൪. ദുതിയസംയോജനസുത്തം

൫൪. സാവത്ഥിയം വിഹരതി …പേ… ‘‘സേയ്യഥാപി, ഭിക്ഖവേ, തേലഞ്ച പടിച്ച വട്ടിഞ്ച പടിച്ച തേലപ്പദീപോ ഝായേയ്യ. തത്ര പുരിസോ കാലേന കാലം തേലം ആസിഞ്ചേയ്യ വട്ടിം ഉപസംഹരേയ്യ. ഏവഞ്ഹി സോ, ഭിക്ഖവേ, തേലപ്പദീപോ തദാഹാരോ തദുപാദാനോ ചിരം ദീഘമദ്ധാനം ജലേയ്യ. ഏവമേവ ഖോ, ഭിക്ഖവേ, സംയോജനിയേസു ധമ്മേസു അസ്സാദാനുപസ്സിനോ വിഹരതോ തണ്ഹാ പവഡ്ഢതി. തണ്ഹാപച്ചയാ ഉപാദാനം…പേ… ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി’’.

‘‘സേയ്യഥാപി, ഭിക്ഖവേ, തേലഞ്ച പടിച്ച വട്ടിഞ്ച പടിച്ച തേലപ്പദീപോ ഝായേയ്യ. തത്ര പുരിസോ ന കാലേന കാലം തേലം ആസിഞ്ചേയ്യ ന വട്ടിം ഉപസംഹരേയ്യ. ഏവഞ്ഹി സോ, ഭിക്ഖവേ, തേലപ്പദീപോ പുരിമസ്സ ച ഉപാദാനസ്സ പരിയാദാനാ അഞ്ഞസ്സ ച അനുപഹാരാ അനാഹാരോ നിബ്ബായേയ്യ. ഏവമേവ ഖോ, ഭിക്ഖവേ, സംയോജനിയേസു ധമ്മേസു ആദീനവാനുപസ്സിനോ വിഹരതോ തണ്ഹാ നിരുജ്ഝതി. തണ്ഹാനിരോധാ ഉപാദാനനിരോധോ…പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’തി. ചതുത്ഥം.