൯. കൂടവിനിച്ഛയികപേതവത്ഥു

൪൯൯. ‘‘മാലീ കിരിടീ കായൂരീ [കേയൂരീ (സീ.)], ഗത്താ തേ ചന്ദനുസ്സദാ;

പസന്നമുഖവണ്ണോസി, സൂരിയവണ്ണോവ സോഭസി.

൫൦൦. ‘‘അമാനുസാ പാരിസജ്ജാ, യേ തേമേ പരിചാരകാ;

ദസ കഞ്ഞാസഹസ്സാനി, യാ തേമാ പരിചാരികാ;

താ [കാ (ക.)] കമ്ബുകായൂരധരാ, കഞ്ചനാവേളഭൂസിതാ.

൫൦൧. ‘‘മഹാനുഭാവോസി തുവം, ലോമഹംസനരൂപവാ;

പിട്ഠിമംസാനി അത്തനോ, സാമം ഉക്കച്ച [ഉക്കഡ്ഢ (സീ.)] ഖാദസി.

൫൦൨. ‘‘കിം നു കായേന വാചായ, മനസാ ദുക്കുടം കതം;

കിസ്സ കമ്മവിപാകേന, പിട്ഠിമംസാനി അത്തനോ;

സാമം ഉക്കച്ച ഖാദസീ’’തി.

൫൦൩. ‘‘അത്തനോഹം അനത്ഥായ, ജീവലോകേ അചാരിസം;

പേസുഞ്ഞമുസാവാദേന, നികതിവഞ്ചനായ ച.

൫൦൪. ‘‘തത്ഥാഹം പരിസം ഗന്ത്വാ, സച്ചകാലേ ഉപട്ഠിതേ;

അത്ഥം ധമ്മം നിരാകത്വാ [നിരംകത്വാ (ക.) നി + ആ + കര + ത്വാ = നിരാകത്വാ], അധമ്മമനുവത്തിസം.

൫൦൫. ‘‘ഏവം സോ ഖാദതത്താനം, യോ ഹോതി പിട്ഠിമംസികോ;

യഥാഹം അജ്ജ ഖാദാമി, പിട്ഠിമംസാനി അത്തനോ.

൫൦൬. ‘‘തയിദം തയാ നാരദ സാമം ദിട്ഠം, അനുകമ്പകാ യേ കുസലാ വദേയ്യും;

മാ പേസുണം മാ ച മുസാ അഭാണി, മാ ഖോസി പിട്ഠിമംസികോ തുവ’’ന്തി.

കൂടവിനിച്ഛയികപേതവത്ഥു നവമം.