൨. സാണവാസീഥേരപേതവത്ഥു

൪൦൮. കുണ്ഡിനാഗരിയോ ഥേരോ, സാണവാസി [സാനുവാസി (സീ.), സാനവാസി (സ്യാ.)] നിവാസികോ;

പോട്ഠപാദോതി നാമേന, സമണോ ഭാവിതിന്ദ്രിയോ.

൪൦൯. തസ്സ മാതാ പിതാ ഭാതാ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ.

൪൧൦. തേ ദുഗ്ഗതാ സൂചികട്ടാ, കിലന്താ നഗ്ഗിനോ കിസാ;

ഉത്തസന്താ [ഓത്തപ്പന്താ (സ്യാ. ക.)] മഹത്താസാ [മഹാതാസാ (സീ.)], ന ദസ്സേന്തി കുരൂരിനോ [കുരുദ്ദിനോ (ക.)].

൪൧൧. തസ്സ ഭാതാ വിതരിത്വാ, നഗ്ഗോ ഏകപഥേകകോ;

ചതുകുണ്ഡികോ ഭവിത്വാന, ഥേരസ്സ ദസ്സയീതുമം.

൪൧൨. ഥേരോ ചാമനസികത്വാ, തുണ്ഹീഭൂതോ അതിക്കമി;

സോ ച വിഞ്ഞാപയീ ഥേരം, ‘ഭാതാ പേതഗതോ അഹം’.

൪൧൩. ‘‘മാതാ പിതാ ച തേ ഭന്തേ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ.

൪൧൪. ‘‘തേ ദുഗ്ഗതാ സൂചികട്ടാ, കിലന്താ നഗ്ഗിനോ കിസാ;

ഉത്തസന്താ മഹത്താസാ, ന ദസ്സേന്തി കുരൂരിനോ.

൪൧൫. ‘‘അനുകമ്പസ്സു കാരുണികോ, ദത്വാ അന്വാദിസാഹി നോ;

തവ ദിന്നേന ദാനേന, യാപേസ്സന്തി കുരൂരിനോ’’തി.

൪൧൬. ഥേരോ ചരിത്വാ പിണ്ഡായ, ഭിക്ഖൂ അഞ്ഞേ ച ദ്വാദസ;

ഏകജ്ഝം സന്നിപതിംസു, ഭത്തവിസ്സഗ്ഗകാരണാ.

൪൧൭. ഥേരോ സബ്ബേവ തേ ആഹ, ‘‘യഥാലദ്ധം ദദാഥ മേ;

സങ്ഘഭത്തം കരിസ്സാമി, അനുകമ്പായ ഞാതിനം’’.

൪൧൮. നിയ്യാദയിംസു ഥേരസ്സ, ഥേരോ സങ്ഘം നിമന്തയി;

ദത്വാ അന്വാദിസി ഥേരോ, മാതു പിതു ച ഭാതുനോ;

‘‘ഇദം മേ ഞാതീനം ഹോതു, സുഖിതാ ഹോന്തു ഞാതയോ’’.

൪൧൯. സമനന്തരാനുദ്ദിട്ഠേ, ഭോജനം ഉദപജ്ജഥ;

സുചിം പണീതം സമ്പന്നം, അനേകരസബ്യഞ്ജനം.

൪൨൦. തതോ ഉദ്ദസ്സയീ [ഉദ്ദിസയീ (സീ. ക.), ഉദ്ദിസ്സതി (സ്യാ. ക.)] ഭാതാ, വണ്ണവാ ബലവാ സുഖീ;

‘‘പഹൂതം ഭോജനം ഭന്തേ, പസ്സ നഗ്ഗാമ്ഹസേ മയം;

തഥാ ഭന്തേ പരക്കമ, യഥാ വത്ഥം ലഭാമസേ’’തി.

൪൨൧. ഥേരോ സങ്കാരകൂടമ്ഹാ, ഉച്ചിനിത്വാന നന്തകേ;

പിലോതികം പടം കത്വാ, സങ്ഘേ ചാതുദ്ദിസേ അദാ.

൪൨൨. ദത്വാ അന്വാദിസീ ഥേരോ, മാതു പിതു ച ഭാതുനോ;

‘‘ഇദം മേ ഞാതീനം ഹോതു, സുഖിതാ ഹോന്തു ഞാതയോ’’.

൪൨൩. സമനന്തരാനുദ്ദിട്ഠേ, വത്ഥാനി ഉദപജ്ജിസും;

തതോ സുവത്ഥവസനോ, ഥേരസ്സ ദസ്സയീതുമം.

൪൨൪. ‘‘യാവതാ നന്ദരാജസ്സ, വിജിതസ്മിം പടിച്ഛദാ;

തതോ ബഹുതരാ ഭന്തേ, വത്ഥാനച്ഛാദനാനി നോ.

൪൨൫. ‘‘കോസേയ്യകമ്ബലീയാനി, ഖോമ കപ്പാസികാനി ച;

വിപുലാ ച മഹഗ്ഘാ ച, തേപാകാസേവലമ്ബരേ.

൪൨൬. ‘‘തേ മയം പരിദഹാമ, യം യം ഹി മനസോ പിയം;

തഥാ ഭന്തേ പരക്കമ, യഥാ ഗേഹം ലഭാമസേ’’തി.

൪൨൭. ഥേരോ പണ്ണകുടിം കത്വാ, സങ്ഘേ ചാതുദ്ദിസേ അദാ;

ദത്വാ അന്വാദിസീ ഥേരോ, മാതു പിതു ച ഭാതുനോ;

‘‘ഇദം മേ ഞാതീനം ഹോതു, സുഖിതാ ഹോന്തു ഞാതയോ’’.

൪൨൮. സമനന്തരാനുദ്ദിട്ഠേ, ഘരാനി ഉദപജ്ജിസും;

കൂടാഗാരനിവേസനാ, വിഭത്താ ഭാഗസോ മിതാ.

൪൨൯. ‘‘ന മനുസ്സേസു ഈദിസാ, യാദിസാ നോ ഘരാ ഇധ;

അപി ദിബ്ബേസു യാദിസാ, താദിസാ നോ ഘരാ ഇധ.

൪൩൦. ‘‘ദദ്ദല്ലമാനാ ആഭേന്തി [ആഭന്തി (ക.)], സമന്താ ചതുരോ ദിസാ;

‘തഥാ ഭന്തേ പരക്കമ, യഥാ പാനീയം ലഭാമസേ’’തി.

൪൩൧. ഥേരോ കരണം [കരകം (സീ. സ്യാ. പീ.)] പൂരേത്വാ, സങ്ഘേ ചാതുദ്ദിസേ അദാ;

ദത്വാ അന്വാദിസീ ഥേരോ, മാതു പിതു ച ഭാതുനോ;

‘‘ഇദം മേ ഞാതീനം ഹോതു, സുഖിതാ ഹോന്തു ഞാതയോ’.

൪൩൨. സമനന്തരാനുദ്ദിട്ഠേ, പാനീയം ഉദപജ്ജഥ;

ഗമ്ഭീരാ ചതുരസ്സാ ച, പോക്ഖരഞ്ഞോ സുനിമ്മിതാ.

൪൩൩. സീതോദികാ സുപ്പതിത്ഥാ, സീതാ അപ്പടിഗന്ധിയാ;

പദുമുപ്പലസഞ്ഛന്നാ, വാരികിഞ്ജക്ഖപൂരിതാ.

൪൩൪. തത്ഥ ന്ഹത്വാ പിവിത്വാ ച, ഥേരസ്സ പടിദസ്സയും;

‘‘പഹൂതം പാനീയം ഭന്തേ, പാദാ ദുക്ഖാ ഫലന്തി നോ’’.

൪൩൫. ‘‘ആഹിണ്ഡമാനാ ഖഞ്ജാമ, സക്ഖരേ കുസകണ്ടകേ;

‘തഥാ ഭന്തേ പരക്കമ, യഥാ യാനം ലഭാമസേ’’’തി.

൪൩൬. ഥേരോ സിപാടികം ലദ്ധാ, സങ്ഘേ ചാതുദ്ദിസേ അദാ;

ദത്വാ അന്വാദിസീ ഥേരോ, മാതു പിതു ച ഭാതുനോ;

‘‘ഇദം മേ ഞാതീനം ഹോതു, സുഖിതാ ഹോന്തു ഞാതയോ’’.

൪൩൭. സമനന്തരാനുദ്ദിട്ഠേ, പേതാ രഥേന മാഗമും;

‘‘അനുകമ്പിതമ്ഹ ഭദന്തേ, ഭത്തേനച്ഛാദനേന ച.

൪൩൮. ‘‘ഘരേന പാനീയദാനേന, യാനദാനേന ചൂഭയം;

മുനിം കാരുണികം ലോകേ, ഭന്തേ വന്ദിതുമാഗതാ’’തി.

സാണവാസീഥേരപേതവത്ഥു ദുതിയം.