൭. പവാരണാസുത്തം

൨൧൫. ഏകം സമയം ഭഗവാ സാവത്ഥിയം വിഹരതി പുബ്ബാരാമേ മിഗാരമാതുപാസാദേ മഹതാ ഭിക്ഖുസങ്ഘേന സദ്ധിം പഞ്ചമത്തേഹി ഭിക്ഖുസതേഹി സബ്ബേഹേവ അരഹന്തേഹി. തേന ഖോ പന സമയേന ഭഗവാ തദഹുപോസഥേ പന്നരസേ പവാരണായ ഭിക്ഖുസങ്ഘപരിവുതോ അബ്ഭോകാസേ നിസിന്നോ ഹോതി. അഥ ഖോ ഭഗവാ തുണ്ഹീഭൂതം ഭിക്ഖുസങ്ഘം അനുവിലോകേത്വാ ഭിക്ഖൂ ആമന്തേസി – ‘‘ഹന്ദ ദാനി, ഭിക്ഖവേ, പവാരേമി വോ. ന ച മേ കിഞ്ചി ഗരഹഥ കായികം വാ വാചസികം വാ’’തി.

ഏവം വുത്തേ, ആയസ്മാ സാരിപുത്തോ ഉട്ഠായാസനാ ഏകംസം ഉത്തരാസങ്ഗം കരിത്വാ യേന ഭഗവാ തേനഞ്ജലിം പണാമേത്വാ ഭഗവന്തം ഏതദവോച – ‘‘ന ഖോ മയം, ഭന്തേ, ഭഗവതോ കിഞ്ചി ഗരഹാമ കായികം വാ വാചസികം വാ. ഭഗവാ ഹി, ഭന്തേ, അനുപ്പന്നസ്സ മഗ്ഗസ്സ ഉപ്പാദേതാ, അസഞ്ജാതസ്സ മഗ്ഗസ്സ സഞ്ജനേതാ, അനക്ഖാതസ്സ മഗ്ഗസ്സ അക്ഖാതാ, മഗ്ഗഞ്ഞൂ മഗ്ഗവിദൂ മഗ്ഗകോവിദോ. മഗ്ഗാനുഗാ ച, ഭന്തേ, ഏതരഹി സാവകാ വിഹരന്തി പച്ഛാ സമന്നാഗതാ; അഹഞ്ച ഖോ, ഭന്തേ, ഭഗവന്തം പവാരേമി. ന ച മേ ഭഗവാ കിഞ്ചി ഗരഹതി കായികം വാ വാചസികം വാ’’തി.

‘‘ന ഖ്വാഹം തേ, സാരിപുത്ത, കിഞ്ചി ഗരഹാമി കായികം വാ വാചസികം വാ. പണ്ഡിതോ ത്വം, സാരിപുത്ത, മഹാപഞ്ഞോ ത്വം, സാരിപുത്ത, പുഥുപഞ്ഞോ ത്വം, സാരിപുത്ത, ഹാസപഞ്ഞോ ത്വം, സാരിപുത്ത, ജവനപഞ്ഞോ ത്വം, സാരിപുത്ത, തിക്ഖപഞ്ഞോ ത്വം, സാരിപുത്ത, നിബ്ബേധികപഞ്ഞോ ത്വം, സാരിപുത്ത. സേയ്യഥാപി, സാരിപുത്ത, രഞ്ഞോ ചക്കവത്തിസ്സ ജേട്ഠപുത്തോ പിതരാ പവത്തിതം ചക്കം സമ്മദേവ അനുപ്പവത്തേതി; ഏവമേവ ഖോ ത്വം, സാരിപുത്ത, മയാ അനുത്തരം ധമ്മചക്കം പവത്തിതം സമ്മദേവ അനുപ്പവത്തേസീ’’തി.

‘‘നോ ചേ കിര മേ, ഭന്തേ, ഭഗവാ കിഞ്ചി ഗരഹതി കായികം വാ വാചസികം വാ. ഇമേസം പന, ഭന്തേ, ഭഗവാ പഞ്ചന്നം ഭിക്ഖുസതാനം ന കിഞ്ചി ഗരഹതി കായികം വാ വാചസികം വാ’’തി. ‘‘ഇമേസമ്പി ഖ്വാഹം, സാരിപുത്ത, പഞ്ചന്നം ഭിക്ഖുസതാനം ന കിഞ്ചി ഗരഹാമി കായികം വാ വാചസികം വാ. ഇമേസഞ്ഹി, സാരിപുത്ത, പഞ്ചന്നം ഭിക്ഖുസതാനം സട്ഠി ഭിക്ഖൂ തേവിജ്ജാ, സട്ഠി ഭിക്ഖൂ ഛളഭിഞ്ഞാ, സട്ഠി ഭിക്ഖൂ ഉഭതോഭാഗവിമുത്താ, അഥ ഇതരേ പഞ്ഞാവിമുത്താ’’തി.

അഥ ഖോ ആയസ്മാ വങ്ഗീസോ ഉട്ഠായാസനാ ഏകംസം ഉത്തരാസങ്ഗം കരിത്വാ യേന ഭഗവാ തേനഞ്ജലിം പണാമേത്വാ ഭഗവന്തം ഏതദവോച – ‘‘പടിഭാതി മം ഭഗവാ, പടിഭാതി മം സുഗതാ’’തി. ‘‘പടിഭാതു തം, വങ്ഗീസാ’’തി ഭഗവാ അവോച. അഥ ഖോ ആയസ്മാ വങ്ഗീസോ ഭഗവന്തം സമ്മുഖാ സാരുപ്പാഹി ഗാഥാഹി അഭിത്ഥവി –

‘‘അജ്ജ പന്നരസേ വിസുദ്ധിയാ, ഭിക്ഖൂ പഞ്ചസതാ സമാഗതാ;

സംയോജനബന്ധനച്ഛിദാ, അനീഘാ ഖീണപുനബ്ഭവാ ഇസീ.

‘‘ചക്കവത്തീ യഥാ രാജാ, അമച്ചപരിവാരിതോ;

സമന്താ അനുപരിയേതി, സാഗരന്തം മഹിം ഇമം.

‘‘ഏവം വിജിതസങ്ഗാമം, സത്ഥവാഹം അനുത്തരം;

സാവകാ പയിരുപാസന്തി, തേവിജ്ജാ മച്ചുഹായിനോ.

‘‘സബ്ബേ ഭഗവതോ പുത്താ, പലാപേത്ഥ ന വിജ്ജതി;

തണ്ഹാസല്ലസ്സ ഹന്താരം, വന്ദേ ആദിച്ചബന്ധുന’’ന്തി.