൧. അഭിജ്ജമാനപേതവത്ഥു

൩൮൭. ‘‘അഭിജ്ജമാനേ വാരിമ്ഹി, ഗങ്ഗായ ഇധ ഗച്ഛസി;

നഗ്ഗോ പുബ്ബദ്ധപേതോവ മാലധാരീ അലങ്കതോ;

കുഹിം ഗമിസ്സസി പേത, കത്ഥ വാസോ ഭവിസ്സതീ’’തി.

൩൮൮. ‘‘ചുന്ദട്ഠിലം [ചുന്ദട്ഠികം (സീ.)] ഗമിസ്സാമി, പേതോ സോ ഇതി ഭാസതി;

അന്തരേ വാസഭഗാമം, ബാരാണസിം ച [ബാരാണസിയാ ച (സീ. സ്യാ.)] സന്തികേ’’.

൩൮൯. തഞ്ച ദിസ്വാ മഹാമത്തോ, കോലിയോ ഇതി വിസ്സുതോ;

സത്തും ഭത്തഞ്ച പേതസ്സ, പീതകഞ്ച യുഗം അദാ.

൩൯൦. നാവായ തിട്ഠമാനായ, കപ്പകസ്സ അദാപയി;

കപ്പകസ്സ പദിന്നമ്ഹി, ഠാനേ പേതസ്സ ദിസ്സഥ [പേതസ്സു’ദിസ്സഥ (സീ.), പേതസ്സു’ദിച്ഛഥ (?)].

൩൯൧. തതോ സുവത്ഥവസനോ, മാലധാരീ അലങ്കതോ;

ഠാനേ ഠിതസ്സ പേതസ്സ, ദക്ഖിണാ ഉപകപ്പഥ;

തസ്മാ ദജ്ജേഥ പേതാനം, അനുകമ്പായ പുനപ്പുനം.

൩൯൨. സാതുന്നവസനാ [സാഹുന്നവാസിനോ (സ്യാ. പീ.), സാഹുന്ദവാസിനോ (ക.)] ഏകേ, അഞ്ഞേ കേസനിവാസനാ [കേസനിവാസിനോ (സ്യാ. ക.)];

പേതാ ഭത്തായ ഗച്ഛന്തി, പക്കമന്തി ദിസോദിസം.

൩൯൩. ദൂരേ ഏകേ [ദൂരേ പേതാ (ക.)] പധാവിത്വാ, അലദ്ധാവ നിവത്തരേ;

ഛാതാ പമുച്ഛിതാ ഭന്താ, ഭൂമിയം പടിസുമ്ഭിതാ.

൩൯൪. തേ ച [കേചി (സീ. സ്യാ.)] തത്ഥ പപതിതാ [പപതിത്വാ (സീ.), ച പതിതാ (സ്യാ.)], ഭൂമിയം പടിസുമ്ഭിതാ;

പുബ്ബേ അകതകല്യാണാ, അഗ്ഗിദഡ്ഢാവ ആതപേ.

൩൯൫. ‘‘മയം പുബ്ബേ പാപധമ്മാ, ഘരണീ കുലമാതരോ;

സന്തേസു ദേയ്യധമ്മേസു, ദീപം നാകമ്ഹ അത്തനോ.

൩൯൬. ‘‘പഹൂതം അന്നപാനമ്പി, അപിസ്സു അവകിരീയതി;

സമ്മഗ്ഗതേ പബ്ബജിതേ, ന ച കിഞ്ചി അദമ്ഹസേ.

൩൯൭. ‘‘അകമ്മകാമാ അലസാ, സാദുകാമാ മഹഗ്ഘസാ;

ആലോപപിണ്ഡദാതാരോ, പടിഗ്ഗഹേ പരിഭാസിമ്ഹസേ [പരിഭാസിതാ (സ്യാ. ക.)].

൩൯൮. ‘‘തേ ഘരാ താ ച ദാസിയോ, താനേവാഭരണാനി നോ;

തേ അഞ്ഞേ പരിചാരേന്തി, മയം ദുക്ഖസ്സ ഭാഗിനോ.

൩൯൯. ‘‘വേണീ വാ അവഞ്ഞാ ഹോന്തി, രഥകാരീ ച ദുബ്ഭികാ;

ചണ്ഡാലീ കപണാ ഹോന്തി, കപ്പകാ [ന്ഹാപികാ (സീ.)] ച പുനപ്പുനം.

൪൦൦. ‘‘യാനി യാനി നിഹീനാനി, കുലാനി കപണാനി ച;

തേസു തേസ്വേവ ജായന്തി, ഏസാ മച്ഛരിനോ ഗതി.

൪൦൧. ‘‘പുബ്ബേ ച കതകല്യാണാ, ദായകാ വീതമച്ഛരാ;

സഗ്ഗം തേ പരിപൂരേന്തി, ഓഭാസേന്തി ച നന്ദനം.

൪൦൨. ‘‘വേജയന്തേ ച പാസാദേ, രമിത്വാ കാമകാമിനോ;

ഉച്ചാകുലേസു ജായന്തി, സഭോഗേസു തതോ ചുതാ.

൪൦൩. ‘‘കൂടാഗാരേ ച പാസാദേ, പല്ലങ്കേ ഗോനകത്ഥതേ;

ബീജിതങ്ഗാ [വീജിതങ്ഗാ (സീ. സ്യാ.)] മോരഹത്ഥേഹി, കുലേ ജാതാ യസസ്സിനോ.

൪൦൪. ‘‘അങ്കതോ അങ്കം ഗച്ഛന്തി, മാലധാരീ അലങ്കതാ;

ധാതിയോ ഉപതിട്ഠന്തി, സായം പാതം സുഖേസിനോ.

൪൦൫. ‘‘നയിദം അകതപുഞ്ഞാനം, കതപുഞ്ഞാനമേവിദം;

അസോകം നന്ദനം രമ്മം, തിദസാനം മഹാവനം.

൪൦൬. ‘‘സുഖം അകതപുഞ്ഞാനം, ഇധ നത്ഥി പരത്ഥ ച;

സുഖഞ്ച കതപുഞ്ഞാനം, ഇധ ചേവ പരത്ഥ ച.

൪൦൭. ‘‘തേസം സഹബ്യകാമാനം, കത്തബ്ബം കുസലം ബഹും;

കതപുഞ്ഞാ ഹി മോദന്തി, സഗ്ഗേ ഭോഗസമങ്ഗിനോ’’തി.

അഭിജ്ജമാനപേതവത്ഥു പഠമം.