൨. അനോത്തപ്പീസുത്തം

൧൪൫. ഏവം മേ സുതം – ഏകം സമയം ആയസ്മാ ച മഹാകസ്സപോ ആയസ്മാ ച സാരിപുത്തോ ബാരാണസിയം വിഹരന്തി ഇസിപതനേ മിഗദായേ. അഥ ഖോ ആയസ്മാ സാരിപുത്തോ സായന്ഹസമയം പടിസല്ലാനാ വുട്ഠിതോ യേനായസ്മാ മഹാകസ്സപോ തേനുപസങ്കമി; ഉപസങ്കമിത്വാ ആയസ്മതാ മഹാകസ്സപേന സദ്ധിം സമ്മോദി. സമ്മോദനീയം കഥം സാരണീയം വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ സാരിപുത്തോ ആയസ്മന്തം മഹാകസ്സപം ഏതദവോച – ‘‘വുച്ചതി ഹിദം, ആവുസോ കസ്സപ, അനാതാപീ അനോത്തപ്പീ അഭബ്ബോ സമ്ബോധായ അഭബ്ബോ നിബ്ബാനായ അഭബ്ബോ അനുത്തരസ്സ യോഗക്ഖേമസ്സ അധിഗമായ; ആതാപീ ച ഖോ ഓത്തപ്പീ ഭബ്ബോ സമ്ബോധായ ഭബ്ബോ നിബ്ബാനായ ഭബ്ബോ അനുത്തരസ്സ യോഗക്ഖേമസ്സ അധിഗമായാ’’തി.

‘‘കിത്താവതാ നു ഖോ, ആവുസോ, അനാതാപീ ഹോതി അനോത്തപ്പീ അഭബ്ബോ സമ്ബോധായ അഭബ്ബോ നിബ്ബാനായ അഭബ്ബോ അനുത്തരസ്സ യോഗക്ഖേമസ്സ അധിഗമായ; കിത്താവതാ ച പനാവുസോ, ആതാപീ ഹോതി ഓത്തപ്പീ ഭബ്ബോ സമ്ബോധായ ഭബ്ബോ നിബ്ബാനായ ഭബ്ബോ അനുത്തരസ്സ യോഗക്ഖേമസ്സ അധിഗമായാ’’തി? ‘‘ഇധാവുസോ, ഭിക്ഖു ‘അനുപ്പന്നാ മേ പാപകാ അകുസലാ ധമ്മാ ഉപ്പജ്ജമാനാ അനത്ഥായ സംവത്തേയ്യു’ന്തി ന ആതപ്പം കരോതി, ‘ഉപ്പന്നാ മേ പാപകാ അകുസലാ ധമ്മാ അപ്പഹീയമാനാ അനത്ഥായ സംവത്തേയ്യു’ന്തി ന ആതപ്പം കരോതി, ‘അനുപ്പന്നാ മേ കുസലാ ധമ്മാനുപ്പജ്ജമാനാ അനത്ഥായ സംവത്തേയ്യു’ന്തി ന ആതപ്പം കരോതി, ‘ഉപ്പന്നാ മേ കുസലാ ധമ്മാ നിരുജ്ഝമാനാ അനത്ഥായ സംവത്തേയ്യു’ന്തി ന ആതപ്പം കരോതി. ഏവം ഖോ, ആവുസോ, അനാതാപീ ഹോതി’’.

‘‘കഥഞ്ചാവുസോ, അനോത്തപ്പീ ഹോതി? ഇധാവുസോ, ഭിക്ഖു ‘അനുപ്പന്നാ മേ പാപകാ അകുസലാ ധമ്മാ ഉപ്പജ്ജമാനാ അനത്ഥായ സംവത്തേയ്യു’ന്തി ന ഓത്തപ്പതി, ‘ഉപ്പന്നാ മേ പാപകാ അകുസലാ ധമ്മാ അപ്പഹീയമാനാ അനത്ഥായ സംവത്തേയ്യു’ന്തി ന ഓത്തപ്പതി, ‘അനുപ്പന്നാ മേ കുസലാ ധമ്മാനുപ്പജ്ജമാനാ അനത്ഥായ സംവത്തേയ്യു’ന്തി ന ഓത്തപ്പതി, ‘ഉപ്പന്നാ മേ കുസലാ ധമ്മാ നിരുജ്ഝമാനാ അനത്ഥായ സംവത്തേയ്യു’ന്തി ന ഓത്തപ്പതി. ഏവം ഖോ, ആവുസോ, അനോത്തപ്പീ ഹോതി. ഏവം ഖോ, ആവുസോ, അനാതാപീ അനോത്തപ്പീ അഭബ്ബോ സമ്ബോധായ അഭബ്ബോ നിബ്ബാനായ അഭബ്ബോ അനുത്തരസ്സ യോഗക്ഖേമസ്സ അധിഗമായ.

‘‘കഥഞ്ചാവുസോ, ആതാപീ ഹോതി? ഇധാവുസോ, ഭിക്ഖു ‘അനുപ്പന്നാ മേ പാപകാ അകുസലാ ധമ്മാ ഉപ്പജ്ജമാനാ അനത്ഥായ സംവത്തേയ്യു’ന്തി ആതപ്പം കരോതി, ‘ഉപ്പന്നാ മേ പാപകാ അകുസലാ ധമ്മാ അപ്പഹീയമാനാ അനത്ഥായ സംവത്തേയ്യു’ന്തി ആതപ്പം കരോതി, അനുപ്പന്നാ മേ കുസലാ ധമ്മാ…പേ… ആതപ്പം കരോതി. ഏവം ഖോ, ആവുസോ, ആതാപീ ഹോതി.

‘‘കഥഞ്ചാവുസോ, ഓത്തപ്പീ ഹോതി? ഇധാവുസോ, ഭിക്ഖു ‘അനുപ്പന്നാ മേ പാപകാ അകുസലാ ധമ്മാ ഉപ്പജ്ജമാനാ അനത്ഥായ സംവത്തേയ്യു’ന്തി ഓത്തപ്പതി, ‘ഉപ്പന്നാ മേ പാപകാ അകുസലാ ധമ്മാ അപ്പഹീയമാനാ അനത്ഥായ സംവത്തേയ്യു’ന്തി ഓത്തപ്പതി, ‘അനുപ്പന്നാ മേ കുസലാ ധമ്മാ അനുപ്പജ്ജമാനാ അനത്ഥായ സംവത്തേയ്യു’ന്തി ഓത്തപ്പതി, ‘ഉപ്പന്നാ മേ കുസലാ ധമ്മാ നിരുജ്ഝമാനാ അനത്ഥായ സംവത്തേയ്യു’ന്തി ഓത്തപ്പതി. ഏവം ഖോ, ആവുസോ, ഓത്തപ്പീ ഹോതി. ഏവം ഖോ, ആവുസോ, ആതാപീ ഓത്തപ്പീ ഭബ്ബോ സമ്ബോധായ ഭബ്ബോ നിബ്ബാനായ ഭബ്ബോ അനുത്തരസ്സ യോഗക്ഖേമസ്സ അധിഗമായാ’’തി. ദുതിയം.