൮. ലോകായതികസുത്തം

൪൮. സാവത്ഥിയം വിഹരതി. അഥ ഖോ ലോകായതികോ ബ്രാഹ്മണോ യേന ഭഗവാ…പേ… ഏകമന്തം നിസിന്നോ ഖോ ലോകായതികോ ബ്രാഹ്മണോ ഭഗവന്തം ഏതദവോച –

‘‘കിം നു ഖോ, ഭോ ഗോതമ, സബ്ബമത്ഥീ’’തി? ‘‘‘സബ്ബമത്ഥീ’തി ഖോ, ബ്രാഹ്മണ, ജേട്ഠമേതം ലോകായതം’’.

‘‘കിം പന, ഭോ ഗോതമ, സബ്ബം നത്ഥീ’’തി? ‘‘‘സബ്ബം നത്ഥീ’തി ഖോ, ബ്രാഹ്മണ, ദുതിയമേതം ലോകായതം’’.

‘‘കിം നു ഖോ, ഭോ ഗോതമ, സബ്ബമേകത്ത’’ന്തി? ‘‘‘സബ്ബമേകത്ത’ന്തി ഖോ, ബ്രാഹ്മണ, തതിയമേതം ലോകായതം’’.

‘‘കിം പന, ഭോ ഗോതമ, സബ്ബം പുഥുത്ത’’ന്തി? ‘‘‘സബ്ബം പുഥുത്ത’ന്തി ഖോ, ബ്രാഹ്മണ, ചതുത്ഥമേതം ലോകായതം’’.

‘‘ഏതേ തേ, ബ്രാഹ്മണ, ഉഭോ അന്തേ അനുപഗമ്മ മജ്ഝേന തഥാഗതോ ധമ്മം ദേസേതി – ‘അവിജ്ജാപച്ചയാ സങ്ഖാരാ; സങ്ഖാരപച്ചയാ വിഞ്ഞാണം…പേ… ഏവമേതസ്സ കേവലസ്സ ദുക്ഖക്ഖന്ധസ്സ സമുദയോ ഹോതി. അവിജ്ജായ ത്വേവ അസേസവിരാഗനിരോധാ സങ്ഖാരനിരോധോ; സങ്ഖാരനിരോധാ വിഞ്ഞാണനിരോധോ…പേ… ഏവമേതസ്സ കേവലസ്സ ദുക്ഖക്ഖന്ധസ്സ നിരോധോ ഹോതീ’’’തി.

ഏവം വുത്തേ, ലോകായതികോ ബ്രാഹ്മണോ ഭഗവന്തം ഏതദവോച – ‘‘അഭിക്കന്തം, ഭോ ഗോതമ…പേ… അജ്ജതഗ്ഗേ പാണുപേതം സരണം ഗത’’ന്തി. അട്ഠമം.