൬. സേരിണീപേതവത്ഥു

൪൬൪. ‘‘നഗ്ഗാ ദുബ്ബണ്ണരൂപാസി, കിസാ ധമനിസന്ഥതാ;

ഉപ്ഫാസുലികേ കിസികേ, കാ നു ത്വം ഇധ തിട്ഠസീ’’തി.

൪൬൫. ‘‘അഹം ഭദന്തേ പേതീമ്ഹി, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ’’തി.

൪൬൬. ‘‘കിം നു കായേന വാചായ, മനസാ കുക്കടം കതം;

കിസ്സ കമ്മവിപാകേന, പേതലോകം ഇതോ ഗതാ’’തി.

൪൬൭. ‘‘അനാവടേസു തിത്ഥേസു, വിചിനിം അഡ്ഢമാസകം;

സന്തേസു ദേയ്യധമ്മേസു, ദീപം നാകാസിമത്തനോ.

൪൬൮. ‘‘നദിം ഉപേമി തസിതാ, രിത്തകാ പരിവത്തതി;

ഛായം ഉപേമി ഉണ്ഹേസു, ആതപോ പരിവത്തതി.

൪൬൯. ‘‘അഗ്ഗിവണ്ണോ ച മേ വാതോ, ഡഹന്തോ ഉപവായതി;

ഏതഞ്ച ഭന്തേ അരഹാമി, അഞ്ഞഞ്ച പാപകം തതോ.

൪൭൦. ‘‘ഗന്ത്വാന ഹത്ഥിനിം പുരം, വജ്ജേസി മയ്ഹ മാതരം;

‘ധീതാ ച തേ മയാ ദിട്ഠാ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ’.

൪൭൧. ‘‘അത്ഥി മേ ഏത്ഥ നിക്ഖിത്തം, അനക്ഖാതഞ്ച തം മയാ;

ചത്താരിസതസഹസ്സാനി, പല്ലങ്കസ്സ ച ഹേട്ഠതോ.

൪൭൨. ‘‘തതോ മേ ദാനം ദദതു, തസ്സാ ച ഹോതു ജീവികാ;

ദാനം ദത്വാ ച മേ മാതാ, ദക്ഖിണം അനുദിച്ഛതു [അനുദിസ്സതു (സീ. പീ.), അന്വാദിസ്സതു (സ്യാ.)];

തദാഹം സുഖിതാ ഹേസ്സം, സബ്ബകാമസമിദ്ധിനീ’’തി.

൪൭൩. ‘‘സാധൂ’’തി സോ പടിസ്സുത്വാ, ഗന്ത്വാന ഹത്ഥിനിം പുരം;

അവോച തസ്സാ മാതരം –

‘ധീതാ ച തേ മയാ ദിട്ഠാ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ’.

൪൭൪. ‘‘സാ മം തത്ഥ സമാദപേസി, ( ) [(ഗന്ത്വാന ഹത്ഥിനിം പുരം) (സ്യാ. ക.)] വജ്ജേസി മയ്ഹ മാതരം;

‘ധീതാ ച തേ മയാ ദിട്ഠാ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ’.

൪൭൫. ‘‘അത്ഥി ച മേ ഏത്ഥ നിക്ഖിത്തം, അനക്ഖാതഞ്ച തം മയാ;

ചത്താരിസതസഹസ്സാനി, പല്ലങ്കസ്സ ച ഹേട്ഠതോ.

൪൭൬. ‘‘തതോ മേ ദാനം ദദതു, തസ്സാ ച ഹോതു ജീവികാ;

ദാനം ദത്വാ ച മേ മാതാ, ദക്ഖിണം അനുദിച്ഛതു ( ) [(തതോ തുവം ദാനം ദേഹി, തസ്സാ ദക്ഖിണമാദിസീ) (ക.)];

‘തദാ സാ സുഖിതാ ഹേസ്സം, സബ്ബകാമസമിദ്ധിനീ’’’തി.

൪൭൭. തതോ ഹി സാ ദാനമദാ, തസ്സാ ദക്ഖിണമാദിസീ;

പേതീ ച സുഖിതാ ആസി, തസ്സാ ചാസി സുജീവികാതി.

സേരിണീപേതവത്ഥു ഛട്ഠം.