൧. സന്തുട്ഠസുത്തം

൧൪൪. സാവത്ഥിയം വിഹരതി…പേ… ‘‘സന്തുട്ഠായം [സന്തുട്ഠോയം (സീ.)], ഭിക്ഖവേ, കസ്സപോ ഇതരീതരേന ചീവരേന, ഇതരീതരചീവരസന്തുട്ഠിയാ ച വണ്ണവാദീ; ന ച ചീവരഹേതു അനേസനം അപ്പതിരൂപം ആപജ്ജതി; അലദ്ധാ ച ചീവരം ന പരിതസ്സതി; ലദ്ധാ ച ചീവരം അഗധിതോ [അഗഥിതോ (സീ.)] അമുച്ഛിതോ അനജ്ഝാപന്നോ ആദീനവദസ്സാവീ നിസ്സരണപഞ്ഞോ പരിഭുഞ്ജതി’’.

‘‘സന്തുട്ഠായം, ഭിക്ഖവേ, കസ്സപോ ഇതരീതരേന പിണ്ഡപാതേന, ഇതരീതരപിണ്ഡപാതസന്തുട്ഠിയാ ച വണ്ണവാദീ; ന ച പിണ്ഡപാതഹേതു അനേസനം അപ്പതിരൂപം ആപജ്ജതി; അലദ്ധാ ച പിണ്ഡപാതം ന പരിതസ്സതി; ലദ്ധാ ച പിണ്ഡപാതം അഗധിതോ അമുച്ഛിതോ അനജ്ഝാപന്നോ ആദീനവദസ്സാവീ നിസ്സരണപഞ്ഞോ പരിഭുഞ്ജതി.

‘‘സന്തുട്ഠായം, ഭിക്ഖവേ, കസ്സപോ ഇതരീതരേന സേനാസനേന, ഇതരീതരസേനാസനസന്തുട്ഠിയാ ച വണ്ണവാദീ; ന ച സേനാസനഹേതു അനേസനം അപ്പതിരൂപം ആപജ്ജതി; അലദ്ധാ ച സേനാസനം ന പരിതസ്സതി; ലദ്ധാ ച സേനാസനം അഗധിതോ അമുച്ഛിതോ അനജ്ഝാപന്നോ ആദീനവദസ്സാവീ നിസ്സരണപഞ്ഞോ പരിഭുഞ്ജതി.

‘‘സന്തുട്ഠായം, ഭിക്ഖവേ, കസ്സപോ ഇതരീതരേന ഗിലാനപ്പച്ചയഭേസജ്ജപരിക്ഖാരേന, ഇതരീതരഗിലാനപ്പച്ചയഭേസജ്ജപരിക്ഖാരസന്തുട്ഠിയാ ച വണ്ണവാദീ; ന ച ഗിലാനപ്പച്ചയഭേസജ്ജപരിക്ഖാരഹേതു അനേസനം അപ്പതിരൂപം ആപജ്ജതി; അലദ്ധാ ച ഗിലാനപ്പച്ചയഭേസജ്ജപരിക്ഖാരം ന പരിതസ്സതി; ലദ്ധാ ച ഗിലാനപ്പച്ചയഭേസജ്ജപരിക്ഖാരം അഗധിതോ അമുച്ഛിതോ അനജ്ഝാപന്നോ ആദീനവദസ്സാവീ നിസ്സരണപഞ്ഞോ പരിഭുഞ്ജതി.

‘‘തസ്മാതിഹ, ഭിക്ഖവേ, ഏവം സിക്ഖിതബ്ബം – ‘സന്തുട്ഠാ ഭവിസ്സാമ ഇതരീതരേന ചീവരേന, ഇതരീതരചീവരസന്തുട്ഠിയാ ച വണ്ണവാദിനോ; ന ച ചീവരഹേതു അനേസനം അപ്പതിരൂപം ആപജ്ജിസ്സാമ; അലദ്ധാ ച ചീവരം ന ച പരിതസ്സിസ്സാമ; ലദ്ധാ ച ചീവരം അഗധിതാ അമുച്ഛിതാ അനജ്ഝാപന്നാ ആദീനവദസ്സാവിനോ നിസ്സരണപഞ്ഞാ പരിഭുഞ്ജിസ്സാമ’’’. (ഏവം സബ്ബം കാതബ്ബം).

‘‘‘സന്തുട്ഠാ ഭവിസ്സാമ ഇതരീതരേന പിണ്ഡപാതേന…പേ… സന്തുട്ഠാ ഭവിസ്സാമ ഇതരീതരേന സേനാസനേന…പേ… സന്തുട്ഠാ ഭവിസ്സാമ ഇതരീതരേന ഗിലാനപ്പച്ചയഭേസജ്ജപരിക്ഖാരേന, ഇതരീതരഗിലാനപ്പച്ചയഭേസജ്ജപരിക്ഖാരസന്തുട്ഠിയാ ച വണ്ണവാദിനോ; ന ച ഗിലാനപ്പച്ചയഭേസജ്ജപരിക്ഖാരഹേതു അനേസനം അപ്പതിരൂപം ആപജ്ജിസ്സാമ അലദ്ധാ ച ഗിലാനപ്പച്ചയഭേസജ്ജപരിക്ഖാരം ന പരിതസ്സിസ്സാമ; ലദ്ധാ ച ഗിലാനപ്പച്ചയഭേസജ്ജപരിക്ഖാരം അഗധിതാ അമുച്ഛിതാ അനജ്ഝാപന്നാ ആദീനവദസ്സാവിനോ നിസ്സരണപഞ്ഞാ പരിഭുഞ്ജിസ്സാമാ’തി. ഏവഞ്ഹി വോ, ഭിക്ഖവേ, സിക്ഖിതബ്ബം. കസ്സപേന വാ ഹി വോ, ഭിക്ഖവേ, ഓവദിസ്സാമി യോ വാ പനസ്സ [യോ വാ പന (സീ.), യോ വാ (പീ.)] കസ്സപസദിസോ, ഓവദിതേഹി ച പന വോ തഥത്തായ പടിപജ്ജിതബ്ബ’’ന്തി. പഠമം.