൨. ദുതിയവഗ്ഗോ

൧. മഹാചുന്ദത്ഥേരഗാഥാ

൧൪൧. ‘‘സുസ്സൂസാ സുതവദ്ധനീ, സുതം പഞ്ഞായ വദ്ധനം;

പഞ്ഞായ അത്ഥം ജാനാതി, ഞാതോ അത്ഥോ സുഖാവഹോ.

൧൪൨. ‘‘സേവേഥ പന്താനി സേനാസനാനി, ചരേയ്യ സംയോജനവിപ്പമോക്ഖം;

സചേ രതിം നാധിഗച്ഛേയ്യ തത്ഥ, സങ്ഘേ വസേ രക്ഖിതത്തോ സതിമാ’’തി.

… മഹാചുന്ദോ ഥേരോ….

൨. ജോതിദാസത്ഥേരഗാഥാ

൧൪൩. ‘‘യേ ഖോ തേ വേഠമിസ്സേന [വേഘമിസ്സേന (സീ. സ്യാ.), വേ ഗമിസ്സേന, വേഖമിസ്സേന (ക.)], നാനത്തേന ച കമ്മുനാ;

മനുസ്സേ ഉപരുന്ധന്തി, ഫരുസൂപക്കമാ ജനാ;

തേപി തത്ഥേവ കീരന്തി, ന ഹി കമ്മം പനസ്സതി.

൧൪൪. ‘‘യം കരോതി നരോ കമ്മം, കല്യാണം യദി പാപകം;

തസ്സ തസ്സേവ ദായാദോ, യം യം കമ്മം പകുബ്ബതീ’’തി.

… ജോതിദാസോ ഥേരോ….

൩. ഹേരഞ്ഞകാനിത്ഥേരഗാഥാ

൧൪൫. ‘‘അച്ചയന്തി അഹോരത്താ, ജീവിതം ഉപരുജ്ഝതി;

ആയു ഖീയതി മച്ചാനം, കുന്നദീനംവ ഓദകം.

൧൪൬. ‘‘അഥ പാപാനി കമ്മാനി, കരം ബാലോ ന ബുജ്ഝതി;

പച്ഛാസ്സ കടുകം ഹോതി, വിപാകോ ഹിസ്സ പാപകോ’’തി.

… ഹേരഞ്ഞകാനിത്ഥേരോ….

൪. സോമമിത്തത്ഥേരഗാഥാ

൧൪൭. ‘‘പരിത്തം ദാരുമാരുയ്ഹ, യഥാ സീദേ മഹണ്ണവേ;

ഏവം കുസീതമാഗമ്മ, സാധുജീവീപി സീദതി;

തസ്മാ തം പരിവജ്ജേയ്യ, കുസീതം ഹീനവീരിയം.

൧൪൮. ‘‘പവിവിത്തേഹി അരിയേഹി, പഹിതത്തേഹി ഝായിഭി;

നിച്ചം ആരദ്ധവീരിയേഹി, പണ്ഡിതേഹി സഹാവസേ’’തി.

… സോമമിത്തോ ഥേരോ….

൫. സബ്ബമിത്തത്ഥേരഗാഥാ

൧൪൯. ‘‘ജനോ ജനമ്ഹി സമ്ബദ്ധോ [സമ്ബദ്ധോ (സ്യാ. ക.)], ജനമേവസ്സിതോ ജനോ;

ജനോ ജനേന ഹേഠീയതി, ഹേഠേതി ച [ബോധിയതി, ബാധേതി ച (ക.)] ജനോ ജനം.

൧൫൦. ‘‘കോ ഹി തസ്സ ജനേനത്ഥോ, ജനേന ജനിതേന വാ;

ജനം ഓഹായ ഗച്ഛം തം, ഹേഠയിത്വാ [ബാധയിത്വാ (ക.)] ബഹും ജന’’ന്തി.

… സബ്ബമിത്തോ ഥേരോ….

൬. മഹാകാളത്ഥേരഗാഥാ

൧൫൧. ‘‘കാളീ ഇത്ഥീ ബ്രഹതീ ധങ്കരൂപാ, സത്ഥിഞ്ച ഭേത്വാ അപരഞ്ച സത്ഥിം;

ബാഹഞ്ച ഭേത്വാ അപരഞ്ച ബാഹം, സീസഞ്ച ഭേത്വാ ദധിഥാലകംവ;

ഏസാ നിസിന്നാ അഭിസന്ദഹിത്വാ.

൧൫൨. ‘‘യോ വേ അവിദ്വാ ഉപധിം കരോതി, പുനപ്പുനം ദുക്ഖമുപേതി മന്ദോ;

തസ്മാ പജാനം ഉപധിം ന കയിരാ, മാഹം പുന ഭിന്നസിരോ സയിസ്സ’’ന്തി [പസ്സിസ്സന്തി (ക.)].

… മഹാകാളോ ഥേരോ….

൭. തിസ്സത്ഥേരഗാഥാ

൧൫൩. ‘‘ബഹൂ സപത്തേ ലഭതി, മുണ്ഡോ സങ്ഘാടിപാരുതോ;

ലാഭീ അന്നസ്സ പാനസ്സ, വത്ഥസ്സ സയനസ്സ ച.

൧൫൪. ‘‘ഏതമാദീനവം ഞത്വാ, സക്കാരേസു മഹബ്ഭയം;

അപ്പലാഭോ അനവസ്സുതോ, സതോ ഭിക്ഖു പരിബ്ബജേ’’തി.

… തിസ്സോ ഥേരോ….

൮. കിമിലത്ഥേരഗാഥാ

൧൫൫. ‘‘പാചീനവംസദായമ്ഹി, സക്യപുത്താ സഹായകാ;

പഹായാനപ്പകേ ഭോഗേ, ഉഞ്ഛാപത്താഗതേ രതാ.

൧൫൬. ‘‘ആരദ്ധവീരിയാ പഹിതത്താ, നിച്ചം ദള്ഹപരക്കമാ;

രമന്തി ധമ്മരതിയാ, ഹിത്വാന ലോകിയം രതി’’ന്തി.

… കിമിലോ [കിമ്ബിലോ (സീ. സ്യാ. പീ.)] ഥേരോ….

൯. നന്ദത്ഥേരഗാഥാ

൧൫൭. ‘‘അയോനിസോ മനസികാരാ, മണ്ഡനം അനുയുഞ്ജിസം;

ഉദ്ധതോ ചപലോ ചാസിം, കാമരാഗേന അട്ടിതോ.

൧൫൮. ‘‘ഉപായകുസലേനാഹം, ബുദ്ധേനാദിച്ചബന്ധുനാ;

യോനിസോ പടിപജ്ജിത്വാ, ഭവേ ചിത്തം ഉദബ്ബഹി’’ന്തി.

… നന്ദോ ഥേരോ….

൧൦. സിരിമത്ഥേരഗാഥാ

൧൫൯. ‘‘പരേ ച നം പസംസന്തി, അത്താ ചേ അസമാഹിതോ;

മോഘം പരേ പസംസന്തി, അത്താ ഹി അസമാഹിതോ.

൧൬൦. ‘‘പരേ ച നം ഗരഹന്തി, അത്താ ചേ സുസമാഹിതോ;

മോഘം പരേ ഗരഹന്തി, അത്താ ഹി സുസമാഹിതോ’’തി.

… സിരിമാ ഥേരോ….

വഗ്ഗോ ദുതിയോ നിട്ഠിതോ.

തസ്സുദ്ദാനം –

ചുന്ദോ ച ജോതിദാസോ ച, ഥേരോ ഹേരഞ്ഞകാനി ച;

സോമമിത്തോ സബ്ബമിത്തോ, കാലോ തിസ്സോ ച കിമിലോ [കിമ്ബിലോ (സീ. സ്യാ. പീ.), ഛന്ദലക്ഖണാനുലോമം];

നന്ദോ ച സിരിമാ ചേവ, ദസ ഥേരാ മഹിദ്ധികാതി.