൯. ഛബുദ്ധധമ്മവാരോ

൩൮. ‘‘‘യാവതാ ഇന്ദ്രിയപരോപരിയത്തേ ഞാണം, ഞാതം ദിട്ഠം വിദിതം സച്ഛികതം ഫസ്സിതം പഞ്ഞായ. അഫസ്സിതം പഞ്ഞായ ഇന്ദ്രിയപരോപരിയത്തേ ഞാണം നത്ഥീ’തി – ചക്ഖും ഉദപാദി…പേ… ആലോകോ ഉദപാദി’’. ഇന്ദ്രിയപരോപരിയത്തേ ഞാണേ പഞ്ചവീസതി ധമ്മാ, പഞ്ചവീസതി അത്ഥാ, പഞ്ഞാസ നിരുത്തിയോ, സതം ഞാണാനി.

‘‘‘യാവതാ സത്താനം ആസയാനുസയേ ഞാണം…പേ… യാവതാ യമകപാടിഹീരേ ഞാണം …പേ… യാവതാ മഹാകരുണാസമാപത്തിയാ ഞാണം…പേ… യാവതാ സബ്ബഞ്ഞുതഞ്ഞാണം…പേ… യാവതാ അനാവരണം ഞാണം, ഞാതം ദിട്ഠം വിദിതം സച്ഛികതം ഫസ്സിതം പഞ്ഞായ. അഫസ്സിതം പഞ്ഞായ അനാവരണം ഞാണം നത്ഥീ’തി – ചക്ഖും ഉദപാദി, ഞാണം ഉദപാദി, പഞ്ഞാ ഉദപാദി, വിജ്ജാ ഉദപാദി, ആലോകോ ഉദപാദി’’. അനാവരണേ ഞാണേ പഞ്ചവീസതി ധമ്മാ, പഞ്ചവീസതി അത്ഥാ, പഞ്ഞാസ നിരുത്തിയോ, സതം ഞാണാനി.

ഛസു ബുദ്ധധമ്മേസു ദിയഡ്ഢസതം ധമ്മാ, ദിയഡ്ഢസതം അത്ഥാ, തീണി നിരുത്തിസതാനി, ഛ ഞാണസതാനി.

പടിസമ്ഭിദാധികരണേ [പടിസമ്ഭിദാപകരണേ (സ്യാ.)] അഡ്ഢനവധമ്മസതാനി [അഡ്ഢനവമാനി ധമ്മസതാനി (സ്യാ.), അഡ്ഢനവമധമ്മസതാനി (ക.)], അഡ്ഢനവഅത്ഥസതാനി, നിരുത്തിസഹസ്സഞ്ച സത്ത ച നിരുത്തിസതാനി, തീണി ച ഞാണസഹസ്സാനി, ചത്താരി ച ഞാണസതാനീതി.

പടിസമ്ഭിദാകഥാ നിട്ഠിതാ.