൧൦. സങ്ഖാരുപപത്തിസുത്തം

൧൬൦. ഏവം മേ സുതം – ഏകം സമയം ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തത്ര ഖോ ഭഗവാ ഭിക്ഖൂ ആമന്തേസി – ‘‘ഭിക്ഖവോ’’തി. ‘‘ഭദന്തേ’’തി തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച – ‘‘സങ്ഖാരുപപത്തിം [സങ്ഖാരൂപപത്തിം (സ്യാ. കം.), സങ്ഖാരുപ്പത്തിം (സീ. പീ.)] വോ, ഭിക്ഖവേ, ദേസേസ്സാമി, തം സുണാഥ, സാധുകം മനസി കരോഥ; ഭാസിസ്സാമീ’’തി. ‘‘ഏവം, ഭന്തേ’’തി ഖോ തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

൧൬൧. ‘‘ഇധ, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന സമന്നാഗതോ ഹോതി, ചാഗേന സമന്നാഗതോ ഹോതി, പഞ്ഞായ സമന്നാഗതോ ഹോതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ഖത്തിയമഹാസാലാനം [ഖത്തിയമഹാസാലാനം വാ (സ്യാ. കം. പീ.)] സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ [വിഹാരോ (സീ. പീ.)] ച ഏവം ഭാവിതാ ഏവം ബഹുലീകതാ തത്രുപപത്തിയാ [തത്രൂപപത്തിയാ (സ്യാ. കം.), തത്രുപ്പത്തിയാ (സീ. പീ.)] സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൨. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന സമന്നാഗതോ ഹോതി, ചാഗേന സമന്നാഗതോ ഹോതി, പഞ്ഞായ സമന്നാഗതോ ഹോതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ബ്രാഹ്മണമഹാസാലാനം…പേ… ഗഹപതിമഹാസാലാനം [ബ്രാഹ്മണമഹാസാലാനം വാ ഗഹപതിമഹാസാലാനം വാ (സ്യാ. കം. പീ.)] സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൩. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന സമന്നാഗതോ ഹോതി, ചാഗേന സമന്നാഗതോ ഹോതി, പഞ്ഞായ സമന്നാഗതോ ഹോതി. തസ്സ സുതം ഹോതി – ‘ചാതുമഹാരാജികാ [ചാതുമ്മഹാരാജികാ (സീ. സ്യാ. കം. പീ.)] ദേവാ ദീഘായുകാ വണ്ണവന്തോ സുഖബഹുലാ’തി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ചാതുമഹാരാജികാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൪. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന സമന്നാഗതോ ഹോതി, ചാഗേന സമന്നാഗതോ ഹോതി, പഞ്ഞായ സമന്നാഗതോ ഹോതി. തസ്സ സുതം ഹോതി – താവതിംസാ ദേവാ…പേ… യാമാ ദേവാ… തുസിതാ ദേവാ… നിമ്മാനരതീ ദേവാ… പരനിമ്മിതവസവത്തീ ദേവാ ദീഘായുകാ വണ്ണവന്തോ സുഖബഹുലാതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ പരനിമ്മിതവസവത്തീനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൫. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന സമന്നാഗതോ ഹോതി, ചാഗേന സമന്നാഗതോ ഹോതി, പഞ്ഞായ സമന്നാഗതോ ഹോതി. തസ്സ സുതം ഹോതി – ‘സഹസ്സോ ബ്രഹ്മാ ദീഘായുകോ വണ്ണവാ സുഖബഹുലോ’തി. സഹസ്സോ, ഭിക്ഖവേ, ബ്രഹ്മാ സഹസ്സിലോകധാതും [സഹസ്സിം ലോകധാതും (സീ.)] ഫരിത്വാ അധിമുച്ചിത്വാ [അധിമുഞ്ചിത്വാ (ക.)] വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. സേയ്യഥാപി, ഭിക്ഖവേ, ചക്ഖുമാ പുരിസോ ഏകം ആമണ്ഡം ഹത്ഥേ കരിത്വാ പച്ചവേക്ഖേയ്യ; ഏവമേവ ഖോ, ഭിക്ഖവേ, സഹസ്സോ ബ്രഹ്മാ സഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ സഹസ്സസ്സ ബ്രഹ്മുനോ സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൬. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ദ്വിസഹസ്സോ ബ്രഹ്മാ…പേ… തിസഹസ്സോ ബ്രഹ്മാ… ചതുസഹസ്സോ ബ്രഹ്മാ… പഞ്ചസഹസ്സോ ബ്രഹ്മാ ദീഘായുകോ വണ്ണവാ സുഖബഹുലോതി. പഞ്ചസഹസ്സോ, ഭിക്ഖവേ, ബ്രഹ്മാ പഞ്ചസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. സേയ്യഥാപി, ഭിക്ഖവേ, ചക്ഖുമാ പുരിസോ പഞ്ച ആമണ്ഡാനി ഹത്ഥേ കരിത്വാ പച്ചവേക്ഖേയ്യ; ഏവമേവ ഖോ, ഭിക്ഖവേ, പഞ്ചസഹസ്സോ ബ്രഹ്മാ പഞ്ചസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ പഞ്ചസഹസ്സസ്സ ബ്രഹ്മുനോ സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൭. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന സമന്നാഗതോ ഹോതി, സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ‘ദസസഹസ്സോ ബ്രഹ്മാ ദീഘായുകോ വണ്ണവാ സുഖബഹുലോ’തി. ദസസഹസ്സോ, ഭിക്ഖവേ, ബ്രഹ്മാ ദസസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. സേയ്യഥാപി, ഭിക്ഖവേ, മണി വേളുരിയോ സുഭോ ജാതിമാ അട്ഠംസോ സുപരികമ്മകതോ പണ്ഡുകമ്ബലേ നിക്ഖിത്തോ ഭാസതേ ച തപതേ ച [ഭാസതി ച തപതി ച (സീ. സ്യാ. കം. പീ.)] വിരോചതി ച; ഏവമേവ ഖോ, ഭിക്ഖവേ, ദസസഹസ്സോ ബ്രഹ്മാ ദസസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ദസസഹസ്സസ്സ ബ്രഹ്മുനോ സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൮. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ‘സതസഹസ്സോ ബ്രഹ്മാ ദീഘായുകോ വണ്ണവാ സുഖബഹുലോ’തി. സതസഹസ്സോ, ഭിക്ഖവേ, ബ്രഹ്മാ സതസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. സേയ്യഥാപി, ഭിക്ഖവേ, നിക്ഖം ജമ്ബോനദം [നേക്ഖം (സീ. സ്യാ. കം. പീ.)] ദക്ഖകമ്മാരപുത്തഉക്കാമുഖസുകുസലസമ്പഹട്ഠം പണ്ഡുകമ്ബലേ നിക്ഖിത്തം ഭാസതേ ച തപതേ ച വിരോചതി ച; ഏവമേവ ഖോ, ഭിക്ഖവേ, സതസഹസ്സോ ബ്രഹ്മാ സതസഹസ്സിലോകധാതും ഫരിത്വാ അധിമുച്ചിത്വാ വിഹരതി. യേപി തത്ഥ സത്താ ഉപപന്നാ തേപി ഫരിത്വാ അധിമുച്ചിത്വാ വിഹരതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ സതസഹസ്സസ്സ ബ്രഹ്മുനോ സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൬൯. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ആഭാ ദേവാ…പേ… പരിത്താഭാ ദേവാ… അപ്പമാണാഭാ ദേവാ… ആഭസ്സരാ ദേവാ ദീഘായുകാ വണ്ണവന്തോ സുഖബഹുലാതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ആഭസ്സരാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൦. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന … സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – പരിത്തസുഭാ ദേവാ…പേ… അപ്പമാണസുഭാ ദേവാ… സുഭകിണ്ഹാ ദേവാ ദീഘായുകാ വണ്ണവന്തോ സുഖബഹുലാതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ സുഭകിണ്ഹാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൧. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – വേഹപ്ഫലാ ദേവാ…പേ… അവിഹാ ദേവാ… അതപ്പാ ദേവാ… സുദസ്സാ ദേവാ… സുദസ്സീ ദേവാ… അകനിട്ഠാ ദേവാ ദീഘായുകാ വണ്ണവന്തോ സുഖബഹുലാതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ അകനിട്ഠാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൨. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ‘ആകാസാനഞ്ചായതനൂപഗാ ദേവാ ദീഘായുകാ ചിരട്ഠിതികാ സുഖബഹുലാ’തി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ ആകാസാനഞ്ചായതനൂപഗാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൩. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ‘വിഞ്ഞാണഞ്ചായതനൂപഗാ ദേവാ ദീഘായുകാ ചിരട്ഠിതികാ സുഖബഹുലാ’തി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ വിഞ്ഞാണഞ്ചായതനൂപഗാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൪. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ സുതം ഹോതി – ആകിഞ്ചഞ്ഞായതനൂപഗാ ദേവാ…പേ… നേവസഞ്ഞാനാസഞ്ഞായതനൂപഗാ ദേവാ ദീഘായുകാ ചിരട്ഠിതികാ സുഖബഹുലാതി. തസ്സ ഏവം ഹോതി – ‘അഹോ വതാഹം കായസ്സ ഭേദാ പരം മരണാ നേവസഞ്ഞാനാസഞ്ഞായതനൂപഗാനം ദേവാനം സഹബ്യതം ഉപപജ്ജേയ്യ’ന്തി. സോ തം ചിത്തം ദഹതി, തം ചിത്തം അധിട്ഠാതി, തം ചിത്തം ഭാവേതി. തസ്സ തേ സങ്ഖാരാ ച വിഹാരാ ച ഏവം ഭാവിതാ ഏവം ബഹുലീകതാ തത്രുപപത്തിയാ സംവത്തന്തി. അയം, ഭിക്ഖവേ, മഗ്ഗോ അയം പടിപദാ തത്രുപപത്തിയാ സംവത്തതി.

൧൭൫. ‘‘പുന ചപരം, ഭിക്ഖവേ, ഭിക്ഖു സദ്ധായ സമന്നാഗതോ ഹോതി, സീലേന… സുതേന… ചാഗേന… പഞ്ഞായ സമന്നാഗതോ ഹോതി. തസ്സ ഏവം ഹോതി – ‘അഹോ വതാഹം ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരേയ്യ’ന്തി. സോ ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരതി. അയം, ഭിക്ഖവേ, ഭിക്ഖു ന കത്ഥചി ഉപപജ്ജതീ’’തി [ന കത്ഥചി ഉപപജ്ജതി, ന കുഹിഞ്ചി ഉപപജ്ജതീതി (സീ. പീ.), ന കത്ഥചി ഉപപജ്ജതി, ന കുഹിഞ്ചി ഉപസമ്പജ്ജ വിഹരതീതി. (ക.)].

ഇദമവോച ഭഗവാ. അത്തമനാ തേ ഭിക്ഖൂ ഭഗവതോ ഭാസിതം അഭിനന്ദുന്തി.

സങ്ഖാരുപപത്തിസുത്തം നിട്ഠിതം ദസമം.

അനുപദവഗ്ഗോ നിട്ഠിതോ ദുതിയോ.