൧൩. ഉബ്ബരിപേതവത്ഥു

൩൬൮. അഹു രാജാ ബ്രഹ്മദത്തോ, പഞ്ചാലാനം രഥേസഭോ;

അഹോരത്താനമച്ചയാ, രാജാ കാലമക്രുബ്ബഥ [രാജാ കാലങ്കരീ തദാ (സീ.)].

൩൬൯. തസ്സ ആളാഹനം ഗന്ത്വാ, ഭരിയാ കന്ദതി ഉബ്ബരീ [ഉപ്പരി (ക.)];

ബ്രഹ്മദത്തം അപസ്സന്തീ, ബ്രഹ്മദത്താതി കന്ദതി.

൩൭൦. ഇസി ച തത്ഥ ആഗച്ഛി, സമ്പന്നചരണോ മുനി;

സോ ച തത്ഥ അപുച്ഛിത്ഥ, യേ തത്ഥ സുസമാഗതാ.

൩൭൧. ‘‘കസ്സ ഇദം ആളാഹനം, നാനാഗന്ധസമേരിതം;

കസ്സായം കന്ദതി ഭരിയാ, ഇതോ ദൂരഗതം പതിം;

ബ്രഹ്മദത്തം അപസ്സന്തീ, ‘ബ്രഹ്മദത്താ’തി കന്ദതി’’.

൩൭൨. തേ ച തത്ഥ വിയാകംസു, യേ തത്ഥ സുസമാഗതാ;

‘‘ബ്രഹ്മദത്തസ്സ ഭദന്തേ [ഭദ്ദന്തേ (ക.)], ബ്രഹ്മദത്തസ്സ മാരിസ.

൩൭൩. ‘‘തസ്സ ഇദം ആളാഹനം, നാനാഗന്ധസമേരിതം;

തസ്സായം കന്ദതി ഭരിയാ, ഇതോ ദൂരഗതം പതിം;

ബ്രഹ്മദത്തം അപസ്സന്തീ, ‘ബ്രഹ്മദത്താ’തി കന്ദതി’’.

൩൭൪. ‘‘ഛളാസീതിസഹസ്സാനി, ബ്രഹ്മദത്തസ്സനാമകാ;

ഇമസ്മിം ആളാഹനേ ദഡ്ഢാ, തേസം കമനുസോചസീ’’തി.

൩൭൫. ‘‘യോ രാജാ ചൂളനീപുത്തോ, പഞ്ചാലാനം രഥേസഭോ;

തം ഭന്തേ അനുസോചാമി, ഭത്താരം സബ്ബകാമദ’’ന്തി.

൩൭൬. ‘‘സബ്ബേ വാഹേസും രാജാനോ, ബ്രഹ്മദത്തസ്സനാമകാ;

സബ്ബേവചൂളനീപുത്താ, പഞ്ചാലാനം രഥേസഭാ.

൩൭൭. ‘‘സബ്ബേസം അനുപുബ്ബേന, മഹേസിത്തമകാരയി;

കസ്മാ പുരിമകേ ഹിത്വാ, പച്ഛിമം അനുസോചസീ’’തി.

൩൭൮. ‘‘ആതുമേ ഇത്ഥിഭൂതായ, ദീഘരത്തായ മാരിസ;

യസ്സാ മേ ഇത്ഥിഭൂതായ, സംസാരേ ബഹുഭാസസീ’’തി.

൩൭൯. ‘‘അഹു ഇത്ഥീ അഹു പുരിസോ, പസുയോനിമ്പി ആഗമാ;

ഏവമേതം അതീതാനം, പരിയന്തോ ന ദിസ്സതീ’’തി.

൩൮൦. ‘‘ആദിത്തം വത മം സന്തം, ഘതസിത്തംവ പാവകം;

വാരിനാ വിയ ഓസിഞ്ചം, സബ്ബം നിബ്ബാപയേ ദരം.

൩൮൧. ‘‘അബ്ബഹീ വത മേ സല്ലം, സോകം ഹദയനിസ്സിതം;

യോ മേ സോകപരേതായ, പതിസോകം അപാനുദി.

൩൮൨. ‘‘സാഹം അബ്ബൂള്ഹസല്ലാസ്മി, സീതിഭൂതാസ്മി നിബ്ബുതാ;

ന സോചാമി ന രോദാമി, തവ സുത്വാ മഹാമുനീ’’തി.

൩൮൩. തസ്സ തം വചനം സുത്വാ, സമണസ്സ സുഭാസിതം;

പത്തചീവരമാദായ, പബ്ബജി അനഗാരിയം.

൩൮൪. സാ ച പബ്ബജിതാ സന്താ, അഗാരസ്മാ അനഗാരിയം;

മേത്താചിത്തം അഭാവേസി, ബ്രഹ്മലോകൂപപത്തിയാ.

൩൮൫. ഗാമാ ഗാമം വിചരന്തീ, നിഗമേ രാജധാനിയോ;

ഉരുവേലാ നാമ സോ ഗാമോ, യത്ഥ കാലമക്രുബ്ബഥ.

൩൮൬. മേത്താചിത്തം ആഭാവേത്വാ, ബ്രഹ്മലോകൂപപത്തിയാ;

ഇത്ഥിചിത്തം വിരാജേത്വാ, ബ്രഹ്മലോകൂപഗാ അഹൂതി.

ഉബ്ബരിപേതവത്ഥു തേരസമം.

ഉബ്ബരിവഗ്ഗോ ദുതിയോ നിട്ഠിതോ.