൩. തതിയവഗ്ഗോ

൧. ഉത്തരത്ഥേരഗാഥാ

൧൬൧. ‘‘ഖന്ധാ മയാ പരിഞ്ഞാതാ, തണ്ഹാ മേ സുസമൂഹതാ;

ഭാവിതാ മമ ബോജ്ഝങ്ഗാ, പത്തോ മേ ആസവക്ഖയോ.

൧൬൨. ‘‘സോഹം ഖന്ധേ പരിഞ്ഞായ, അബ്ബഹിത്വാന [അബ്ബുഹിത്വാന (ക.)] ജാലിനിം;

ഭാവയിത്വാന ബോജ്ഝങ്ഗേ, നിബ്ബായിസ്സം അനാസവോ’’തി.

… ഉത്തരോ ഥേരോ….

൨. ഭദ്ദജിത്ഥേരഗാഥാ

൧൬൩. ‘‘പനാദോ നാമ സോ രാജാ, യസ്സ യൂപോ സുവണ്ണയോ;

തിരിയം സോളസുബ്ബേധോ [സോളസപബ്ബേധോ (സീ. അട്ഠ.), സോളസബ്ബാണോ (?)], ഉബ്ഭമാഹു [ഉദ്ധമാഹു (സീ.), ഉച്ചമാഹു (സ്യാ.)] സഹസ്സധാ.

൧൬൪. ‘‘സഹസ്സകണ്ഡോ സതഗേണ്ഡു, ധജാലു ഹരിതാമയോ;

അനച്ചും തത്ഥ ഗന്ധബ്ബാ, ഛസഹസ്സാനി സത്തധാ’’തി.

… ഭദ്ദജിത്ഥേരോ….

൩. സോഭിതത്ഥേരഗാഥാ

൧൬൫. ‘‘സതിമാ പഞ്ഞവാ ഭിക്ഖു, ആരദ്ധബലവീരിയോ;

പഞ്ച കപ്പസതാനാഹം, ഏകരത്തിം അനുസ്സരിം.

൧൬൬. ‘‘ചത്താരോ സതിപട്ഠാനേ, സത്ത അട്ഠ ച ഭാവയം;

പഞ്ച കപ്പസതാനാഹം, ഏകരത്തിം അനുസ്സരി’’ന്തി.

… സോഭിതോ ഥേരോ….

൪. വല്ലിയത്ഥേരഗാഥാ

൧൬൭. ‘‘യം കിച്ചം ദള്ഹവീരിയേന, യം കിച്ചം ബോദ്ധുമിച്ഛതാ;

കരിസ്സം നാവരജ്ഝിസ്സം [നാവരുജ്ഝിസ്സം (ക. സീ. ക.)], പസ്സ വീരിയം പരക്കമ.

൧൬൮. ‘‘ത്വഞ്ച മേ മഗ്ഗമക്ഖാഹി, അഞ്ജസം അമതോഗധം;

അഹം മോനേന മോനിസ്സം, ഗങ്ഗാസോതോവ സാഗര’’ന്തി.

… വല്ലിയോ ഥേരോ….

൫. വീതസോകത്ഥേരഗാഥാ

൧൬൯. ‘‘കേസേ മേ ഓലിഖിസ്സന്തി, കപ്പകോ ഉപസങ്കമി;

തതോ ആദാസമാദായ, സരീരം പച്ചവേക്ഖിസം.

൧൭൦. ‘‘തുച്ഛോ കായോ അദിസ്സിത്ഥ, അന്ധകാരോ തമോ ബ്യഗാ;

സബ്ബേ ചോളാ സമുച്ഛിന്നാ, നത്ഥി ദാനി പുനബ്ഭവോ’’തി.

… വീതസോകോ ഥേരോ….

൬. പുണ്ണമാസത്ഥേരഗാഥാ

൧൭൧. ‘‘പഞ്ച നീവരണേ ഹിത്വാ, യോഗക്ഖേമസ്സ പത്തിയാ;

ധമ്മാദാസം ഗഹേത്വാന, ഞാണദസ്സനമത്തനോ.

൧൭൨. ‘‘പച്ചവേക്ഖിം ഇമം കായം, സബ്ബം സന്തരബാഹിരം;

അജ്ഝത്തഞ്ച ബഹിദ്ധാ ച, തുച്ഛോ കായോ അദിസ്സഥാ’’തി.

… പുണ്ണമാസോ ഥേരോ….

൭. നന്ദകത്ഥേരഗാഥാ

൧൭൩. ‘‘യഥാപി ഭദ്ദോ ആജഞ്ഞോ, ഖലിത്വാ പതിതിട്ഠതി;

ഭിയ്യോ ലദ്ദാന സംവേഗം, അദീനോ വഹതേ ധുരം.

൧൭൪. ‘‘ഏവം ദസ്സനസമ്പന്നം, സമ്മാസമ്ബുദ്ധസാവകം;

ആജാനീയം മം ധാരേഥ, പുത്തം ബുദ്ധസ്സ ഓരസ’’ന്തി.

… നന്ദകോ ഥേരോ….

൮. ഭരതത്ഥേരഗാഥാ

൧൭൫. ‘‘ഏഹി നന്ദക ഗച്ഛാമ, ഉപജ്ഝായസ്സ സന്തികം;

സീഹനാദം നദിസ്സാമ, ബുദ്ധസേട്ഠസ്സ സമ്മുഖാ.

൧൭൬. ‘‘യായ നോ അനുകമ്പായ, അമ്ഹേ പബ്ബാജയീ മുനി;

സോ നോ അത്ഥോ അനുപ്പത്തോ, സബ്ബസംയോജനക്ഖയോ’’തി.

… ഭരതോ ഥേരോ….

൯. ഭാരദ്വാജത്ഥേരഗാഥാ

൧൭൭. ‘‘നദന്തി ഏവം സപ്പഞ്ഞാ, സീഹാവ ഗിരിഗബ്ഭരേ;

വീരാ വിജിതസങ്ഗാമാ, ജേത്വാ മാരം സവാഹനിം [സവാഹനം (ബഹൂസു)].

൧൭൮. ‘‘സത്ഥാ ച പരിചിണ്ണോ മേ, ധമ്മോ സങ്ഘോ ച പൂജിതോ;

അഹഞ്ച വിത്തോ സുമനോ, പുത്തം ദിസ്വാ അനാസവ’’ന്തി.

… ഭാരദ്വാജോ ഥേരോ….

൧൦. കണ്ഹദിന്നത്ഥേരഗാഥാ

൧൭൯. ‘‘ഉപാസിതാ സപ്പുരിസാ, സുതാ ധമ്മാ അഭിണ്ഹസോ;

സുത്വാന പടിപജ്ജിസ്സം, അഞ്ജസം അമതോഗധം.

൧൮൦. ‘‘ഭവരാഗഹതസ്സ മേ സതോ, ഭവരാഗോ പുന മേ ന വിജ്ജതി;

ന ചാഹു ന ച മേ ഭവിസ്സതി, ന ച മേ ഏതരഹി വിജ്ജതീ’’തി.

… കണ്ഹദിന്നോ ഥേരോ….

വഗ്ഗോ തതിയോ നിട്ഠിതോ.

തസ്സുദ്ദാനം –

ഉത്തരോ ഭദ്ദജിത്ഥേരോ, സോഭിതോ വല്ലിയോ ഇസി;

വീതസോകോ ച യോ ഥേരോ, പുണ്ണമാസോ ച നന്ദകോ;

ഭരതോ ഭാരദ്വാജോ ച, കണ്ഹദിന്നോ മഹാമുനീതി.