൫. പഞ്ചമവഗ്ഗോ

൧. കുമാരകസ്സപത്ഥേരഗാഥാ

൨൦൧. ‘‘അഹോ ബുദ്ധാ അഹോ ധമ്മാ, അഹോ നോ സത്ഥു സമ്പദാ;

യത്ഥ ഏതാദിസം ധമ്മം, സാവകോ സച്ഛികാഹി’’തി.

൨൦൨. ‘‘അസങ്ഖേയ്യേസു കപ്പേസു, സക്കായാധിഗതാ അഹൂ;

തേസമയം പച്ഛിമകോ, ചരിമോയം സമുസ്സയോ;

ജാതിമരണസംസാരോ, നത്ഥി ദാനി പുനബ്ഭവോ’’തി.

… കുമാരകസ്സപോ ഥേരോ….

൨. ധമ്മപാലത്ഥേരഗാഥാ

൨൦൩. ‘‘യോ ഹവേ ദഹരോ ഭിക്ഖു, യുഞ്ജതി ബുദ്ധസാസനേ;

ജാഗരോ സ ഹി സുത്തേസു [പതിസുത്തേസു (സീ. ക.)], അമോഘം തസ്സ ജീവിതം.

൨൦൪. ‘‘തസ്മാ സദ്ധഞ്ച സീലഞ്ച, പസാദം ധമ്മദസ്സനം;

അനുയുഞ്ജേഥ മേധാവീ, സരം ബുദ്ധാന സാസന’’ന്തി.

… ധമ്മപാലോ ഥേരോ….

൩. ബ്രഹ്മാലിത്ഥേരഗാഥാ

൨൦൫. ‘‘കസ്സിന്ദ്രിയാനി സമഥങ്ഗതാനി, അസ്സാ യഥാ സാരഥിനാ സുദന്താ;

പഹീനമാനസ്സ അനാസവസ്സ, ദേവാപി കസ്സ [തസ്സ (ബഹൂസു)] പിഹയന്തി താദിനോ’’തി.

൨൦൬. [ധ. പ. ൯൪ ധമ്മപദേപി] ‘‘മയ്ഹിന്ദ്രിയാനി സമഥങ്ഗതാനി, അസ്സാ യഥാ സാരഥിനാ സുദന്താ;

പഹീനമാനസ്സ അനാസവസ്സ, ദേവാപി മയ്ഹം പിഹയന്തി താദിനോ’’തി.

… ബ്രഹ്മാലി ഥേരോ….

൪. മോഘരാജത്ഥേരഗാഥാ

൨൦൭. ‘‘ഛവിപാപക ചിത്തഭദ്ദക, മോഘരാജ സതതം സമാഹിതോ;

ഹേമന്തികസീതകാലരത്തിയോ [ഹേമന്തികകാലരത്തിയോ (ക.)], ഭിക്ഖു ത്വംസി കഥം കരിസ്സസി’’.

൨൦൮. ‘‘സമ്പന്നസസ്സാ മഗധാ, കേവലാ ഇതി മേ സുതം;

പലാലച്ഛന്നകോ സേയ്യം, യഥഞ്ഞേ സുഖജീവിനോ’’തി.

… മോഘരാജാ ഥേരോ….

൫. വിസാഖപഞ്ചാലപുത്തത്ഥേരഗാഥാ

൨൦൯. ‘‘ന ഉക്ഖിപേ നോ ച പരിക്ഖിപേ പരേ, ഓക്ഖിപേ പാരഗതം ന ഏരയേ;

ന ചത്തവണ്ണം പരിസാസു ബ്യാഹരേ, അനുദ്ധതോ സമ്മിതഭാണി സുബ്ബതോ.

൨൧൦. ‘‘സുസുഖുമനിപുണത്ഥദസ്സിനാ, മതികുസലേന നിവാതവുത്തിനാ;

സംസേവിതവുദ്ധസീലിനാ, നിബ്ബാനം ന ഹി തേന ദുല്ലഭ’’ന്തി.

… വിസാഖോ പഞ്ചാലപുത്തോ ഥേരോ ….

൬. ചൂളകത്ഥേരഗാഥാ

൨൧൧. ‘‘നദന്തി മോരാ സുസിഖാ സുപേഖുണാ, സുനീലഗീവാ സുമുഖാ സുഗജ്ജിനോ;

സുസദ്ദലാ ചാപി മഹാമഹീ അയം, സുബ്യാപിതമ്ബു സുവലാഹകം നഭം.

൨൧൨. ‘‘സുകല്ലരൂപോ സുമനസ്സ ഝായതം [ഝായിതം (സ്യാ. ക.)], സുനിക്കമോ സാധു സുബുദ്ധസാസനേ;

സുസുക്കസുക്കം നിപുണം സുദുദ്ദസം, ഫുസാഹി തം ഉത്തമമച്ചുതം പദ’’ന്തി.

… ചൂളകോ [ചൂലകോ (സീ. അട്ഠ.)] ഥേരോ….

൭. അനൂപമത്ഥേരഗാഥാ

൨൧൩. ‘‘നന്ദമാനാഗതം ചിത്തം, സൂലമാരോപമാനകം;

തേന തേനേവ വജസി, യേന സൂലം കലിങ്ഗരം.

൨൧൪. ‘‘താഹം ചിത്തകലിം ബ്രൂമി, തം ബ്രൂമി ചിത്തദുബ്ഭകം;

സത്ഥാ തേ ദുല്ലഭോ ലദ്ധോ, മാനത്ഥേ മം നിയോജയീ’’തി.

… അനൂപമോ ഥേരോ….

൮. വജ്ജിതത്ഥേരഗാഥാ

൨൧൫. ‘‘സംസരം ദീഘമദ്ധാനം, ഗതീസു പരിവത്തിസം;

അപസ്സം അരിയസച്ചാനി, അന്ധഭൂതോ [അന്ധീഭൂതോ (ക.)] പുഥുജ്ജനോ.

൨൧൬. ‘‘തസ്സ മേ അപ്പമത്തസ്സ, സംസാരാ വിനളീകതാ;

സബ്ബാ ഗതീ സമുച്ഛിന്നാ, നത്ഥി ദാനി പുനബ്ഭവോ’’തി.

… വജ്ജിതോ ഥേരോ….

൯. സന്ധിതത്ഥേരഗാഥാ

൨൧൭. ‘‘അസ്സത്ഥേ ഹരിതോഭാസേ, സംവിരൂള്ഹമ്ഹി പാദപേ;

ഏകം ബുദ്ധഗതം സഞ്ഞം, അലഭിത്ഥം [അലഭിം ഹം (ക.)] പതിസ്സതോ.

൨൧൮. ‘‘ഏകതിംസേ ഇതോ കപ്പേ, യം സഞ്ഞമലഭിം തദാ;

തസ്സാ സഞ്ഞായ വാഹസാ, പത്തോ മേ ആസവക്ഖയോ’’തി.

… സന്ധിതോ ഥേരോ….

വഗ്ഗോ പഞ്ചമോ നിട്ഠിതോ.

തസ്സുദ്ദാനം –

കുമാരകസ്സപോ ഥേരോ, ധമ്മപാലോ ച ബ്രഹ്മാലി;

മോഘരാജാ വിസാഖോ ച, ചൂളകോ ച അനൂപമോ;

വജ്ജിതോ സന്ധിതോ ഥേരോ, കിലേസരജവാഹനോതി.

ദുകനിപാതോ നിട്ഠിതോ.