൧. പഠമവഗ്ഗോ

൧. ഉത്തരത്ഥേരഗാഥാ

൧൨൧. ‘‘നത്ഥി കോചി ഭവോ നിച്ചോ, സങ്ഖാരാ വാപി സസ്സതാ;

ഉപ്പജ്ജന്തി ച തേ ഖന്ധാ, ചവന്തി അപരാപരം.

൧൨൨. ‘‘ഏതമാദീനം ഞത്വാ, ഭവേനമ്ഹി അനത്ഥികോ;

നിസ്സടോ സബ്ബകാമേഹി, പത്തോ മേ ആസവക്ഖയോ’’തി.

ഇത്ഥം സുദം ആയസ്മാ ഉത്തരോ ഥേരോ ഗാഥായോ അഭാസിത്ഥാതി.

൨. പിണ്ഡോലഭാരദ്വാജത്ഥേരഗാഥാ

൧൨൩. ‘‘നയിദം അനയേന ജീവിതം, നാഹാരോ ഹദയസ്സ സന്തികോ;

ആഹാരട്ഠിതികോ സമുസ്സയോ, ഇതി ദിസ്വാന ചരാമി ഏസനം.

൧൨൪. ‘‘പങ്കോതി ഹി നം പവേദയും, യായം വന്ദനപൂജനാ കുലേസു;

സുഖുമം സല്ലം ദുരുബ്ബഹം, സക്കാരോ കാപുരിസേന ദുജ്ജഹോ’’തി.

ഇത്ഥം സുദം ആയസ്മാ പിണ്ഡോലഭാരദ്വാജോ ഥേരോ ഗാഥായോ അഭാസിത്ഥാതി.

൩. വല്ലിയത്ഥേരഗാഥാ

൧൨൫. ‘‘മക്കടോ പഞ്ചദ്വാരായം, കുടികായം പസക്കിയ;

ദ്വാരേന അനുപരിയേതി, ഘട്ടയന്തോ മുഹും മുഹും.

൧൨൬. ‘‘തിട്ഠ മക്കട മാ ധാവി, ന ഹി തേ തം യഥാ പുരേ;

നിഗ്ഗഹീതോസി പഞ്ഞായ, നേവ ദൂരം ഗമിസ്സതീ’’തി.

… വല്ലിയോ ഥേരോ….

൪. ഗങ്ഗാതീരിയത്ഥേരഗാഥാ

൧൨൭. ‘‘തിണ്ണം മേ താലപത്താനം, ഗങ്ഗാതീരേ കുടീ കതാ;

ഛവസിത്തോവ മേ പത്തോ, പംസുകൂലഞ്ച ചീവരം.

൧൨൮. ‘‘ദ്വിന്നം അന്തരവസ്സാനം, ഏകാ വാചാ മേ ഭാസിതാ;

തതിയേ അന്തരവസ്സമ്ഹി, തമോഖന്ധോ [തമോക്ഖന്ധോ (സീ. സ്യാ.)] പദാലിതോ’’തി.

… ഗങ്ഗാതീരിയോ ഥേരോ….

൫. അജിനത്ഥേരഗാഥാ

൧൨൯. ‘‘അപി ചേ ഹോതി തേവിജ്ജോ, മച്ചുഹായീ അനാസവോ;

അപ്പഞ്ഞാതോതി നം ബാലാ, അവജാനന്തി അജാനതാ.

൧൩൦. ‘‘യോ ച ഖോ അന്നപാനസ്സ, ലാഭീ ഹോതീധ പുഗ്ഗലോ;

പാപധമ്മോപി ചേ ഹോതി, സോ നേസം ഹോതി സക്കതോ’’തി.

… അജിനോ ഥേരോ….

൬. മേളജിനത്ഥേരഗാഥാ

൧൩൧. ‘‘യദാഹം ധമ്മമസ്സോസിം, ഭാസമാനസ്സ സത്ഥുനോ;

ന കങ്ഖമഭിജാനാമി, സബ്ബഞ്ഞൂഅപരാജിതേ.

൧൩൨. ‘‘സത്ഥവാഹേ മഹാവീരേ, സാരഥീനം വരുത്തമേ;

മഗ്ഗേ പടിപദായം വാ, കങ്ഖാ മയ്ഹം ന വിജ്ജതീ’’തി.

… മേളജിനോ ഥേരോ….

൭. രാധത്ഥേരഗാഥാ

൧൩൩. [ധ. പ. ൧൩ ധമ്മപദേ] ‘‘യഥാ അഗാരം ദുച്ഛന്നം, വുട്ഠീ സമതിവിജ്ഝതി;

ഏവം അഭാവിതം ചിത്തം, രാഗോ സമതിവിജ്ഝതി.

൧൩൪. [ധ. പ. ൧൪ ധമ്മപദേ] ‘‘യഥാ അഗാരം സുച്ഛന്നം, വുഡ്ഢീ ന സമതിവിജ്ഝതി;

ഏവം സുഭാവിതം ചിത്തം, രാഗോ ന സമതിവിജ്ഝതീ’’തി.

… രാധോ ഥേരോ….

൮. സുരാധത്ഥേരഗാഥാ

൧൩൫. ‘‘ഖീണാ ഹി മയ്ഹം ജാതി, വുസിതം ജിനസാസനം;

പഹീനോ ജാലസങ്ഖാതോ, ഭവനേത്തി സമൂഹതാ.

൧൩൬. ‘‘യസ്സത്ഥായ പബ്ബജിതോ, അഗാരസ്മാനഗാരിയം;

സോ മേ അത്ഥോ അനുപ്പത്തോ, സബ്ബസംയോജനക്ഖയോ’’തി.

… സുരാധോ ഥേരോ….

൯. ഗോതമത്ഥേരഗാഥാ

൧൩൭. ‘‘സുഖം സുപന്തി മുനയോ, യേ ഇത്ഥീസു ന ബജ്ഝരേ;

സദാ വേ രക്ഖിതബ്ബാസു, യാസു സച്ചം സുദുല്ലഭം.

൧൩൮. ‘‘വധം ചരിമ്ഹ തേ കാമ, അനണാ ദാനി തേ മയം;

ഗച്ഛാമ ദാനി നിബ്ബാനം, യത്ഥ ഗന്ത്വാ ന സോചതീ’’തി.

… ഗോതമോ ഥേരോ….

൧൦. വസഭത്ഥേരഗാഥാ

൧൩൯. ‘‘പുബ്ബേ ഹനതി അത്താനം, പച്ഛാ ഹനതി സോ പരേ;

സുഹതം ഹന്തി അത്താനം, വീതംസേനേവ പക്ഖിമാ.

൧൪൦. ‘‘ന ബ്രാഹ്മണോ ബഹിവണ്ണോ, അന്തോ വണ്ണോ ഹി ബ്രാഹ്മണോ;

യസ്മിം പാപാനി കമ്മാനി, സ വേ കണ്ഹോ സുജമ്പതീ’’തി.

… വസഭോ ഥേരോ….

വഗ്ഗോ പഠമോ നിട്ഠിതോ.

തസ്സുദ്ദാനം –

ഉത്തരോ ചേവ പിണ്ഡോലോ, വല്ലിയോ തീരിയോ ഇസി;

അജിനോ ച മേളജിനോ, രാധോ സുരാധോ ഗോതമോ;

വസഭേന ഇമേ ഹോന്തി, ദസ ഥേരാ മഹിദ്ധികാതി.