൨. സുസീമസുത്തം

൨൪൮. സാവത്ഥിയം. തത്ര ഖോ ഭഗവാ ഭിക്ഖൂ ആമന്തേസി – ‘‘ഭിക്ഖവോ’’തി. ‘‘ഭദന്തേ’’തി തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

‘‘ഭൂതപുബ്ബം, ഭിക്ഖവേ, അസുരാ ദേവേ അഭിയംസു. അഥ ഖോ, ഭിക്ഖവേ, സക്കോ ദേവാനമിന്ദോ സുസീമം [സുസിമം (സ്യാ. കം. ക.)] ദേവപുത്തം ആമന്തേസി – ‘ഏതേ, താത സുസീമ, അസുരാ ദേവേ അഭിയന്തി. ഗച്ഛ, താത സുസീമ, അസുരേ പച്ചുയ്യാഹീ’തി. ‘ഏവം ഭദ്ദന്തവാ’തി ഖോ, ഭിക്ഖവേ, സുസീമോ ദേവപുത്തോ സക്കസ്സ ദേവാനമിന്ദസ്സ പടിസ്സുത്വാ പമാദം ആപാദേസി. ദുതിയമ്പി ഖോ, ഭിക്ഖവേ, സക്കോ ദേവാനമിന്ദോ സുസീമം ദേവപുത്തം ആമന്തേസി…പേ… ദുതിയമ്പി പമാദം ആപാദേസി. തതിയമ്പി ഖോ, ഭിക്ഖവേ, സക്കോ ദേവാനമിന്ദോ സുസീമം ദേവപുത്തം ആമന്തേസി…പേ… തതിയമ്പി പമാദം ആപാദേസി. അഥ ഖോ, ഭിക്ഖവേ, സക്കോ ദേവാനമിന്ദോ സുസീമം ദേവപുത്തം ഗാഥായ അജ്ഝഭാസി –

‘‘അനുട്ഠഹം അവായാമം, സുഖം യത്രാധിഗച്ഛതി;

സുസീമ തത്ഥ ഗച്ഛാഹി, മഞ്ച തത്ഥേവ പാപയാ’’തി.

‘‘അലസ്വസ്സ അനുട്ഠാതാ, ന ച കിച്ചാനി കാരയേ;

സബ്ബകാമസമിദ്ധസ്സ, തം മേ സക്ക വരം ദിസാ’’തി.

‘‘യത്ഥാലസോ അനുട്ഠാതാ, അച്ചന്തം സുഖമേധതി;

സുസീമ തത്ഥ ഗച്ഛാഹി, മഞ്ച തത്ഥേവ പാപയാ’’തി.

‘‘അകമ്മുനാ ദേവസേട്ഠ, സക്ക വിന്ദേമു യം സുഖം;

അസോകം അനുപായാസം, തം മേ സക്ക വരം ദിസാ’’തി.

‘‘സചേ അത്ഥി അകമ്മേന, കോചി ക്വചി ന ജീവതി;

നിബ്ബാനസ്സ ഹി സോ മഗ്ഗോ, സുസീമ തത്ഥ ഗച്ഛാഹി;

മഞ്ച തത്ഥേവ പാപയാ’’തി.

‘‘സോ ഹി നാമ, ഭിക്ഖവേ, സക്കോ ദേവാനമിന്ദോ സകം പുഞ്ഞഫലം ഉപജീവമാനോ ദേവാനം താവതിംസാനം ഇസ്സരിയാധിപച്ചം രജ്ജം കാരേന്തോ ഉട്ഠാനവീരിയസ്സ വണ്ണവാദീ ഭവിസ്സതി. ഇധ ഖോ തം, ഭിക്ഖവേ, സോഭേഥ, യം തുമ്ഹേ ഏവം സ്വാക്ഖാതേ ധമ്മവിനയേ പബ്ബജിതാ സമാനാ ഉട്ഠഹേയ്യാഥ ഘടേയ്യാഥ വായമേയ്യാഥ അപ്പത്തസ്സ പത്തിയാ, അനധിഗതസ്സ അധിഗമായ, അസച്ഛികതസ്സ സച്ഛികിരിയായാ’’തി.