൧൨. കണ്ണമുണ്ഡപേതിവത്ഥു

൩൪൮. ‘‘സോണ്ണസോപാനഫലകാ, സോണ്ണവാലുകസന്ഥതാ;

തത്ഥ സോഗന്ധിയാ വഗ്ഗൂ, സുചിഗന്ധാ മനോരമാ.

൩൪൯. ‘‘നാനാരുക്ഖേഹി സഞ്ഛന്നാ, നാനാഗന്ധസമേരിതാ;

നാനാപദുമസഞ്ഛന്നാ, പുണ്ഡരീകസമോതതാ [സമോഹതാ (ക.)].

൩൫൦. ‘‘സുരഭിം സമ്പവായന്തി, മനുഞ്ഞാ മാലുതേരിതാ;

ഹംസകോഞ്ചാഭിരുദാ ച, ചക്കവക്കാഭികൂജിതാ.

൩൫൧. ‘‘നാനാദിജഗണാകിണ്ണാ, നാനാസരഗണായുതാ;

നാനാഫലധരാ രുക്ഖാ, നാനാപുപ്ഫധരാ വനാ.

൩൫൨. ‘‘ന മനുസ്സേസു ഈദിസം, നഗരം യാദിസം ഇദം;

പാസാദാ ബഹുകാ തുയ്ഹം, സോവണ്ണരൂപിയാമയാ;

ദദ്ദല്ലമാനാ ആഭേന്തി [ആഭന്തി (ക.)], സമന്താ ചതുരോ ദിസാ.

൩൫൩. ‘‘പഞ്ച ദാസിസതാ തുയ്ഹം, യാ തേമാ പരിചാരികാ;

താ [കാ (ക.)] കമ്ബുകായൂരധരാ [കമ്ബുകേയൂരധരാ (സീ.)], കഞ്ചനാവേളഭൂസിതാ.

൩൫൪. ‘‘പല്ലങ്കാ ബഹുകാ തുയ്ഹം, സോവണ്ണരൂപിയാമയാ;

കദലിമിഗസഞ്ഛന്നാ [കാദലിമിഗസഞ്ഛന്നാ (സീ.)], സജ്ജാ ഗോനകസന്ഥതാ.

൩൫൫. ‘‘യത്ഥ ത്വം വാസൂപഗതാ, സബ്ബകാമസമിദ്ധിനീ;

സമ്പത്തായഡ്ഢരത്തായ [… രത്തിയാ (ക.)], തതോ ഉട്ഠായ ഗച്ഛസി.

൩൫൬. ‘‘ഉയ്യാനഭൂമിം ഗന്ത്വാന, പോക്ഖരഞ്ഞാ സമന്തതോ;

തസ്സാ തീരേ തുവം ഠാസി, ഹരിതേ സദ്ദലേ സുഭേ.

൩൫൭. ‘‘തതോ തേ കണ്ണമുണ്ഡോ സുനഖോ, അങ്ഗമങ്ഗാനി ഖാദതി;

യദാ ച ഖായിതാ ആസി, അട്ഠിസങ്ഖലികാ കതാ;

ഓഗാഹസി പോക്ഖരണിം, ഹോതി കായോ യഥാ പുരേ.

൩൫൮. ‘‘തതോ ത്വം അങ്ഗപച്ചങ്ഗീ [അങ്ഗപച്ചങ്ഗാ (ക.)], സുചാരു പിയദസ്സനാ;

വത്ഥേന പാരുപിത്വാന, ആയാസി മമ സന്തികം.

൩൫൯. ‘‘കിം നു കായേന വാചായ, മനസാ ദുക്കടം കതം;

കിസ്സ കമ്മവിപാകേന, കണ്ണമുണ്ഡോ സുനഖോ തവഅങ്ഗമങ്ഗാനി ഖാദതീ’’തി.

൩൬൦. ‘‘കിമിലായം [കിമ്ബിലായം (സീ. സ്യാ.)] ഗഹപതി, സദ്ധോ ആസി ഉപാസകോ;

തസ്സാഹം ഭരിയാ ആസിം, ദുസ്സീലാ അതിചാരിനീ.

൩൬൧. ‘‘സോ മം അതിചരമാനായ [ഏവമാതിചരമാനായ (സ്യാ. പീ.)], സാമികോ ഏതദബ്രവി;

‘നേതം ഛന്നം [നേതം ഛന്നം ന (സീ.), നേതം ഛന്നം നേതം (ക.)] പതിരൂപം, യം ത്വം അതിചരാസി മം’.

൩൬൨. ‘‘സാഹം ഘോരഞ്ച സപഥം, മുസാവാദഞ്ച ഭാസിസം;

‘നാഹം തം അതിചരാമി, കായേന ഉദ ചേതസാ.

൩൬൩. ‘‘‘സചാഹം തം അതിചരാമി, കായേന ഉദ ചേതസാ;

കണ്ണമുണ്ഡോ യം സുനഖോ, അങ്ഗമങ്ഗാനി ഖാദതു’.

൩൬൪. ‘‘തസ്സ കമ്മസ്സ വിപാകം, മുസാവാദസ്സ ചൂഭയം;

സത്തേവ വസ്സസതാനി, അനുഭൂതം യതോ ഹി മേ;

കണ്ണമുണ്ഡോ ച സുനഖോ, അങ്ഗമങ്ഗാനി ഖാദതി.

൩൬൫. ‘‘ത്വഞ്ച ദേവ ബഹുകാരോ, അത്ഥായ മേ ഇധാഗതോ;

സുമുത്താഹം കണ്ണമുണ്ഡസ്സ, അസോകാ അകുതോഭയാ.

൩൬൬. ‘‘താഹം ദേവ നമസ്സാമി, യാചാമി പഞ്ജലീകതാ;

ഭുഞ്ജ അമാനുസേ കാമേ, രമ ദേവ മയാ സഹാ’’തി.

൩൬൭. ‘‘ഭുത്താ അമാനുസാ കാമാ, രമിതോമ്ഹി തയാ സഹ;

താഹം സുഭഗേ യാചാമി, ഖിപ്പം പടിനയാഹി മ’’ന്തി.

കണ്ണമുണ്ഡപേതിവത്ഥു ദ്വാദസമം.