൭. അദ്ധവഗ്ഗോ

൧. നാമസുത്തം

൬൧. ‘‘കിംസു സബ്ബം അദ്ധഭവി [അന്വഭവി (സീ.)], കിസ്മാ ഭിയ്യോ ന വിജ്ജതി;

കിസ്സസ്സു ഏകധമ്മസ്സ, സബ്ബേവ വസമന്വഗൂ’’തി [വസമദ്ധഗൂ (ക.)].

‘‘നാമം സബ്ബം അദ്ധഭവി, നാമാ ഭിയ്യോ ന വിജ്ജതി;

നാമസ്സ ഏകധമ്മസ്സ, സബ്ബേവ വസമന്വഗൂ’’തി.

൨. ചിത്തസുത്തം

൬൨. ‘‘കേനസ്സു നീയതി ലോകോ, കേനസ്സു പരികസ്സതി;

കിസ്സസ്സു ഏകധമ്മസ്സ, സബ്ബേവ വസമന്വഗൂ’’തി.

‘‘ചിത്തേന നീയതി ലോകോ, ചിത്തേന പരികസ്സതി;

ചിത്തസ്സ ഏകധമ്മസ്സ, സബ്ബേവ വസമന്വഗൂ’’തി.

൩. തണ്ഹാസുത്തം

൬൩. ‘‘കേനസ്സു നീയതി ലോകോ, കേനസ്സു പരികസ്സതി;

കിസ്സസ്സു ഏകധമ്മസ്സ, സബ്ബേവ വസമന്വഗൂ’’തി.

‘‘തണ്ഹായ നീയതി ലോകോ, തണ്ഹായ പരികസ്സതി;

തണ്ഹായ ഏകധമ്മസ്സ, സബ്ബേവ വസമന്വഗൂ’’തി.

൪. സംയോജനസുത്തം

൬൪. ‘‘കിംസു സംയോജനോ ലോകോ, കിംസു തസ്സ വിചാരണം;

കിസ്സസ്സു വിപ്പഹാനേന, നിബ്ബാനം ഇതി വുച്ചതീ’’തി.

‘‘നന്ദീസംയോജനോ [നന്ദിസംയോജനോ (സീ. സ്യാ. കം.)] ലോകോ, വിതക്കസ്സ വിചാരണം;

തണ്ഹായ വിപ്പഹാനേന, നിബ്ബാനം ഇതി വുച്ചതീ’’തി.

൫. ബന്ധനസുത്തം

൬൫. ‘‘കിംസു സമ്ബന്ധനോ ലോകോ, കിംസു തസ്സ വിചാരണം;

കിസ്സസ്സു വിപ്പഹാനേന, സബ്ബം ഛിന്ദതി ബന്ധന’’ന്തി.

‘‘നന്ദീസമ്ബന്ധനോ ലോകോ, വിതക്കസ്സ വിചാരണം;

തണ്ഹായ വിപ്പഹാനേന, സബ്ബം ഛിന്ദതി ബന്ധന’’ന്തി.

൬. അത്തഹതസുത്തം

൬൬. ‘‘കേനസ്സുബ്ഭാഹതോ ലോകോ, കേനസ്സു പരിവാരിതോ;

കേന സല്ലേന ഓതിണ്ണോ, കിസ്സ ധൂപായിതോ സദാ’’തി.

‘‘മച്ചുനാബ്ഭാഹതോ ലോകോ, ജരായ പരിവാരിതോ;

തണ്ഹാസല്ലേന ഓതിണ്ണോ, ഇച്ഛാധൂപായിതോ സദാ’’തി.

൭. ഉഡ്ഡിതസുത്തം

൬൭. ‘‘കേനസ്സു ഉഡ്ഡിതോ ലോകോ, കേനസ്സു പരിവാരിതോ;

കേനസ്സു പിഹിതോ ലോകോ, കിസ്മിം ലോകോ പതിട്ഠിതോ’’തി.

‘‘തണ്ഹായ ഉഡ്ഡിതോ ലോകോ, ജരായ പരിവാരിതോ;

മച്ചുനാ പിഹിതോ ലോകോ, ദുക്ഖേ ലോകോ പതിട്ഠിതോ’’തി.

൮. പിഹിതസുത്തം

൬൮. ‘‘കേനസ്സു പിഹിതോ ലോകോ, കിസ്മിം ലോകോ പതിട്ഠിതോ;

കേനസ്സു ഉഡ്ഡിതോ ലോകോ, കേനസ്സു പരിവാരിതോ’’തി.

‘‘മച്ചുനാ പിഹിതോ ലോകോ, ദുക്ഖേ ലോകോ പതിട്ഠിതോ;

തണ്ഹായ ഉഡ്ഡിതോ ലോകോ, ജരായ പരിവാരിതോ’’തി.

൯. ഇച്ഛാസുത്തം

൬൯. ‘‘കേനസ്സു ബജ്ഝതീ ലോകോ, കിസ്സ വിനയായ മുച്ചതി;

കിസ്സസ്സു വിപ്പഹാനേന, സബ്ബം ഛിന്ദതി ബന്ധന’’ന്തി.

‘‘ഇച്ഛായ ബജ്ഝതീ ലോകോ, ഇച്ഛാവിനയായ മുച്ചതി;

ഇച്ഛായ വിപ്പഹാനേന, സബ്ബം ഛിന്ദതി ബന്ധന’’ന്തി.

൧൦. ലോകസുത്തം

൭൦. ‘‘കിസ്മിം ലോകോ സമുപ്പന്നോ, കിസ്മിം കുബ്ബതി സന്ഥവം;

കിസ്സ ലോകോ ഉപാദായ, കിസ്മിം ലോകോ വിഹഞ്ഞതീ’’തി.

‘‘ഛസു ലോകോ സമുപ്പന്നോ, ഛസു കുബ്ബതി സന്ഥവം;

ഛന്നമേവ ഉപാദായ, ഛസു ലോകോ വിഹഞ്ഞതീ’’തി.

അദ്ധവഗ്ഗോ [അന്വവഗ്ഗോ (സീ.)] സത്തമോ.

തസ്സുദ്ദാനം –

നാമം ചിത്തഞ്ച തണ്ഹാ ച, സംയോജനഞ്ച ബന്ധനാ;

അബ്ഭാഹതുഡ്ഡിതോ പിഹിതോ, ഇച്ഛാ ലോകേന തേ ദസാതി.