൧൦. ദുതിയസമണബ്രാഹ്മണസുത്തം

൩൦. സാവത്ഥിയം വിഹരതി…പേ… ‘‘തത്ര ഖോ…പേ… യേ ഹി കേചി, ഭിക്ഖവേ, സമണാ വാ ബ്രാഹ്മണാ വാ ജരാമരണം നപ്പജാനന്തി, ജരാമരണസമുദയം നപ്പജാനന്തി, ജരാമരണനിരോധം നപ്പജാനന്തി, ജരാമരണനിരോധഗാമിനിം പടിപദം നപ്പജാനന്തി തേ വത ജരാമരണം സമതിക്കമ്മ ഠസ്സന്തീതി നേതം ഠാനം വിജ്ജതി. ജാതിം നപ്പജാനന്തി…പേ… ഭവം… ഉപാദാനം… തണ്ഹം… വേദനം… ഫസ്സം… സളായതനം… നാമരൂപം… വിഞ്ഞാണം… സങ്ഖാരേ നപ്പജാനന്തി, സങ്ഖാരസമുദയം നപ്പജാനന്തി, സങ്ഖാരനിരോധം നപ്പജാനന്തി, സങ്ഖാരനിരോധഗാമിനിം പടിപദം നപ്പജാനന്തി തേ വത സങ്ഖാരേ സമതിക്കമ്മ ഠസ്സന്തീതി നേതം ഠാനം വിജ്ജതി’’.

‘‘യേ ച ഖോ കേചി, ഭിക്ഖവേ, സമണാ വാ ബ്രാഹ്മണാ വാ ജരാമരണം പജാനന്തി, ജരാമരണസമുദയം പജാനന്തി, ജരാമരണനിരോധം പജാനന്തി, ജരാമരണനിരോധഗാമിനിം പടിപദം പജാനന്തി തേ വത ജരാമരണം സമതിക്കമ്മ ഠസ്സന്തീതി ഠാനമേതം വിജ്ജതി. ജാതിം പജാനന്തി…പേ… ഭവം… ഉപാദാനം… തണ്ഹം… വേദനം… ഫസ്സം… സളായതനം… നാമരൂപം… വിഞ്ഞാണം… സങ്ഖാരേ പജാനന്തി, സങ്ഖാരസമുദയം പജാനന്തി, സങ്ഖാരനിരോധം പജാനന്തി, സങ്ഖാരനിരോധഗാമിനിം പടിപദം പജാനന്തി. തേ വത സങ്ഖാരേ സമതിക്കമ്മ ഠസ്സന്തീതി ഠാനമേതം വിജ്ജതീ’’തി. ദസമം.

ദസബലവഗ്ഗോ തതിയോ.

തസ്സുദ്ദാനം –

ദ്വേ ദസബലാ ഉപനിസാ ച, അഞ്ഞതിത്ഥിയഭൂമിജോ;

ഉപവാണോ പച്ചയോ ഭിക്ഖു, ദ്വേ ച സമണബ്രാഹ്മണാതി.