൧൧. സുത്തപേതവത്ഥു

൩൪൧. ‘‘അഹം പുരേ പബ്ബജിതസ്സ ഭിക്ഖുനോ, സുത്തം അദാസിം ഉപസങ്കമ്മ യാചിതാ;

തസ്സ വിപാകോ വിപുലഫലൂപലബ്ഭതി, ബഹുകാ ച മേ ഉപ്പജ്ജരേ [ബഹൂ ച മേ ഉപപജ്ജരേ (സീ.)] വത്ഥകോടിയോ.

൩൪൨. ‘‘പുപ്ഫാഭികിണ്ണം രമിതം [രമ്മമിദം (ക.)] വിമാനം, അനേകചിത്തം നരനാരിസേവിതം;

സാഹം ഭുഞ്ജാമി ച പാരുപാമി ച, പഹൂതവിത്താ ന ച താവ ഖീയതി.

൩൪൩. ‘‘തസ്സേവ കമ്മസ്സ വിപാകമന്വയാ, സുഖഞ്ച സാതഞ്ച ഇധൂപലബ്ഭതി;

സാഹം ഗന്ത്വാ പുനദേവ മാനുസം, കാഹാമി പുഞ്ഞാനി നയയ്യപുത്ത മ’’ന്തി.

൩൪൪. ‘‘സത്ത തുവം വസ്സസതാ ഇധാഗതാ,

ജിണ്ണാ ച വുഡ്ഢാ ച തഹിം ഭവിസ്സസി;

സബ്ബേവ തേ കാലകതാ ച ഞാതകാ,

കിം തത്ഥ ഗന്ത്വാന ഇതോ കരിസ്സസീ’’തി.

൩൪൫. ‘‘സത്തേവ വസ്സാനി ഇധാഗതായ മേ, ദിബ്ബഞ്ച സുഖഞ്ച സമപ്പിതായ;

സാഹം ഗന്ത്വാന പുനദേവ മാനുസം, കാഹാമി പുഞ്ഞാനി നയയ്യപുത്ത മ’’ന്തി.

൩൪൬. സോ തം ഗഹേത്വാന പസയ്ഹ ബാഹായം, പച്ചാനയിത്വാന ഥേരിം സുദുബ്ബലം;

‘‘വജ്ജേസി അഞ്ഞമ്പി ജനം ഇധാഗതം, ‘കരോഥ പുഞ്ഞാനി സുഖൂപലബ്ഭതി’’.

൩൪൭. ‘‘ദിട്ഠാ മയാ അകതേന സാധുനാ, പേതാ വിഹഞ്ഞന്തി തഥേവ മനുസ്സാ;

കമ്മഞ്ച കത്വാ സുഖവേദനീയം, ദേവാ മനുസ്സാ ച സുഖേ ഠിതാ പജാ’’തി.

സുത്തപേതവത്ഥു ഏകാദസമം.