഹാനിയേവ പാടികങ്ഖാ കുസലേസു ധമ്മേസു, നോ വുദ്ധി.

‘‘സേയ്യഥാപി, ഭന്തേ, കാളപക്ഖേ ചന്ദസ്സ യാ രത്തി വാ ദിവസോ വാ ആഗച്ഛതി, ഹായതേവ വണ്ണേന, ഹായതി മണ്ഡലേന, ഹായതി ആഭായ, ഹായതി ആരോഹപരിണാഹേന. ഏവമേവ ഖോ, ഭന്തേ, യസ്സ കസ്സചി സദ്ധാ നത്ഥി കുസലേസു ധമ്മേസു…പേ… ഹിരീ നത്ഥി… ഓത്തപ്പം നത്ഥി … വീരിയം നത്ഥി… പഞ്ഞാ നത്ഥി… കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, ഹാനിയേവ പാടികങ്ഖാ കുസലേസു ധമ്മേസു, നോ വുദ്ധി.

‘‘‘അസ്സദ്ധോ പുരിസപുഗ്ഗലോ’തി, ഭന്തേ, പരിഹാനമേതം; ‘അഹിരികോ പുരിസപുഗ്ഗലോ’തി, ഭന്തേ, പരിഹാനമേതം; ‘അനോത്തപ്പീ പുരിസപുഗ്ഗലോ’തി, ഭന്തേ, പരിഹാനമേതം; ‘കുസീതോ പുരിസപുഗ്ഗലോ’തി, ഭന്തേ, പരിഹാനമേതം; ‘ദുപ്പഞ്ഞോ പുരിസപുഗ്ഗലോ’തി, ഭന്തേ, പരിഹാനമേതം; ‘കോധനോ പുരിസപുഗ്ഗലോ’തി, ഭന്തേ, പരിഹാനമേതം; ‘ഉപനാഹീ പുരിസപുഗ്ഗലോ’തി, ഭന്തേ, പരിഹാനമേതം; ‘ന സന്തി ഭിക്ഖൂ ഓവാദകാ’തി, ഭന്തേ, പരിഹാനമേതം.

‘‘യസ്സ കസ്സചി, ഭന്തേ, സദ്ധാ അത്ഥി കുസലേസു ധമ്മേസു, ഹിരീ അത്ഥി കുസലേസു ധമ്മേസു, ഓത്തപ്പം അത്ഥി കുസലേസു ധമ്മേസു, വീരിയം അത്ഥി കുസലേസു ധമ്മേസു, പഞ്ഞാ അത്ഥി കുസലേസു ധമ്മേസു, തസ്സ യാ രത്തി വാ ദിവസോ വാ ആഗച്ഛതി, വുദ്ധിയേവ പാടികങ്ഖാ കുസലേസു ധമ്മേസു, നോ പരിഹാനി.

‘‘സേയ്യഥാപി, ഭന്തേ, ജുണ്ഹപക്ഖേ ചന്ദസ്സ യാ രത്തി വാ ദിവസോ വാ ആഗച്ഛതി, വഡ്ഢതേവ വണ്ണേന, വഡ്ഢതി മണ്ഡലേന, വഡ്ഢതി ആഭായ, വഡ്ഢതി ആരോഹപരിണാഹേന. ഏവമേവ ഖോ, ഭന്തേ, യസ്സ കസ്സചി സദ്ധാ അത്ഥി കുസലേസു ധമ്മേസു… ഹിരീ അത്ഥി…പേ… ഓത്തപ്പം അത്ഥി… വീരിയം അത്ഥി… പഞ്ഞാ അത്ഥി കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, വുദ്ധിയേവ പാടികങ്ഖാ കുസലേസു ധമ്മേസു, നോ പരിഹാനി.

‘‘‘സദ്ധോ പുരിസപുഗ്ഗലോ’തി, ഭന്തേ, അപരിഹാനമേതം; ‘ഹിരിമാ പുരിസപുഗ്ഗലോ’തി, ഭന്തേ, അപരിഹാനമേതം; ‘ഓത്തപ്പീ പുരിസപുഗ്ഗലോ’തി, ഭന്തേ, അപരിഹാനമേതം; ‘ആരദ്ധവീരിയോ പുരിസപുഗ്ഗലോ’തി, ഭന്തേ, അപരിഹാനമേതം; ‘പഞ്ഞവാ പുരിസപുഗ്ഗലോ’തി, ഭന്തേ, അപരിഹാനമേതം; ‘അക്കോധനോ പുരിസപുഗ്ഗലോ’തി, ഭന്തേ, അപരിഹാനമേതം; ‘അനുപനാഹീ പുരിസപുഗ്ഗലോ’തി, ഭന്തേ, അപരിഹാനമേതം; ‘സന്തി ഭിക്ഖൂ ഓവാദകാ’തി, ഭന്തേ, അപരിഹാനമേത’’ന്തി.

‘‘സാധു സാധു, കസ്സപ. യസ്സ കസ്സചി, കസ്സപ, സദ്ധാ നത്ഥി കുസലേസു ധമ്മേസു…പേ… ഹിരീ നത്ഥി… ഓത്തപ്പം നത്ഥി… വീരിയം നത്ഥി… പഞ്ഞാ നത്ഥി കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, ഹാനിയേവ പാടികങ്ഖാ കുസലേസു ധമ്മേസു, നോ വുദ്ധി.

‘‘സേയ്യഥാപി, കസ്സപ, കാളപക്ഖേ ചന്ദസ്സ യാ രത്തി വാ ദിവസോ വാ ആഗച്ഛതി, ഹായതേവ വണ്ണേന…പേ… ഹായതി ആരോഹപരിണാഹേന. ഏവമേവ ഖോ, കസ്സപ, യസ്സ കസ്സചി സദ്ധാ നത്ഥി കുസലേസു ധമ്മേസു…പേ… ഹിരീ നത്ഥി… ഓത്തപ്പം നത്ഥി… വീരിയം നത്ഥി… പഞ്ഞാ നത്ഥി കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, ഹാനിയേവ പാടികങ്ഖാ കുസലേസു ധമ്മേസു, നോ വുദ്ധി. ‘അസ്സദ്ധോ പുരിസപുഗ്ഗലോ’തി, കസ്സപ, പരിഹാനമേതം; അഹിരികോ…പേ… അനോത്തപ്പീ… കുസീതോ… ദുപ്പഞ്ഞോ… കോധനോ… ‘ഉപനാഹീ പുരിസപുഗ്ഗലോ’തി, കസ്സപ, പരിഹാനമേതം; ‘ന സന്തി ഭിക്ഖൂ ഓവാദകാ’തി, കസ്സപ, പരിഹാനമേതം.

‘‘യസ്സ കസ്സചി, കസ്സപ, സദ്ധാ അത്ഥി കുസലേസു ധമ്മേസു…പേ… ഹിരീ അത്ഥി… ഓത്തപ്പം അത്ഥി… വീരിയം അത്ഥി… പഞ്ഞാ അത്ഥി കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, വുദ്ധിയേവ പാടികങ്ഖാ കുസലേസു ധമ്മേസു, നോ പരിഹാനി.

‘‘സേയ്യഥാപി, കസ്സപ, ജുണ്ഹപക്ഖേ ചന്ദസ്സ യാ രത്തി വാ ദിവസോ വാ ആഗച്ഛതി, വഡ്ഢതേവ വണ്ണേന, വഡ്ഢതി മണ്ഡലേന, വഡ്ഢതി ആഭായ, വഡ്ഢതി ആരോഹപരിണാഹേന. ഏവമേവ ഖോ, കസ്സപ, യസ്സ കസ്സചി സദ്ധാ അത്ഥി കുസലേസു ധമ്മേസു ഹിരീ അത്ഥി… ഓത്തപ്പം അത്ഥി… വീരിയം അത്ഥി… പഞ്ഞാ അത്ഥി കുസലേസു ധമ്മേസു തസ്സ യാ രത്തി വാ ദിവസോ വാ ആഗച്ഛതി, വുദ്ധിയേവ പാടികങ്ഖാ കുസലേസു ധമ്മേസു, നോ പരിഹാനി.

‘‘‘സദ്ധോ പുരിസപുഗ്ഗലോ’തി, കസ്സപ, അപരിഹാനമേതം; ഹിരിമാ…പേ… ഓത്തപ്പീ… ആരദ്ധവീരിയോ… പഞ്ഞവാ… അക്കോധനോ… ‘അനുപനാഹീ പുരിസപുഗ്ഗലോ’തി, കസ്സപ, അപരിഹാനമേതം; ‘സന്തി ഭിക്ഖൂ ഓവാദകാ’തി, കസ്സപ, അപരിഹാനമേത’’ന്തി. സത്തമം.